Ferizaj

Homazhe dëshmorëve në Ditën e Çlirimit

Published

6 years ago

12 June, 2020

Qytetarë, familjarë dëshmorësh, zyrtarë institucional e partiak, nderuan me homazhe dëshmorët e kësaj ane në 21 vjetorin e çlirimit të vendit.

Ish-zëvendëskomandanti i Zonës Operative të Nerodimes, Imri Ilazi, përshkruan momentet e para të çlirimit të Ferizajt.

“Është një ndjenjë e papërshkruar e cila të kujton shumë gjëra që kanë ndodhur gjatë vuajtjeve të popullit tonë, por dua të potencoj hyrjen tonë dhe ballafaqimin tonë të parë me popullatën ku në ato momente kanë dalë nga bodrumet me fytyra të zbehta dhe sikur hapet qielli duke filluar nga fëmijët e moshat më të shtyra dhe në ato momente kujtohet sakrifica e shumë brezave e bashkëluftëtarëve që kanë bërë dhe njëkohësisht në ato momente ka qenë prekëse mungesa e madhe e popullatës që detyrimisht ishin largar me dhunë nga Kosova. Nuk duhet parë vetëm zi ose vetëm bardh, në disa segmente të jetës sonë nuk janë përmbushur obligimet, por rekomandimi im tek të rinjtë është që le të luftojnë për vlerat, gjeneratat e reja duhet të marrin shembujt e mirë dhe të kenë parasysh edhe vuajtjet e sakrificat e së kaluarës”, tha Ilazi.

Ndërkaq, kryetari i Organizatës së Veteranëve të UÇK-së në Ferizaj Rafiz Sejdiu, tha se lufta çlirimtare e Kosovës është ngjarja më e ndritur e historisë së kombit shqiptarë.

“Populli shqiptarë ka luftuar kohë të gjatë, ka bërë rezistencë, ka bërë luftëra, por rezultati i të gjitha luftërave dhe sakrificave është lufta e UÇK-së e cila u kurorëzua me çlirimin e Kosovës, fatkeqësisht në kohët e fundit kanë dalë disa zëra që po mundohen ta përbaltojnë luftën UÇK-së siç ishte rasti i këshilltarit të kryeministrit dhe disa frikacakë mezi pritën t’i bashkëngjiten radhëve të tyre, por populli shqiptarë do t’ua tregoj vendin mendimtarëve të tillë”, tha Sejdiu.

Ndërsa, të rinjtë ferizajas thonë se do të mundohen që gjithherë t’i nderojnë dëshmorët dhe të punojnë për amanetin e tyre.

“Unë jam e re dhe nuk e kam përjetuar luftën, por më kanë treguar se si është përjetuar lufta, unë jam e lumtur që ne të rinjtë po i përkujtojmë dhe i nderojmë dëshmorët, ne mundemi t’i bëjmë krenarë të gjithë vetëm me punë të mira”, tha Pranvera Bytyqi, kryetare e të rinjve në Ferizaj.

Më 12 qershor të vitit 1999, në Kosovë zbarkuan trupat e para të këmbësorisë së NATO-s dhe njëkohësisht nisi largimi i forcave serbe.

Ferizaj

Ndërroi jetë artisti dhe koreografi i shquar ferizajas, Bajram Tahiri

Published

2 days ago

03 February, 2026

Redaksia

Ka ndërruar jetë Bajram Tahiri, artist, valltar dhe koreografi i shquar i ansamblit “Kastriotët” në Ferizaj.

I ndjeri gjithë jetën e tij artistike ia kushtoi ruajtjes dhe begatimit të traditës dhe trashëgimisë kulturore, fillimisht si valltar pastaj edhe si koreograf i A.K.V ,,Kastriotët” Ferizaj.

Për një periudhë kohore, nga viti 1999-2009, Tahiri ishte Drejtor Operativ në KRM “Pastërtia”, pastaj nga viti 2017 deri në vitin 2020 shërbeu si këshilltar politik në Ministrinë e Tregtisë dhe Industrisë, derisa nga viti 2010 udhëhoqi me kompaninë “Mbrojtja e Ambientit”.

Mbledhja komemorative për artistin e ndjerë, Bajram Tahiri, mbahet më 3 Shkurt 2026, ora 14:00 në Teatrin “Adriana” kurse ceremonia e varrimit nga ora 15:30 në varrezat e reja të qytetit.

Ferizaj

Ngritët aktakuza e parë për zgjedhjet e 28 dhjetorit

Published

2 weeks ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

2 weeks ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.