Kosovë

Mosformimi i qeverisë zhgënjim për elektoratin, konsiderojnë njohësit e zhvillimeve politike

Published

7 years ago

18 December, 2019

Kanë kaluar më shumë se dy muaj nga procesi zgjedhor, ndërsa partitë fituese ende nuk janë dakorduar rreth formimit të qeverisë.

Njohësit e zhvillimeve politike në Ferizaj, konsiderojnë se veprimet e Lëvizjes Vetëvendosje dhe Lidhjes Demokratike të Kosovës janë zhgënjyese për elektoratin.

“Qytetari ka ardhë deri tek një nivel i fundit i pritjes, pasi nuk është vetëm problemi i mosbërjes së qeverisë, sa është problemi i reflektimit të mosaftësisë së bërjes së qeverisë në kuptimin e lojërave matematike politike, për arsye se kjo votë si asnjëherë tjetër ka shprehur vullnetin për ndryshime esenciale që është menduar se do të përcillen edhe me vullnete politike të partnerëve të rinj për koalicion, por e cila gjë doli që mos të jetë kështu. Në qoftë se i kthemi së kaluarës, koalicionet qeverisëse nuk kanë reflektuar një pjekuri të një mendtë politike, nuk kanë treguar një kapërcim real të këndvështrimeve të tyre provinciale prandaj dhe skema politike e jonë ka rrezikuar shpeshherë që të jetë e barrikaduar në bazë të interesave klanore apo rajonale, kështu që na janë formuar edhe parti rajonale e grupe të interesit që shpeshherë po dominojnë mbi interesin e përgjithshëm dhe në këtë kurth ka rënë edhe LDK dhe LVV. Kjo vonesë i ka zbehur këto dy subjekte, unë shoh një tendencë të krijimit të një alibie morale se cili është fajtori nëse nuk arrihet koalicioni”, tha Afrim Demiri.

“LDK është partia e vetme shtetformuese dhe më vjen keq që me një kulturë të tillë politike krerët e saj nuk e gjejnë një zgjidhje në raport me Vetëvendosjen. Në anën tjetër, VV është parti e pa provuar në pushtet dhe është dashur të gjej një gjuhë të kompromisit, sovrani i ka dhënë përparësi por është një hipokrizi e pashpjegueshme nga ana e LDK-së që ta shantazhoj partnerin që mendon të qeverisë, në anën tjetër është e pakuptimtë kryeneçësia e VV-së që nuk don të lëshoj pe në raport me LDK-në, është e vërtet se në politikë mund të kërkosh atë që mundesh dhe don, por mund ta marrësh atë që të takon. Shembull pozita e Vjosës, LDK-në e ka shpëtuar Vjosa Osmani dhe tani paralizohet ajo”, tha Zhinipotoku.

Ngërç në këto negociata ka krijuar posti i presidentit. Sipas Demirit dhe Zhinipotokut, LDK-ja duhet të heq dorë nga kërkesa që të marrë presidencën, pasi kjo çështje është e hershme, por edhe Vetëvendosje duhet të heq dorë nga kryeneçësia.

“Ne presidentin e kemi, kërkesa e tashme për president është e hershme dhe në këtë kuptim mund ta akuzojmë LDK-në, por në anën tjetër shpërthimi i një fjalori të padurueshëm të LVV-së me atë që pretendon ta ketë si partner nuk reflekton që VV-ja si parti që do të qeverisë me vendin ka mundësi të lirohet nga një fjalor përbuzës në raport me të tjerët. Unë mendoj që politanizmi politik është një pengesë e VV-së për të bashkëqeverisur derisa një oportunizëm apo një kërkësë klanore e LDK-së mund të jetë pengesë për arritjen e qëllimit të përbashkët. Humbjet do të jenë të mëdha nëse nuk do të bëhet, por edhe nëse bëhet duke mos formuar një qeveri homogjene”, tha Demiri.

