Ferizaj

Shpërndahen 250 pako ushqimore për familjet skamnore në Ferizaj

Published

6 years ago

18 March, 2020

Virusi COVID-19 ka bërë që qytetarët të rrisin furnizimet me ushqime esenciale, mirëpo një gjë të tillë nuk po mund ta bëjnë edhe familjet në nevojë.

Derisa komuna e Ferizajt nuk ka rezerva, disa biznese kanë shprehur vullnetin që të bashkëpunojnë me komunën për të shpërndarë pako ushqimore për familjet skamnore.

“Në këtë rast është menduar për të gjitha skemat sociale të ndjeshme, tash për tash janë shpërndarë ndihma për një numër të caktuar për këto familje dhe presim që gjatë ditës të shpërndahen 250 pako për familjet skamnore përmes “Viva Fresh” që është donator. Ne si komunë po presim përkrahje edhe nga Qeveria e Kosovës në mënyrë që të shpërndajmë ndihma për familjet në nevojë tash kur vet po apelojmë që të ketë izolim të qytetarëve”, tha Albion Sherifi, zyrtar për marrëdhënie me publikun në kabinetin e kryetarit të komunës.

Sa i përket masave parandaluese për përhapjen e koronavirusit, Sherifi tha se në Ferizaj në vazhdimësi është duke u bërë dezinfektimi i hapësirave publike, por edhe qytetarët janë duke i respektuar masat e ndërmarra si nga niveli qendror, ashtu edhe nga ai lokal. Ai tha se deri më tani në Ferizaj nuk është paraqitur asnjë rast me këtë virus.

“Ekipet e dezinfektimit janë në të gjitha anët e Ferizajt për të bërë dezinfektimin e rrugëve më të frekuentuara, por kjo do të vazhdoj edhe në rrugë të tjera për të shmangur përhapjen e pandemisë globale. Përveç masave të propozuara nga ana e Qeverisë, komuna e Ferizajt ka ndërmarrë masa që të ndaloj edhe transportin e taksive si masë për të parandaluar përhapjen e virusit, nëse ka raste të tilla në Ferizaj. është fat i mirë që sot në takimin e Këshillit Emërgjent konstatohet se Ferizaj nuk ka asnjë rast me korona dhe kjo është meritë edhe e qytetarëve që po u përgjigjen thirrjes për të qëndruar në shtëpi”, tha Sherifi.

Sherifi tha se edhe Inspektorati i komunës është vazhdimisht në terren duke kontrolluar operatorët ekonomik, ku gjobat ndaj abuzuesve të çmimeve nuk janë duke munguar.

Ferizaj

Ngritët aktakuza e parë për zgjedhjet e 28 dhjetorit

Published

1 week ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

2 weeks ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.

Ferizaj

Për manovra të rrezikshme ndëshkohen 7 shoferë në Ferizaj

Published

3 weeks ago

12 January, 2026

Redaksia

Policia në Ferizaj ka njoftuar se gjatë kontrolleve të realizuara në pika të ndryshme të qytetit, kanë identifikuar dhe ndëshkuar tetë shoferë për shkelje të rënda në komunikacion.

Sipas njoftimit, 7 shoferë janë ndëshkuar, sepse kanë kryer manovra të rrezikshme, përfshirë rrëshqitjen e gomave me frenë dore, ndërsa një shofer është ndëshkuar për qarkullim me automjet me afat të skaduar të regjistrimit.

Për këto kundërvajtje, shtatë shoferëve u është shqiptuar gjobë nga 150 euro dhe nga një (1) pikë negative secilit.

Të ndëshkuarit janë:

V.H. (31 vjeç), me veturë Mercedes-Benz, ngjyrë hiri, me targa vendore

B.R. (30 vjeç), me veturë BMW XM, ngjyrë e kaltër, me targa vendore

D.B. (21 vjeç), me veturë Audi, ngjyrë e bardhë, me targa vendore

B.B. (22 vjeç), me veturë VW Golf, ngjyrë e bardhë, me targa vendore

B.I. (20 vjeç), me veturë Opel, ngjyrë hiri, me targa vendore

L.S. (31 vjeç), me veturë Audi, ngjyrë e bardhë, me targa vendore

L.A. (32 vjeç), me veturë BMW, ngjyrë e bardhë, me targa vendore

Ndërsa shoferi A.G. (29 vjeç), me veturë Ford, ngjyrë e gjelbër, me targa vendore, është ndëshkuar pasi automjeti kishte afat të skaduar të regjistrimit që nga data 02.12.2025.

Atij i është shqiptuar gjobë prej 200 euro dhe automjeti i është konfiskuar përkohësisht.