Ferizaj

Komuna e Ferizajt planifikon t’i ndihmoj bizneset e dëmtuara nga pandemia

Published

6 years ago

04 May, 2020

Gjatë një jave në komunën e Ferizajt nuk është shënuar asnjë rast me koronavirus, ndërsa janë shëruar gati se të gjithë personat e infektuar.
Kryetari i komunës së Ferizajt Agim Aliu, tha se këto janë lajme të mira për qytetarët e Ferizajt, teksa si lajmin më të mirë Aliu e cilësoi daljen e Ferizajt nga karantina.

“Gjendja në Ferizaj është e qetë dhe kjo qetësi tashmë ka një javë kur ne kemi pasur mostra që janë marrë nga qytetarët që kanë pasur kontakt me të prekurit me Covid-19 që kanë qenë pozitiv, por që fatmirësisht të gjitha këto mostra me kontakt kanë dalë negative dhe ky ka qenë lajmi i parë i mirë, ndërsa lajmi i dytë i mirë ka qenë që edhe ata që kanë rezultuar pozitiv pas dy ritestimeve kanë rezultuar shumica e tyre negativ dhe lajmi i tretë është që është hequr karantina që ne disa herë kemi kërkuar për arsye se ka qenë një lloj pengese për komunitetin e bizneseve të Ferizajt të cilët kanë pasur kërkesa që mallrat dhe shërbimet është dashur të kryhen në komuna të tjera sado që kanë pasur leje megjithatë ka qenë vështirësi dhe kjo është njëra nga gjërat pozitive”,tha Aliu.

Aliu tha se nëse bëhet kujdes nga qytetarët si Asociacion i Komunave do të propozojnë që fusha e gastronomisë dhe veprimtaritë e tjera për të cilat Ministria ka vendosur të hapen në faza më të vonshme, të zhvendosen në fazen e parë.

“Ne kemi qenë shumë dorëlirë gjatë kësaj kohe në mënyrë që mos të vëmë barrë edhe më të madhe tek veprimtaritë biznesore, por ne do të kërkojmë që të respektohen masat mbrojtëse në mënyrë që të bëjmë ndërhyrjen e intereferimit të dy fazave të mëtutjeshme, fazës 2 dhe 3, pasi ka kërkesa të vazhdueshme nga gastronomia që të zhvendosen më herët, por në rast se ne nuk i zbatojmë masat unë po besoj se mund të bëjmë hap të gabuar dhe disa veprimtari që kanë pasur të fillojnë më 18 mars mund të shtyhen, prandaj kërkoj që mos të bëhen gabime pasi jemi në fazën e fitores”,tha Aliu.

E, për t’u dalë në ndihmë biznesve kryetari i Ferizajt tha se nuk do të qëndrojnë duarkryq .

“Edhe ne nuk do të jemi duarkryq si komunë, ne tashmë kemi paralajmëruar se do të kemi një pako mbështetëse, por kjo çështje nuk varet vetëm nga unë pasi unë jam propozuesi ndërsa Kuvendi është miratuesi i këtyre vendimeve. Ne si komunë do të përgatisim atë pako që do të jetë në mundësitë tona, ajo që do të jetë në mundësinë tonë do të bëjmë lehtësira, gjithçka që është e mundur ne do ta bëjmë, do të përgadisim një pako për t’i mbështetur bizneset”,tha Aliu.

Komuna e Ferizajt kishte 98 të infektuar ku tashmë 72 prej tyre janë shëruar.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

1 week ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

1 week ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

2 weeks ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim