Ferizaj

Komuna e Ferizajt nuk do t’i ndihmojë bizneset e dëmtuara nga pandemia

Published

6 years ago

13 January, 2021

Masat kufizuese për parandalimin e përhapjes së koronavirusit në Kosovë, ndikuan në gjendjen financiare të shumë bizneseve.

Teksa komuna e Prishtinës ndau rreth 5 milionë euro për t’iu dalë në ndihmë bizneseve që janë dëmtuar nga Covid-19, një fat të tillë nuk e patën edhe bizneset e komunës së Ferizajt.

Drejtori i Zhvillimit Ekonomik Zekir Bytyqi, thotë se komuna e Ferizajt nuk ka mundësi financiare për t’i ndihmuar bizneset, andaj e vetmja shpresë mbetet tek ligji për rimëkëmbje ekonomike.

“Në komunën e Ferizajt ekzistojnë diku 13 mijë biznese dhe ne si qeverisje lokale nuk kemi kapacitet dhe mundësi që t’iu dalim në ndihmë bizneseve që humbjet mund t’i kenë pasur milionëshe, por besoj që pakoja e rimëkëmbjes do t’i ndihmoj bizneset e mëdha, pasi ne si komunë kemi fonde jo të mjaftueshme për t’iu dalë në ndihmë. Besoj që edhe ligji për rimëkëmbje ekonomike që është votuar në Kuvendin e Kosovës do të jetë masë lehtësuese për bizneset të cilat kanë pasur humbje apo mbyllje gjatë pandemisë“, tha Bytyqi.

Fond të veçantë për t’i ndihmuar bizneset nuk kanë planifikuar, por për to do të ndahet granti i përvitshëm që kjo drejtori jep për bizneset e vogla prodhuese.

Bytyqi thotë se gjatë këtyre muajve do të bëjnë thirrje për aplikim të bizneseve, ku 30 prej tyre do të përfitojnë nga ky grant.

“Në vitin 2021 kemi planifikuar që të ndajmë fondin prej 150 mijë euro që do të shkoj për bizneset, ku kryesisht do të mbështeten bizneset e vogla në fushën e prodhimtarisë dhe ky është viti i tretë që i mbështesim si komunë këto bizese prodhuese”, tha Bytyqi.

Megjithëse viti 2020 ishte i vështirë për ekonominë, drejtori Bytyqi tha se në komunën e Ferizajt janë hapur rreth 700 biznese të reja.

Në videon e mëposhtme mund ta ndiqni një raport të përgatitur nga Tv Tema më 4 maj të vitit 2020, ku kryetari i Ferizajt Agim Aliu kishte deklaruar se bizneset e kësaj komune do të ndihmohen nga komuna.

Deklaratën për ndihmë për bizneset mund ta gjeni nga minuta 4:03.

Ferizaj

Ndahet nga jeta veterani i UÇK-së, Avdi H. Ahmeti

Published

18 hours ago

03 November, 2026

Redaksia

Është ndarë nga jeta Veterani i Ushtrisë Çlirimtare të Kosovës, Avdi H. Ahmeti nga Ferizaj.

Njoftimi mortor u bë i ditur nga Organizata e Veteranëve të Luftës së UÇK-së, dega në Ferizaj.

Sipas njoftimit, varrimi i të ndjerit do të bëhet të mërkurën, më 04.11.2026 ora 14:15 në varrezat e lagjes Karametaj, të fshatit Greme të Ferizajt.

Ferizaj

Ndalohet për 48 orë një person për rastin e vdekjes të punëtorit në Ferizaj

Published

3 weeks ago

13 October, 2026

Redaksia

Prokuroria Themelore në Ferizaj, ka njoftuar për ndalimin e një personi me inicialet B.T. lidhur me rastin që ka ndodhur dje rreth orës 15:50, në rrugën ”Cen Dugolli” në Ferizaj, ku humbi jetën një punëtor derisa po punonte në një objekt ndërtimi. Viktima dyshohet se ka rënë nga lartësia dhe ka pësuar lëndime të rënda, si pasojë e të cilave ka ndërruar jetë në vendin e ngjarjes.

Sipas prokurorisë, i arrestuari B.T. është ndaluar nën dyshimin për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.

Njoftimi i Prokurorisë:

Ndalohet një person për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”

Ferizaj, 13 Tetor 2026– Prokuroria Themelore në Ferizaj, njofton opinionin publik se me vendim të Prokurorit të Shtetit, ka ndaluar një (1) person të dyshuar me iniciale B.T., në kohëzgjatje prej 48-orësh, për shkak të dyshimit të veprës penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”nga neni 358 sipas Kodit Penal të Republikës së Kosovës.

Rasti në fjalë ka ndodhur në rrugën ”Cen Dugolli” në Ferizaj, rreth orës 15:50:, ku, një person, i cili po kryente punime në një objekt ndërtimi, dyshohet se ka rënë nga lartësia dhe ka pësuar lëndime të rënda, si pasojë e të cilave ka ndërruar jetë në vendin e ngjarjes.

Vdekjen e viktimës e ka konstatuar mjeku kujdestar i Qendrës Emergjente në Ferizaj, kurse, me urdhëresë të prokurorit të shtetit, trupi i pajetë i vitkimës është dërguar për obduksion në Institutin e Mjekësisë Ligjore në Prishtinë.

Prokurori i shtetit, pas daljes në vendin e ngjarjes, ka udhëzuar Policinë dhe Inspektoratin e Punës, për ndërmarrjen e veprimeve të nevojshme hetimore, me qëllim të zbardhjes së rrethaneve të këtij rasti.

Prokuroria Themelore në Ferizaj, ndaj të dyshuarit të lartëpërmendur, brenda afatit ligjor do të vazhdoj me procedurat e mëtejme ligjore.

Ferizaj

Humb jetën një punëtor në një objekt në ndërtim në Ferizaj

Published

3 weeks ago

12 October, 2026

Redaksia

Një punëtor 54 vjeç ka humbur jetën pasi dyshohet se gjatë punës të jetë rrëzuar në një objekt në ndërtim në Ferizaj.

Rasti është raportuar të ketë ndodhur pasditen e sotme rreth orës 15:40, në rrugën “Cen Dugolli”.

Në vendin e ngjarjes kanë dalë policia dhe ekipet e Emergjencës, të cilat kanë konstatuar vdekjen e tij. Sipas policisë dyshohet se gjatë punimeve ndërtimore viktima është rrëzuar nga kati përdhes në bodrum.

Në vendngjarje kanë dalë edhe hetimet rajonale dhe inspektorët e punës derisa për të gjitha veprimet policore është njoftuar prokurori i shtetit.