Ferizaj

25 vjet burg për vrasjen në kafene në Ferizaj

Published

5 years ago

01 February, 2021

Gjykata në Ferizaj ka shpallur dënimin ndaj Dardan Shabanit i cili akuzohej për vrasje të rëndë. Bashkë me të, por për pjesëmarrje në rrahje akuzoheshin edhe Meriton Murseli dhe Albion Ahmeti. Dardan Shabani u shpall fajtor për vrasje të rëndë dhe iu shqiptuan 20 vjet burg. Ndërsa të pandehurit Murseli dhe Ahmeti u dënuan veç e veç pjesëmarrje në rrahje me nga dy vjet e gjashtë muaj. Sipas Prokurorisë, Dardan Shabani më 15 qershor 2018 rreth orës 22:10 në kafenenë “n’Konak”, e cila gjendet në rrugën “Dëshmorët e Kombit” në Ferizaj, me dashje direkte dhe nga hakmarrja e paskrupullt ka vrarë Elvedin Ibrahimin. Në aktakuzë theksohet se i akuzuari në shenjë hakmarrjeje ditën kritike ka shkuar së bashku me të pandehurit Meriton Murseli dhe Albion Ahmeti në kafenenë e përmendur ku ishte duke punuar si sigurim fizik tani i ndjeri, me ç’rast e ka nxjerrë thikën me të cilën në mënyrë tinëzare nga hakmarrja e paskrupullt e godet viktimën në pjesën e gjoksit, e cila depërton deri në zemër. Kurse të pandehurit Meriton Murseli dhe Albion Ahmeti e godasin me mjete të forta, karrige, shishe të birrës, kështu që tashmë i ndjeri rrëzohet kurse i pandehuri Dardan Shabani e godet edhe tetë herë me thikë në pjesën e shpinës dhe një herë në pjesën e qafës.

Nga këto goditje, sipas aktakuzës, viktima pëson lëndime të rënda trupore dhe gjakderdhje të brendshme dhe të jashtme, si pasojë e të cilave dërgohet në QKUK, ku edhe vdes. Sipas aktakuzës i akuzuari Dardan Shabani në kohë, datë dhe vend të njëjtë i ka shkaktuar lëndime të lehta trupore të dëmtuarit Elmendin Sherifi pasi që i dëmtuari kishte ndërhyrë për t’i ndarë të pandehurit dhe tashmë të ndjerin Elvedin Ibrahimi. I akuzuari e ka goditur me thikë në parakrahun e dorës së djathtë duke i shkaktuar lëndime trupore. Sipas Prokurorisë, Meriton Murseli dhe Albion Ahmeti kanë marrë pjesë në rrahje, në të cilën ka mbetur i vdekur Elvedin Ibrahimi duke e goditur me shishe të birrës të ndjerin dhe pjesëmarrësit e tjerë që kanë tentuar t’i ndajnë. Dosja e Prokurorisë sqaron se në datën, kohën dhe vendin e njëjtë Meriton Murseli dhe Albion Ahmeti i kanë shkaktuar lëndime trupore të dëmtuarve Ibrahim Emini dhe Elmedin Sherifit. Rrahja sipas Prokurorisë ka ndodhur kur të dëmtuarit kanë tentuar t’i ndajnë dhe ata janë goditur me karrige dhe shishe të qelqit.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

2 days ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

3 days ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

7 days ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim