Ferizaj

Aliu pret përkrahje nga qeveria e re e Kosovës

Published

6 years ago

18 February, 2020

Kanë kaluar më shumë se dy javë që nga formimi I Qeverisë së re të Kosovës me kryeministër Albin Kurti. Këtë ndryshim në vend, kryetari i qytetit të Ferizajt, Agim Aliu e vlerëson si të mirë duke thënë se bashkëpunimi me qeverinë e re për realizmin e projekteve në zhvillim e sipër do të vazhdojë. Ai njoftoi se në Qeveri tashmë kanë dërguar projektet për të cilat Ferizaj ka nevojë të financohen nga buxheti i ri i Kosovës.

“Njëra nga punët prioritare që e pret qeverinë e re, që në fakt lidhet shumë edhe me angazhimet që kemi ne si qeveri lokale, është miratimi i ligjit të buxhetit për vitin 2020 që pastaj e hap perspektivën për inicimin e procedurave, respektivisht për zhvillimin e projekteve, por gjithsesi është lajm i mirë themelimi i qeverisë dhe ne presim që të bashkëpunojmë ngushtë me qeverinë e re edhe me Kuvendin e Republikës së Kosovës”, tha Agim Aliu.

Për projektin e shumëpërfolur i cili është në realizim e sipër, “Bashkimi i qytetit”, Aliu tha se synon që ai të përfundoj brenda këtij mandati qeverisës.

“Kemi dashur dhe duam që të dëshmojmë para qytetarëve ferizajas dhe para publikut se ne i fillojmë projektet dhe i mbarojmë brenda një mandati dhe njëkohësisht tregojmë edhe për projektet tjera të cilat do të jenë pjesë jo e premtimeve elektorale që janë tejkalim i asaj që ne e kemi premtuar, që të jenë pjesë e realizimit të mandatit vijues tonë, sigurisht pas marrjes në zgjedhjet e ardhshme, por me rëndësi është që t’iu themi qytetarëve se këto projekte do të kenë vijimësi, do të kenë mbështetjen e duhur që të përfundohet në mënyrë të veçantë edhe projekti “Bashkimi i qytetit” pavarësisht dashakeqësisë së caktuar të individëve dhe të grupeve qofshin ato politike apo jo politike”, tha Agim Aliu.

Kryetari i Ferizajt tha se pret mbështetje nga deputetët e rinj që përfaqësojnë qytetin në Kuvendin e Kosovës.

“Pres më shumë edhe nga deputetët e rinj të cilët e kanë përvojën e parë si deputetë që të tregohen dhe të dëshmohen të kthyer me besim pranë atyre që u kanë besuar duke mbështetur projektet që unë i kam dorëzuar tek ata. Unë po besoj që ata do të mbështesin edhe projektet të cilat edhe ata kanë mundur t’i kenë shpalosur para qytetarëve në mënyrë që të kemi një agjendë të qartë se Ferizaj është shumëngjyrësh dhe është i të gjithëve”, tha Agim Aliu.

Në legjislaturën e re, Ferizaj është i përfaqësuar me 8 deputetë, ku 4 nga ta i përkasin Lëvizjes Vetëvendosje, 1 nga LDK dhe 3 nga PDK.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

1 week ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

2 weeks ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

2 weeks ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim