Ferizaj

18 vjeçarja hap biznes në Ferizaj

Published

7 years ago

19 December, 2019

Të nisësh një biznes nuk është aq e thjeshtë, e aspak e lehtë nuk është për të rinjtë. Megjithatë ka edhe nga ata që i tejkalojnë barrierat që paraqiten gjatë krijimit dhe menaxhimit të një biznesi. 18 vjeçarja Leona Jahiri nga Ferizaj, ka hapur biznesin e saj në të cilin ofrohen ushqime tradicionale dhe ëmbëlsira të ndryshme.

Ajo thotë se qysh në fëmijëri kishte pasion gatimin, duke e vazhduar atë edhe me shkollim.

“Biznesi “Lonki’s Cake” ka filluar para dy viteve, ndërsa unë e kam përfunduar shkollën profesionale në drejtimin asistente e sigurisë ushqimore dhe dieta dhe kam pasur gjthmonë dëshirë me përgatitë ushqim dhe për herë të parë e kam hapur vetëm një faqe në rrjete sociale me i postu fotografitë e ushqimeve që i përgatisja unë sa për hobi dhe prej asaj njerëzit kishin interesim për ato produkte dhe filluan të bëjnë porosi dhe nga aty kemi filluar të punojmë nga shtëpia me pajisje të vogla të shtëpisë dhe klientët filluan t’i pëlqejnë ushqimet dhe pamë që nga shtëpia nuk mjafton dhe duhet me bë diçka pak më shumë”, tha Jahiri.

Nga një punëtori familjare, Leona tani ka punësuar 7 punëtorë.

“Në momentin që doja ta hap nuk dëshiroja të punësoja njerëz që janë më të rritur, por me i inkuadru shokët dhe shoqet e mija dhe u bë ajo që sot krejt punëtorët që janë shoqet e mija që e kanë përfundu të njëjtin drejtim me mua. Unë edhe më herët jam marrë me punë vullnetare dhe gjithmonë kam dashur që kur të bëj punë me bë me të gjitha, kur e hapëm lokalin kemi dashur me bë menjëherë regjistrimin, me i posedu të gjitha certifikatat e sanitarisë, që me qenë një biznes, por edhe një shembull për të tjerët”, tha Jahiri.

Leona e cila studion menaxhment dhe turizëm, synon që në të ardhmen të zgjeroj biznesin e saj.

Ferizaj

Bëhet i ditur identiteti i viktimave të aksidentit tragjik në Gjermani

Published

1 day ago

07 August, 2026

Redaksia

Në aksidentin tragjik të komunikacionit, që ndodhi ditë më parë në afërsi të Nittendorfit, në rajonin e Regensburgut në Bavari, humbën jetën Tahir Tahiri, 61 vjeç, Gentian Tahiri, 34 vjeç dhe Laurent Aliu, 16 vjeç, që të tre nga lagjja Nuhaj e fshatit Komogllavë të Ferizajt.

Identiteti i të ndjerëve u bë i ditur në njoftimin mortor të publikuar në faqen e fshatit Komogllavë, ku më tej thuhet se data dhe koha e ceremonisë së varrimit do të bëhet e ditur sapo të merren vendimet përkatëse.

Të ndjerët humbën jetën teksa po ktheheshin nga Kosova drejt vendit ku jetonin në Gjermani.

Ferizaj

Arrestohen tre persona të dyshuar për trafikim të narkotikëve në Ferizaj

Published

1 day ago

07 August, 2026

Redaksia

Policia e Kosovës ka ndaluar tre persona në Ferizaj, nën dyshimin për blerjen, posedimin, shpërndarjen dhe shitjen e paautorizuar të narkotikëve, si dhe mbajtjen në pronësi të paautorizuar të armës.

Të dyshuarit u arrestuan të enjten, rreth orës 18:30, në Ferizaj derisa gjatë kontrollit u janë gjetur dhe konfiskuar substanca të dyshuara narkotike, përfshirë 485.27 gramë marihuanë, 181.7 gramë hashash dhe 2.1 gramë kokainë, para të gatshme, një pistoletë me gaz me një karikator dhe tri boca gazi.

Me vendim të prokurorit të shtetit, tre të dyshuarit, pas intervistimit nga Policia, janë dërguar në mbajtje për 48 orë.

Ferizaj 06.08.2026 – 18:30.

“Janë ndaluar tre të dyshuar meshkuj kosovarë, gjatë kontrollimit tek personat e dyshuar janë gjetur dhe konfiskuar: substancë e llojit Marihuanë rreth 485.27 gramë, substancë e dyshuar e llojit Hashash e gjetur në dy pjesë me peshë 181.7 gramë , substancë e dyshuar e llojit Kokainë 2.1 gramë, para të gatshme. një pistoletë me gaz me një karikator dhe tri boca gazi. Paketime të zbrazëta të qeseve të najlonit, dy peshore njëra digjitale dhe tjetra me tërheqje, dy mulli (grindera) për bluarje, tetë telefona celularë të llojeve të ndryshme, një DVR i kamerave. Me vendim të Prokurorit tre personat e dyshuar pas intervistimit dërgohen në mbajtje për 48 orë”, bëri të ditur Policia në raportin 24 orësh.

Ferizaj

Qytetarëve u vijnë mesazhe mashtruese – Policia apelon për kujdes

Published

3 days ago

05 August, 2026

Redaksia

Drejtoria Rajonale e Policisë në Ferizaj ka njoftuar se ditëve të fundit, disa qytetarëve u kanë ardhur mesazhe (SMS) mashtruese kinse të dërguara në emër të Policisë së Kosovës duke pretenduar se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesën e tyre.

Sipas Policisë, këto mesazhe janë të rreme dhe nuk janë dërguar nga institucionet e rendit dhe ligjit, pra janë mesazhe të dërguara si tentativë për mashtrim.

Policia paralajmëron qytetarët që nëse pranojnë ndonjë e-mail apo mesazh të dyshimtë, të veprojnë si në vijim:

Mos klikoni në linkun e dyshimtë;

Mos i jepni të dhëna personale apo bankare;

Mos kryeni pagesa përmes lidhjeve të dërguara me SMS;

Raportojeni rastin në stacionin më të afërt policor;

Kontaktoni bankën tuaj nëse keni ndarë të dhëna personale ose bankare;

Fshijeni menjëherë mesazhin e dyshimtë;

Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192.

Drejtoria Rajonale e Policisë në Ferizaj apelon për kujdes të shtuar ndaj mashtrimeve online dhe bashkëpunim me policinë për parandalimin e tyre.