Ferizaj

Kritikohet mënyra e votimit për ngastrat kadastrale

Published

5 years ago

05 February, 2021

Kuvendi Komunal i Ferizajt miratoi propozimin e Drejtorisë së Bujqësisë për ndarjen e subvencioneve gjatë vitit 2021, në vlerë mbi 300 mijë euro.

Drejtori i Bujqësisë Burim Bajrami, tha se kët vit ka rritje të subvencioneve në bujqësi.

“Sivjet ka rritje të subvencioneve në vlerë prej 65 mijë euro dhe në total subvencionet janë 365 mijë euro”, tha Bajrami.

Imri Hashani nga LDK-ja dhe Balton Dërguti nga nisma ”Guxo”, kritikuan mënyrën e planfikimit të shpërndarjes së këtyre subvencioneve.

“Tek subvencionimi i fermerëve kultivues të perimeve në serra me fidane është 15 mijë euro, pa procedurë të prokurimit. Në bazë të cilit ligj ndahen, a ndahen me tender, me konkurs apo me çfarë kritere do të jepen këto pasi shkruan pa procedurë të prokurimit?”, pyeti Imri Hashani.

“Natyrisht se do të bëhet thirrje publike, asaj thirrje publike do t’i përgjigjen kultivuesit e perimeve në serra që kanë 3 ari e mbi, ata do të paraqiten tek zyret tona, do ta mbushin aplikacionin, ne do të dalim në terren dhe do ta bëjmë vlerësimin e mandej do ta shpallim listën përfituese. Ata e kanë obligim me bë mbjelljen e perimeve dhe ne do të dalim prapë në terren me i shiku a i kanë mbjell apo jo”, tha Bajrami.

“A keni bërë ndonjë vlerësim më herët në bazë të dhënies së fidaneve që keni ndarë, sepse unë kam dëgjuar se në shumë vende u janë dhënë fidane joprofesionistëve dhe nuk i kanë kultivuar ato dhe janë tharë, po ashtu edhe tek dhënia e lopëve qumështore, kjo më shumë konsiderohet si një ndihmë dhe nuk është ndonjë investim, pasi shumë prej tyre nuk i kanë fare”, tha Balton Dërguti.

“Kryetari Aliu ka krijuar komisionin e veçantë që ka bërë vlerësimin e investimeve tona dhe i kam të gjitha raportet edhe të përfituesve të arrave, edhe të lopëve, unë jam shumë i kënaqur me këtë investim që kemi bërë dhe mjafton që të bëni një rrugë deri në Gaçkë apo Pleshinë dhe të shihet produkti i arrës dhe kapacitetet prodhuese të tyre”, tha Burim Bajrami, drejtor i Bujqësisë.

Kuvendi sot miratoi edhe 4 propozime që kishin të bënin me shpallje të interesit të përgjithshëm të ngastrave kadastrale.

E, për mënyrën se si po miratohen këto propozime, reagoi asamblisti Enver Bajrami.

“Çështjen e këtyre dhënieve të pronave pata kërkuar që të bëhet e mundur teknikisht përmes monitorit që ta dimë se për çfarë po bëhet fjalë, këtu ka mundësi që dikush edhe shtëpinë e vet me bë ndërrim dhe nuk e di, prandaj mos të shndërrohemi në mekanizëm ngritje e ulje të dorës, pasi nuk është e qartë se për çfarë po votohet”, tha Bajrami.

Kuvendi Komunal i Ferizajt miratoi edhe propozimin e drejtorisë së Administratës që të dalë në diskutim publik draft-rregullorja komunale për transparencë.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

3 days ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

4 days ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

1 week ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim