Ferizaj

Fehmi Mehmeti zgjedhet kryetar i KBI-së në Ferizaj

Published

6 years ago

24 February, 2020

Fehmi Mehmeti është zgjedhur kryetar i Këshillit të Bashkësisë Islame në Ferizaj, pas një procesi zgjedhor që ka mbajtur ky institucion javë më parë.

Edhe pse para se të mbahej procesi zgjedhor, brenda Këshillit të Bashkësisë Islame në Ferizaj u patën shprehur kritika të shumta për këtë proces, Mehmeti e cilësoi atë si të rregullt, duke thënë se teksa do të jetë në krye të këtij institucioni fetar ka synim të ndërtoj xhamia aty ku ato mungojnë.

“Zakonisht kryetarët e KBI-së i kanë punët e ditura, punët tona janë organizmi i jetës fetare, besoj që puna jonë vazhdon aty ku e ka lënë ish-kryetari, do të mundohemi që të jemi më afër me xhemat, do të mundohemi të rregullojmë infrastrukturë të Bashkësisë Islame, kam për qëllim ndërtimin e disa xhamive në disa fshatra dhe në qytet aty ku nuk ka, duke u munduar të gjejmë donacione të ndryshme për ndërtimin e tyre”, tha Mehmeti.

Mehmeti, tha se do të vazhdoj të ruaj tolerancën ndërfetare e cila mbizotëron në qytetin e Ferizajt.

“Nuk ka dyshim, Ferizaj gjithmonë është marrë shembull për shkak të historisë që ka, që në një oborr është kisha dhe xhamia, toleranca gjithmonë ka qenë dhe do të vazhdoj patjetër, kemi pasur bashkëpunim të mirë me kishën katolike, por edhe me fqinjët që e kemi këtu kemi pasur takime me ta, nuk kemi pasur asgjë të keqe, shpresoj që do ta vazhdojmë prapë“, tha Mehmeti.

Mehmeti, në krye të këtij institucioni fetar ishte edhe para 4 viteve, ku ka drejtuar Këshillin e Bashkësisë Islame në Ferizaj dy mandate radhazi. Ai në këto zgjedhje mori 81 vota nga 153 delegatë sa ishin gjithsej, ku bashkë me të janë zgjedhur edhe 9 anëtarë të rinj.

Ferizaj

Ndërroi jetë artisti dhe koreografi i shquar ferizajas, Bajram Tahiri

Published

2 days ago

03 February, 2026

Redaksia

Ka ndërruar jetë Bajram Tahiri, artist, valltar dhe koreografi i shquar i ansamblit “Kastriotët” në Ferizaj.

I ndjeri gjithë jetën e tij artistike ia kushtoi ruajtjes dhe begatimit të traditës dhe trashëgimisë kulturore, fillimisht si valltar pastaj edhe si koreograf i A.K.V ,,Kastriotët” Ferizaj.

Për një periudhë kohore, nga viti 1999-2009, Tahiri ishte Drejtor Operativ në KRM “Pastërtia”, pastaj nga viti 2017 deri në vitin 2020 shërbeu si këshilltar politik në Ministrinë e Tregtisë dhe Industrisë, derisa nga viti 2010 udhëhoqi me kompaninë “Mbrojtja e Ambientit”.

Mbledhja komemorative për artistin e ndjerë, Bajram Tahiri, mbahet më 3 Shkurt 2026, ora 14:00 në Teatrin “Adriana” kurse ceremonia e varrimit nga ora 15:30 në varrezat e reja të qytetit.

Ferizaj

Ngritët aktakuza e parë për zgjedhjet e 28 dhjetorit

Published

2 weeks ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

2 weeks ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.