Ferizaj

Lëndohet një person nga bombola e oksigjenit në Spitalin e Ferizajt

Published

6 years ago

24 August, 2020

Një person është lënduar mbrëmë pas mesnate në Spitalin e Ferizajt pas shpërthimit të rregullatorit të bombolës së oksigjenit. I lënduari ishte duke u kujdesur për babain e tij të shtrirë në këtë spital pas infekimit me virusin korona. Drejtori i Spitalit të Ferizajt Jeton Zeqiri, tha se shpërthimi i rregullatorit ka ndodhur teksa i lënduari ka tentuar ta rregulloj vet oksigjenin. Megjithatë, ai theksoi se gjendja e tij është e mirë.

“Në orën 1 pas mesnatës në repartin e Interno-s ku është duke u bërë trajtimi i rasteve me Covid-19 fatkeqësisht një rregullator i bombolës së oksigjenit ka shpërthyer, por fatmirësisht nuk kemi lëndime tek pacientët apo tek personat përgjegjës që merren me ndërrimin e bombolave, mirëpo edhe përkundër personit përgjegjës që i ka referuar familjarit të pacientit të mos e prekë bombolën përkundrazi ai ka dashur t’i ndihmoj në njëfarë mënyre dhe i ka djegur pak duart, por që gjendja e tij është stabile dhe nuk ka ndonjë lëndim që duhet të shqetësohemi”, tha Zeqiri.

Zeqiri tha se kjo është hera e dytë që po ndodhë një gjë e tillë për shkak të përdorimit të shumtë të bombolave të oksigjenit, të cilat janë të parapara të përdoren më pak se 24 orë.

“Kjo është hera e dytë që kemi një shpërthim të rregullatorit të bombolave të oksigjenit, herën e parë është lënduar një infermiere dhe menjëherë e kemi thirrur Inspektoratin e Punës që të bëj verifikimin ku është problematika tek rregullatori, kualiteti i rregullatorit, apo tek puna shumë e madhe e rregullatorit ku në 24 orë i kemi pacientët në oksigjeno-terapi dhe jemi duke pritur përgjigjen nga ta. Mirëpo, përkundër këtij fakti, ne jemi konsultuar me shumë ekspertë të oksigjenit dhe ata na kanë referuar që bombolat nuk janë të dedikuara për punë 24 orëshe dhe ato pjesë përbërëse të rregullatorit dëmtohen, ndërsa ne jemi duke i përdorur më shumë se 24 orë“, tha Zeqiri.

Në Spitalin e Ferizajt janë duke u trajtuar 41 pacientë, prej tyre 33 janë me oksigjeno-terapi, ndërsa dy raste janë me ventilim mekanik. Sipas drejtorit të Spitalit, 3 persona janë në gjendje më të rëndë shëndetësore.

Gjatë kohës sa ekipi i Televizionit Tema qëndroi në Spitalin e Ferizajt, nga aty u nxorën dy kufoma. Lidhur me këtë, drejtori i Spitalit tha se nuk mund të jap detaje, pasi përgjegjës për vdekje të pacientëve të prekur me Covid-19 është Instituti Kombëtar i Shëndetësisë Publike të Kosovës.

Ferizaj

KEDS: Mungesa e kapaciteteve nga KOSTT shkakton probleme me energjinë në Ferizaj

Published

2 hours ago

01 April, 2026

webmaster

KEDS ka njoftuar se situata aktuale me furnizimin me energji elektrike në zonën Ferizaj–Bibaj është pasojë e mungesës së kapaciteteve nga KOSTT.

Sipas njoftimit, transformatori T3 në nënstacionin TS Bibaj (40 MVA) është jashtë funksionit që nga data 13 mars 2026, duke shkaktuar mungesë të energjisë në këtë zonë.

Për të zbutur situatën, KEDS ka ndërmarrë disa masa, përfshirë përdorimin e lidhjeve alternative për furnizim, vendosjen e dy transformatorëve shpërndarës me kapacitet nga 8 MVA secili, si dhe forcimin e kabllove për rritje të përkohshme të kapacitetit.

Megjithatë, sipas KEDS, këto masa nuk janë të mjaftueshme për të përballuar ngarkesën, për shkak të mungesës së energjisë nga KOSTT. Si pasojë, gjatë orëve të pikut nga ora 17:00 deri në 00:00 mund të ketë kufizime të furnizimit deri në 8 MW në disa zona, veçanërisht në nënstacionet Bibaj dhe Kastrioti.

KEDS ka kërkuar nga KOSTT ndërmarrjen e hapave konkretë për zëvendësimin e kapacitetit të humbur prej 40 MVA, duke paralajmëruar se në të kundërtën situata e furnizimit me energji elektrike mund të përkeqësohet edhe më tej.

Ferizaj

Qendra e Ferizajt 17 orë pa rrymë, KEDS dhe KOSTT ende pa ndonjë sqarim

Published

2 days ago

30 March, 2026

webmaster

Qendra e Ferizajt vazhdon të mbetet pa energji elektrike për rreth 17 orë, ndërsa ende nuk ka ndonjë sqarim publik nga KEDS, KESCO apo KOSTT lidhur me ndërprerjen.

Sipas të dhënave në aplikacionin eKESCO, arsyeja e ndërprerjes së energjisë elektrike është një defekt teknik i tipit “Phase to Phase Short Circuit”, i cili ka nisur rreth orës 01:00 të mëngjesit të sotëm.

Pa furnizim me energji elektrike kanë mbetur disa zona të qendrës së qytetit, ndërsa qytetarët vazhdojnë të përballen me mungesën e rrymës për një periudhë të gjatë.

Deri më tani nuk ka informacione zyrtare se kur pritet rikthimi i furnizimit me energji elektrike.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

2 weeks ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.