Ferizaj

”Bashkimi i Qytetit” parasheh rrënimin e objektit të shoqatave ”Handikos” dhe ”Hendifer”

Published

6 years ago

10 January, 2020

Objekti i shoqatës për persona me aftësi të kufizuara “Hendifer” në Ferizaj, do të rrënohet për t’i lënë vend ndërtimit të një parku dhe një rrethrrotullimi që parashihen të realizohen në kuadër të projektit “Bashkimi i Qytetit”. Megjithëkëtë, kryetarja e shoqatës “Hendifer” Fazile Bungu, thotë se akoma nuk kanë marrë njoftim zyrtarë nga komuna se ku do të zhvendoset kjo shoqatë.

“Unë fillimisht nuk e di pse e quajnë “Bashkimi i Qytetit” qyteti është një, nuk është në dy pjesë i ndarë, mirëpo ata kanë vendosur që të rrënojnë këtë objekt, kur do ta rrënojnë nuk e dimë, me shkrim nuk kemi ende asgjë nga Kuvendi Komunal, mirëpo Kuvendi Komunal është shtëpia jonë ku ata vendosin për të gjitha, ata mendojnë se këtu duhet të bëjmë një gjelbërim, ku për qytetarët do të jetë më mirë, mirëpo për antarët tonë është pak më vështirë nëse nuk do të kemi një hapësirë të mjaftueshëme për të zhvilluar aktivitetet e tyre. Jemi njoftuar gojarisht, mirëpo ende diçka konkrete nuk ka. Ne vetëm kemi dhënë sugjerime që hapësira nën 100 metra katrorë nuk na mjafton dhe asgjë më tepër dhe ata tash e bëjnë përzgjedhjen”, tha Fazile Bungu.

Ndërsa, drejtori i Kadastrit, Gjeodezisë dhe Pronës në komunën e Ferizajt, Sabri Murseli, tha se janë duke bërë përpjekje për gjetjen e një lokacioni të përshtatshëm.

“Komuna e Ferizajt veçse i ka njoftuar në disa takime në ditët e kaluara që kanë qenë, kemi provuar të sigurojmë disa lokacione, mirëpo në aspektin e pronës komunale për momentin e kemi të pamundur që t’iu sigurojmë një lokacion, sepse komuna e Ferizajt nuk ka një vend të caktuar që i përshtatet kategorisë së tyre, kemi bërë përpjekje për disa lokale që janë pronë private, i kemi bërë disa vizita, kemi shikuar lokalet, tani janë duke i monituruar, janë duke i shikuar sa i përshtaten kategorisë që i takojnë”, tha Sabri Murseli.

Udhëheqësja e ”Hendifer”-it, Fazile Bungu, shpreson që objekti i cili do t’iu ofrohet të ketë kushte të mira dhe të përshtatshme për anëtarët e kësaj shoqate.

“Shpresoj që do të na e gjejnë një objekt i cili do t’i plotësoj kushtet për zhvillimin e aktiviteteve tona dhe për natyrën e anëtarëve tanë që ata e kanë, ku do të ketë qasje për ta, ku do të ketë një parking, ku do të ketë kushte më të mira dhe besoj që do të punohet njësoj siç kemi punuar edhe këtu, ndoshta edhe më mirë”, tha Fazile Bungu.

Drejtori Murseli tha se kjo zhvendosje do të jetë e përkohshme, pasi që për ndërtimin e objektit të shoqatës “Hendifer”, do të ndahet një parcelë prej 10 ari afër gjimnazit “Kuvendi i Arbërit”.

Ferizaj

Aktakuzë ndaj dy personave për vrasjen e kryer vjet në Bibaj të Ferizajt

Published

9 hours ago

18 July, 2025

Redaksia

Prokuroria Themelore në Ferizaj ka ngritur aktakuzë kundër F.R., dhe J.M., nga Ferizaj, për vrasjen e një personi në oborrin e një salle dasmash në Bibajt të Ferizajt, më 16 gusht 2024.