“Si parti e dytë LDK-ja do të duhej të ishte e kënaqur me pozitën e kryeparlamentarit dhe 5 ministrive, le të merren vesh me një pikë për zgjedhjen e presidentit që do të vie pas 2 vjetësh, por jo të bëhet mollë sherri kjo pikë. Ata duhet ta dinë se nuk i kanë votat me formu qeverinë ende dhe duhet të vrapojnë të sigurojnë vota, në vend të kësaj këta janë kapur mes vete. Unë mendoj se LDK-ja duhet të tërhiqet kësaj here, por edhe LVV nuk duhet të jetë kryeneçe”, tha Zhinipotoku.

Zgjedhjet e mbajtura më 6 tetor e kanë nxjerrë Lëvizjen Vetëvendosje si parti fituese, duke u pasuar nga Lidhja Demokratike e Kosovës. Këto dy parti politike, gjatë mandatit të kaluar ishin në opozitë.

Kosovë

Millorad Gjokoviq dënohet me 10 vjet burgim për krime lufte në rajonin e Pejës

Published

7 hours ago

21 October, 2026

Redaksia

Gjykata Themelore në Prishtinë ka shpallur fajtor dhe dënuar me dhjetë vjet burgim Millorad Gjokoviqin për krime lufte në Ozdrim dhe në fshatrat përreth në rajonin e Pejës.

Gjokoviq i njohur me nofkën “Mici” nga fshati Vitomiricë i Pejës, u arrestua në qershor të vitit 2022 .

Në aktakuzën e ngritur në qershor të vitit 2023 nga Prokuroria Speciale e Kosovës, thuhet se më 7 maj të vitit 1999, i pandehuri Gjokoviq së bashku me pjesëtarë të tjerë të forcave policore dhe ushtarake serbe, ka marrë pjesë në vrasje, tortura, arrestime, maltretime, dëbime dhe akte të tjera çnjerëzore ndaj civilëve shqiptarë.

Gjithashtu sipas aktakuzës, gjatë ofensivës në Ozdrim, pos forcave të rregullta ushtarake kishin marrë pjesë edhe grupe paramilitare, të përziera edhe me pjesëtarë të njësive speciale ushtarake kur edhe u vranë 6 civilë shqiptarë, 3 të tjerë të plagosur janë ekzekutuar pasi ishin trajtuar në spital, ndërsa 5 persona vazhdojnë të jenë edhe sot të zhdukur.

Kosovë

Hamza jep dorëheqje nga posti i kreut të PDK-së

Published

7 hours ago

21 October, 2026

Redaksia

Bedri Hamza njoftoi se ka dhënë dorëheqje të parevokueshme nga posti i kryetarit të Partisë Demokratike të Kosovës, më pak se një vit pasi mori drejtimin e partisë.

Gjatë një konference për media, Hamza tha se vendimi është i menduar mirë dhe se beson që zgjedhjet e brendshme partiake do të japin hapësirë që të rinjtë të kontribuojnë në PDK, fuqinë e dytë politike në vend.

“Nuk po largohem nga PDK-ja. Po largohem vetëm nga pozita e kryetarit, por jo edhe nga besimi në vlerat tona politike. Nga sot, e derisa të kem jetë, do të jem votues besnik i PDK-së dhe anëtar i kësaj familjeje të madhe politike, i gatshëm të kontribuoj për të”, tha Hamza.

Ai tha se beson se nga procesi i brendshëm zgjedhor, PDK-ja të dalë “më e fortë dhe më e konsoliduar”. Hamza nuk dha detaje se kur pritet të mbahet ky proces.

Gjatë fjalës së tij, Hamza tha se priste që pas 16 shtatorit drejtimin e partisë ta merrnin ish-udhëheqësit e PDK-së dhe Ushtrisë Çlirimtare të Kosovës, tashmë të dënuar në shkallë të parë për krime lufte nga Dhomat e Specializuara të Kosovës në Hagë.

Hamza u shpreh se aktgjykimi dënues i 16 shtatorit ndaj ish-presidentit Hashim Thaçi, ish-kryeparlamentarëve Kadri Veseli dhe Jakup Krasniqi si dhe ish-deputetit Rexhep Selimi ishte një “padrejtësi e madhe ndaj popullit të Kosovës”.

Ai po ashtu e cilësoi 16 shtatorin si “një nga ditët më të rënda të jetës sime, një nga ditët më të rënda për Kosovën”, por shtoi se do të vazhdojnë përpjekjet për drejtësi.

