Ferizaj

Subjekteve afariste u kërkohet respektim i masave për COVID-19

Published

6 years ago

18 June, 2020

I kishin thirurr gastronomët ferizajas për t’i udhëzuar rreth respektimit të masave të reja kundër përhapjes së koronavirusit, madje i paralajmëruan se do t’ua mbyllin lokalet nëse nuk i zbatojnë rekomandimet, por siç duket thirrjet e përfaqësuesve të Institutit Kombëtar të Shëndetit Publik, atyre të Policisë dhe të Inspektoratit Komunal të Ferizajt nuk u pëlqyen gastronomëve të pranishëm.

“Udhëzimet për gastronomi që janë të përcaktuara me manualin nga Ministria dhe Instituti, pika e parë është distanca ku kërkohet minimumi të ketë një distancë 1.5 metër me të tjerët dhe jo më shumë se 4 persona në një tavolinë, vetëm në rastin kur janë familjarë mund të ketë më shumë“, u shpreh Ridvan Berisha, kryeinspektor komunal.

Sevdije Mehmeti, drejtoreshë e Qendrës Rajonale të Shëndetit Publik në Ferizaj, tha se nëse ndonjë punëtor i ndonjë lokali rezulton pozitiv, ai biznes do të mbyllet.

“Ana materiale e dimë që është shumë e dobishme, por nuk guxojmë me vendos anën materiale para anës shëndetësore, një jetë e dikujt është shumë më e çmueshme sesa një dështim i biznesit. Bartja e maskave, mbajtja e dezinfektuesve dhe mbajtja e distancës 1.5 metra mendoj që është më e pakta dhe që duhet t’i përmbahemi, në momentin që këto nuk përmbahen ligji na obligon me marrë masa, e ne nuk jemi ata që duam me marrë masa, por mos na detyroni se në momentin që një punëtor ose një klient del pozitiv në lokalin e juaj ta keni parasysh që ai lokal ka me u mbyllë”, tha Mehmeti.

Edhe Policia i luti gastronomët për respektim të masave, në të kundërtën paralajmëroi gjoba.

“Përmbajuni rekomandimeve që mos të kemi edhe ne edhe Inspektorati punë me juve, qëllimi i sotëm është që mos të vimë me ju bezdisë në këtë kohë që është e rëndë edhe për juve, atëherë unë besoj se keni me pas shumë humbje të mëdha, pra takimi i sotëm është që të merremi vesh që t’iu përmbaheni këtyre rregullave, asgjë më tepër, asgjë më pak, e vetmja gjë që ne si polici duam është ju t’iu përmbaheni atyre rregullave dhe nëse ju nuk i përmbaheni ne do të jemi aty për çdo ditë e çdo minutë, sot po u themi këtu e mos të vijmë nëpër lokale”, tha Qazim Reka, zëvendëskomandant i Policisë në Ferizaj.

Në anën tjetër, gastonomët ferizjas u shprehën se me këto masa do të kenë shumë probleme që të operojnë.

“Unë i kam 35 punëtorë, si i paguaj ata, 5 mijë euro i kam rroga, 1 mijë e 500 euro e kam qiranë, 2000 euro e kam rrymën, është problem me punu kështu siç po thuani. Ju thatë me i mbyllë se e ju merrni rroga ju ecë rroga, po punëtorët çka me bë dhe ne”, tha një gastronom.

“Unë i kam 4 tavolina brenda, nëse shkoj me 1.5 metra atëherë duhet me i mbajtë 2 tavolina brenda lokalit që i bjen maksimumi me i pas 8 klientë dhe me këta klientë nuk ka shansë me punu. Normal që duhet me i respektu rekomandimet, por është problem për bizneset që i kanë hapësirat e vogla”, tha Leona Jahiri, gastronome.

“Nëse janë 8 metra katorë për 1 person atëherë unë i kam 23 punëtorë shumica kanë me qenë kamariera sesa klientë. Nëse dikush hynë në kafeteritë tona dhe e sjellë virusin çfarë faji kemi ne, qysh me u mbyllë krejt ne”, tha Agon Zhinipotoku, gastronom.

Nga dita e hënë në Kosovë janë konfirmuar 347 raste me COVID-19.