Sipas prokurorisë, i akuzuari F.R ,me dashje dhe me qëllim të hakmarrjes, e ka qëlluar me breshëri plumbash viktimën S.S., duke e lënë të vdekur në vend, kurse J.M. akuzohet për ndihmë në këtë vrasje.

“Ekziston dyshimi i bazuar “se i pandehuri F.R., më 16 gusht 2024, rreth orës 19:21, në parkingun e restorantit “Fron Palace”, në fshatin Bibaj, komuna Ferizaj, gjatë një ceremonie martesore, me dashje dhe paramendim, me qëllim hakmarrjeje për motive të pretenduara familjare të pabazuara dhe të pakonfirmuara juridikisht, në prani të dhjetëra personave përfshirë të mitur, me armë zyrtare automatike të policisë, me dashje dhe qëllim të privimit nga jeta, me breshëri plumba shtien në drejtim të viktimës S.S., duke e privuar nga jeta, ku, si pasojë e të shtënave është rrezikuar seriozisht edhe siguria e personave tjerë të pranishëm në atë moment, me këtë veprim kreu veprën penale të ”Vrasjes së rëndë” nga neni 173 paragrafi 1, nën paragrafi 1.8 dhe 1.11 të Kodit Penal të Republikës së Kosovës.” – thotë Prokuroria.

Kurse, J.M., akuzohet se me dashje e ka ndihmuar policin në privimin nga jeta të viktimës S.S., ashtu që i pajisur me mjet të forta, ka mbrojtur perimetrin e sulmit dhe ka parandaluar çdo ndërhyrje, në mënyrë që i akuzuari F.R., të realizonte pa pengesë veprën penale të vrasjes së rëndë.

Ferizaj

Policia e Ferizajt pezullon 20 patentë shoferë brenda një jave

Published

4 days ago

14 July, 2025

Redaksia

Policia Rajonale e Ferizajt ka njoftuar se gjatë javës së kaluar, nga data 07-13.07.2025, janë shqiptuar 1,681 gjoba kundërvajtëse, si dhe janë pezulluar 20 patentë-shoferë për drejtuesit e mjeteve që kanë kryer shkelje të rënda në trafik.

Gjatë kësaj periudhe janë regjistruar gjithsej 40 aksidente, nga të cilat 22 aksidente me lëndime, ku kanë mbetur të lënduar 29 persona kurse 18 aksidente ishin vetëm me dëme materiale

Policia Rajonale e Ferizajt bëri të ditur do të vazhdojë me aktivitete të shtuara për të parandaluar aksidentet derisa ka apeluar tek të gjithë drejtuesit e automjeteve që të respektojnë rregullat e trafikut.

Ferizaj

Zbulohen pesë emigrantë në një kamion në Terminalin Doganor në Ferizaj

Published

6 days ago

12 July, 2025

Redaksia

Policia e Kosovës ka gjetur 5 emigrantë të paligjshëm në një rimorkio kamioni në Terminalin Doganor në Ferizaj.

Sipas policisë, tre nga emigrantët e zbuluar janë të moshës 17 vjeç, një 18 vjeç dhe një 28 vjeç.

“Sot, më datë 11.07.2025, rreth orës 16:00, policia ka pranuar një informatë se në Terminalin Doganor, në rrugën “Driton Islami” në Ferizaj, në një rimorkio të një kamioni me targa vendore, sipas zyrtarëve doganorë, dyshohej se ndodheshin disa emigrantë të paligjshëm.

Menjëherë pas pranimit të informacionit, në vendngjarje kanë dalë njësitë reaguese dhe Njësia e Hetimeve nga stacioni policor në Ferizaj. Pas hapjes së bllokadave të rimorkios, janë hasur pesë emigrantë: tre prej tyre 17 vjeç, një 18 vjeç dhe një 28 vjeç, të cilët nuk posedonin dokumentacion identifikues.

Lidhur me rastin janë njoftuar prokurori kujdestar dhe njësia për migrim, të cilët kanë dalë në vendin e ngjarjes dhe kanë marrë në trajtim të mëtejshëm të dyshuarit, si dhe drejtuesin e kamionit, shtetasin kosovar B.B., 38 vjeç.” thuhet në njoftimin e policisë.