Hamza mori drejtimin e PDK-së më 17 nëntor 2025, disa ditë pasi Memli Krasniqi dha dorëheqje nga kreu i partisë.

Në ditën kur u zgjodh udhëheqës partiak, Hamza premtoi se do të mbante të bashkuar subjektin politik dhe se PDK-ja do të ishte e hapur për njerëz të rinj.

Ai u zgjodh në konventën partiake pa kundërkandidat, ndonëse Enver Hoxhaj kishte shprehur ambicie për garën për të parin e partisë. Megjithatë, Hoxhaj kishte kërkuar që konventa të mbahej një javë më vonë dhe nuk mori pjesë në garë duke u thirrur në “kushte të pabarabarta”.

Hamza ka qenë kandidat për kryeministër i PDK-së në zgjedhjet e shkurtit dhe dhjetorit të vitit 2025 dhe të qershorit të këtij viti. Në të tri palë zgjedhjet, partia e Hamzës doli fuqia e dytë politike.

Në zgjedhjet e fundit, ato të qershorit, nën drejtimin e Hamzës, PDK-ja fitoi 19.44 për qind të votave. Ndërkaq, në zgjedhjet e dhjetorit të vitit paraprak, ky subjekt fitoi 20.19 për qind të votave, ndërkaq në shkurt të vitit 2025 arriti të fitonte 20.95 për qind. Të tri palë zgjedhjet i fitoi Lëvizja Vetëvendosje e kryeministrit Albin Kurti.

Duke folur për ciklet e njëpasnjëshme zgjedhore, Hamza tha se mandati i tij në krye të PDK-së nuk ishte i zakonshëm dhe se votimet e shpeshta nuk ofruan hapësirë të duhur për konsolidimin e brendshëm të partisë.

Në të kaluarën, Hamza ka qenë ministër i Financave si dhe kryetar i Mitrovicës së Jugut.

| Radio Evropa e Lirë

Kosovë

Arrestohen dy persona dhe konfiskohen mbi 50 kg marihuanë

Published

4 days ago

17 October, 2026

Redaksia

Pas hetimeve disa mujore lidhur me rastin e koduar “MALI”, Policia e Kosovës ka arrestuar personat me inicialet B.A.(1988) dhe S.H. (1974), të dyshuar për posedim dhe trafikim të lëndëve narkotike si dhe ka konfiskuar 50 kilogramë lëndë narkotike të llojit marihuanë.

Sipas njoftimit, arrestimi ka ndodhur më 16.10.2026 në Gjilan.

“Hetimet lidhur me këtë rast janë zhvilluar nën dyshimin se persona të dyshuar janë të përfshirë në veprën penale ‘Blerja, posedimi, shpërndarja dhe shitja e paautorizuar e narkotikëve substancave psikotrope dhe analoge’, gjegjësisht janë duke bërë përgatitjet për transport jashtë vendi të lëndëve narkotike.

Në kuadër të operacionit janë kontrolluar dy shtëpi dhe objekte përcjellëse. Gjatë kontrollit, në njërën prej veturave (në bagazh) është gjetur dhe konfiskuar substancë,- dyshohet të jetë narkotike e llojit marihuanë, me vlerë në tregun vendor rreth 80,000 (tetëdhjetë mijë) euro.

Në cilësinë e provave materiale janë gjetur dhe sekuestruar dëshmitë:

• 53 kilogramë substancë, dyshohet të jetë narkotike e llojit marihuanë;

• 2 telefona mobil dhe

• 2 automjete me targa vendore.

Operacioni është mbështetur në terren nga dy ekipe të Njësisë së Reagimit të Shpejtë (NJRSH) – Gjilan, si dhe nga Njësia e Forenzikës Rajonale Gjilan, e cila ka bërë fotografimin, evidentimin dhe tërheqjen e dëshmive nga vendi i ngjarjes.”

Të dyshuarit pas intervistimit në prezencë të avokateve mbrojtës, me vendim të prokurorit të shtetit, janë ndaluar për 48 orë për procedura të mëtejshme ligjore.