Ferizaj

Disa fshatra të Ferizajt vazhdojnë të përballen me mungesë të ujit të pijes

Published

6 years ago

16 April, 2020

Fshatrat të cilat shtrihen në veri-perëndim të Ferizajt, Kosharja, Kosina, Lloshkobarja e Slivova, ka vite që përballen me mungesë të ujit të pijes, përkundër që në këto lokalitete është i instaluar ujësjellësi. Në këto ditë pandemie problemi për ujë në këto fshatra është shtuar edhe më shumë, për shkak se banorët e asaj pjese furnizohen me ujë nga çezma tek pallati i sporteve “Bill Clinton” në Ferizaj, gjë të cilën nuk po mund ta bëjnë edhe këto ditë.

Përfaqësuesi i fshtatit Koshare Sadik Qerimi, thotë se përveç që nuk është i pijshëm uji që vjen nga ujësjellësi, po kanë probleme edhe me furnizim.
“Prej 2011 është vendosur ujësjellësi, mirëpo problemi është që shpesh ka ndodhë që edhe kur ka pas ujë ka ardhur i ndotur, po ashtu gjatë sezonës së verës nuk ka ujë vetëm atëherë kur ka shi, nuk e dimë a është për shkak të thatësisë apo keqpërdorimeve, me rëndësi është se ka shumë telashe prej se është instaluar ka probleme. Ne kemi bërë kërkesë, kryetari na ka premtuar se në këtë vit do të intervenoj, të kyqemi ose nga Dramjaki sidomos për neve Kosharen dhe Slivovën që me u kyq në këtë pjesë”, tha Qerimi.

Në kompaninë e ujit “Bifurkacioni”, thonë se e kanë ndalur ujin tek palestra e sporteve me kërkesë të Policisë, në mënyrë që mos të krijohet grumbull i qytetarëve aty. E, për t’i furnizuar me ujë këto fshatra ata thanë se janë duke u munduar t’iu bëjnë zgjidhje përmes reduktimeve.

“Ajo pjesë ka mungesë të ujit, pasi burimet e ujit nuk janë të mjaftueshme për komplet zonën, por ne kemi filluar me reduktime të ujit kohën e natës me arsyetime që të mbushet rezervuari natën mandej ata mund ta shfryëzojnë ujin ditën. Por, është menduar edhe për atë pjesë, ne së bashku me komunën vetëm se e kemi hartuar një projekt për hapjen e një pusi dikund në Saraishtë, komuna ka mbetur që t’i vazhdoj procedurat e prokurimit dhe kështu të zgjidhet edhe problemi i ujit aty”, tha Valdet Syla.

Kompania “Bifurkacioni” u bën apel të gjithë konsumatorëve të mos e keqpërdorin ujin, pasi rreziku për të mbetur pa të është shumë i lartë. Po ashtu, ata kërkuan nga qytetarët që t’i shlyejnë borxhet ndaj kësaj kompanie.

Ferizaj

Ngritët aktakuza e parë për zgjedhjet e 28 dhjetorit

Published

7 days ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

1 week ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.

Ferizaj

Për manovra të rrezikshme ndëshkohen 7 shoferë në Ferizaj

Published

2 weeks ago

12 January, 2026

Redaksia

Policia në Ferizaj ka njoftuar se gjatë kontrolleve të realizuara në pika të ndryshme të qytetit, kanë identifikuar dhe ndëshkuar tetë shoferë për shkelje të rënda në komunikacion.

Sipas njoftimit, 7 shoferë janë ndëshkuar, sepse kanë kryer manovra të rrezikshme, përfshirë rrëshqitjen e gomave me frenë dore, ndërsa një shofer është ndëshkuar për qarkullim me automjet me afat të skaduar të regjistrimit.

Për këto kundërvajtje, shtatë shoferëve u është shqiptuar gjobë nga 150 euro dhe nga një (1) pikë negative secilit.

Të ndëshkuarit janë:

V.H. (31 vjeç), me veturë Mercedes-Benz, ngjyrë hiri, me targa vendore

B.R. (30 vjeç), me veturë BMW XM, ngjyrë e kaltër, me targa vendore

D.B. (21 vjeç), me veturë Audi, ngjyrë e bardhë, me targa vendore

B.B. (22 vjeç), me veturë VW Golf, ngjyrë e bardhë, me targa vendore

B.I. (20 vjeç), me veturë Opel, ngjyrë hiri, me targa vendore

L.S. (31 vjeç), me veturë Audi, ngjyrë e bardhë, me targa vendore

L.A. (32 vjeç), me veturë BMW, ngjyrë e bardhë, me targa vendore

Ndërsa shoferi A.G. (29 vjeç), me veturë Ford, ngjyrë e gjelbër, me targa vendore, është ndëshkuar pasi automjeti kishte afat të skaduar të regjistrimit që nga data 02.12.2025.

Atij i është shqiptuar gjobë prej 200 euro dhe automjeti i është konfiskuar përkohësisht.