Ferizaj

Aktakuzë ndaj tre të dyshuarve për mashtrim me kriptovaluta në Ferizaj

Published

2 days ago

22 May, 2026

Redaksia

Prokuroria Themelore në Ferizaj, Departamenti i Përgjithshëm, ka ngritur aktakuzë kundër të pandehurve me inicialet: A.L., R.J. dhe V.N., për shkak të dyshimit në bashkëkryerje kanë kryer veprën penale”Mashtrimi” sipas Kodit Penal të Republikës së Kosovës

Të pandehurit dyshohen se më 17 Prill 2026, në Ferizaj, rruga, “Cen Dugolli” me dashje dhe në bashkëveprim, me anë të paraqitjes së rreme të fakteve dhe duke përdor emra të rreme, i vënë në lajthitje të dëmtuarit E.F., A.F., dhe Rr.K, duke ua marrë 12,000 euro si kundërpagesë për kriptovaluta të llojit USDT të cilat do t’ua transferonin përmes portofolit digjital “wallet”.

Pasi të dëmtuarve ua marrin shumën prej 12 mijë eurove, të pandehurit i fusin paratë në një çantë të gjelbër dhe i vendosin në një dollap brenda lokalit të cilin e kishin marrë me qira. Ata kishin hapur një vrimë në pjesën e pasme të dollapit, nga ku i morën paratë pa u vërejtur dhe u larguan në drejtim të panjohur.

Pas hetimeve, u zbulua se të dyshuarit e njëjtë, duke përdorur të njëjtën skemë, kishin organizuar një transaksion fiktiv në rrugën “Ismail Reka” në Kaçanik. Edhe aty kishin siguruar një lokal me qira për t’u takuar me persona të interesuar, të cilëve u kishin ofruar transferimin e USDT-ve në vlerë prej 50 mijë Euro.

Aktakuza ngarkon gjithashtu dy nga të pandehurit, A.L. dhe R.J., për një rast të ndodhur më 18 Gusht 2024 në rrugën “Agim Prodani” në Ferizaj ku të dëmtuarit G.A. ia kishin marrë me mashtrim 2 mijë euro duke i premtuar transferimin e kriptovalutave në portofolin e tij. Me të marrë paratë nga viktima, dy të pandehurit largohen me vrap në drejtim të panjohur.

Për të gjitha këto veprime, tre të pandehurit akuzohen për veprën penale “Mashtrimi” nga neni 323 paragrafi 1, lidhur me nenin 31 të Kodit Penal të Republikës së Kosovës.

“Prokurori i çështjes, me rastin e ngritjes së aktakuzës, i ka propozuar Gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, të pandehurit e lartëcekur të shpallen fajtor për veprën penale për të cilën akuzohen dhe të dënohen sipas ligjit”, thuhet mes tjerash në njoftimin e Prokurorisë Themelore të Ferizajt.

Ferizaj

Punëtori që ra nga kulmi i një objekti në Babush u dërgua në QKUK

Published

3 days ago

21 May, 2026

Redaksia

Një 27-vjeçar ka pësuar lëndime të rënda trupore pasi ka rënë nga kulmi i një objekti në fshatin Babush, në magjistralen Ferizaj-Prishtinë.

Në raportin 24 orësh të policisë bëhet e ditur se rasti u raportua të mërkurën, 20.05.2026 rreth orës 15:00.

“Është raportuar se viktima )mashkull kosovar) derisa kishte qenë duke punuar në kulmin e një objekti ishte rrëzuar dhe kishte pësuar lëndime trupore. Viktima fillimisht është dërguar në emergjencën e Ferizajt, por për shkak të gjendjes së rëndë shëndetësore është dërguar në QKUK” thuhet në njoftim.

Në vendin e ngjarjes kanë dalë njësitë relevante të policisë dhe inspektorët e punës derisa rasti është cilësuar si “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.

Ferizaj

Policia godet një rrjet të kontrabandës së kafshëve në Ferizaj

Published

4 days ago

20 May, 2026

Redaksia

Policia kufitare ka realizuar një operacion në fshatin Rakaj të Ferizajt, nën dyshimin për kontrabandë të dhe mbajtje të paligjshme të kafshëve.

Në njoftimin e policisë bëhet e ditur se gjatë kontrollit të njësive policore dhe inspektorit të Agjencisë së Ushqimit dhe Veterinës (AUV), në pronën e të dyshuarit L.K dhe dy lokacione tjera, janë gjetur 100 krerë dele pa numra matrikulli dhe pa asnjë dokumentacion përcjellës mbi origjinën apo kontrollin veterinar.

Me vendim të Prokurorit të Shtetit rasti po trajtohet si “Kundërvajtje doganore” dhe i është dorëzuar Doganës së Kosovës në Han të Elezit për procedim të mëtutjeshëm.