Ferizaj

Kosova refuzon vaksinat kineze, qytetarët me mendime të ndara

Published

5 years ago

06 April, 2021

Gjatë ditës së hënë Ministria e Shëndetësisë ka refuzuar vaksinat kineze të cilat u ofruan nga Shqipëria për vaksinimin e mësimdhënësve. Arsye për refuzimin e këtyre vaksinave, sipas ministrit të Shëndetësisë Arben Vitia, është se ato nuk janë të sigurta.

E, mendimin e njëjtë me ministrin Vitia se nuk duhet të merret vaksina kineze, e ndajnë edhe disa qytetarë ferizajas.

“Ja valla për të Kinës nuk tham, as të Rusisë, se janë të pabesë. Besë nuk kanë as Kina, as Rusia, as Serbia”, tha një qytetar.

“Jo, se s’kam besim, se tutna. Me qenë prodhim i tjetër kujt hajde hajde”, tha një tjetër qytetar.

“T’Kinës krejt jemi duke i ble senet. Është përzi. Me qenë e vërtetune po, po ajo e vërtetune s’është hala, po thojnë në televizor se tybe n’po di, hala e paaprovune. Vallahi kundra, megjithëse s’varet prej neve, po kur të thojnë tre vetë maju se je i pitë, duhet me u majtë se rrëzohesh”, u shpreh një qytetar.

“Duhet me analizu mjekët dhe ata që janë për këtë çështje, mendimi jem është që mos me marrë. Kemi frikë sepse në momentin që flitet se në Kinë është ba edhe virusi Covid edhe ajo është frika që edhe vaksinat janë të rrezikshme. Panika e qytetarëve, sigurisht se nuk jam pro marrjes së vaksinës nga Kina”, theksoi njëri nga qytetarët e anketuar nga Televizioni Tema.

Megjithatë jo të gjithë qytetarët e mendojnë njësoj.

”Duhet me marrë vaksinën, a e marrin kineztë, nëse e marrin ata edhe ata janë njerëz, nëse është për njerëz duhet me marrë, nëse s’është nuk ka nevojë. Na duhet me iu përshtatë krejt kushteve që bahen, sepse jeta e njerëzve nuk paguhet as me vaksina as me kurgja, por duhet me u mundu me i shëru të gjithë”, tha një qytetar.

Rreth kësaj çështje Televizioni Tema ka tentuar të bisedojë edhe me ministrin e Shëndetësisë Arben Vitia, mirëpo gjatë ditës ai nuk ishte i çasshëm.

Ferizaj

Arrestohen katër të dyshuar për kanosjen e një personi në Ferizaj

Published

1 day ago

14 July, 2026

Redaksia

Policia Rajonale në Ferizaj ka arrestuar 4 persona në dyshimet për kanosje dhe armëmbajtje pa leje.

Në njoftim bëhet e ditur se më datën 13.07.2026, në stacionin policor në Ferizaj është paraqitur një ankues, M.B, i cili ka deklaruar se ishte kanosur nga disa persona.

Pas ndërmarrjes së veprimeve operative-hetimore nga njësitet reaguese dhe njësia e hetimeve, janë identifikuar dhe lokalizuar personat e dyshuar në një lokal në Ferizaj, ku gjatë kontrollit janë sekuestruar katër armë zjarri dhe sasi municioni.

Të dyshuarit: H.TH. ( 50 vjeç), SH.TH. (27 vjeç). E.B. ( 37 vjeç) dhe E.H. (27 vjeç), me vendim të prokurorit të shtetit janë ndaluar në mbajtje për 48 orë, ndërsa ndaj tyre janë iniciuar raste për veprat penale “Kanosja”, “Mbajtja në pronësi, kontroll ose posedim të paautorizuar të armëve dhe “Asgjësimi apo dëmtimi i pasurisë”.

Ferizaj

Brenda një jave konfiskohen 15 motoçikleta në Ferizaj

Published

2 days ago

13 July, 2026

Redaksia

Policia Rajonale e Ferizajt ka njoftuar se brenda periudhës nga 6 – 12 korrik ka shqiptuar 26 gjoba për shkelje të rregullave të trafikut dhe ka konfiskuar 15 motoçikleta.

Kjo pasi policia ka shtuar kontrollet në qarkullimin dhe drejtuesit e motoçikletave dhe skuterëve.

Shumica e gjobave janë shqiptuar për shkelje të rregullave të komunikacionit, përfshirë drejtimin e motoçikletës pa regjistrim, pa patentë shoferi ose pa helmetë mbrojtëse, si dhe kundërvajtje të tjera.

Gjatë kësaj periudhe janë konfiskuar edhe 15 motoçikleta/skuterë, kryesisht për mungesë të dokumentacionit të rregullt.

Ferizaj

Lëndohen tre policë gjatë arrestimit të sulmuesit 16 vjeç në Ferizaj

Published

5 days ago

10 July, 2026

Redaksia

Policia e Kosovës ka njoftuar se gjatë arrestimit të të miturit me inicialet P.GJ (16 vjeç), i dyshuar për therje të dy personave mëngjesin e sotëm në Ferizaj, janë lënduar tre zyrtarë policor ku njëri prej tyre është goditur me thikë në pjesën e qafës.

Sipas policisë, pas kontrollit ë banesën e të dyshuarit dhe më pas në një adresë në fshatin Greme, policia ka arritur ta lokalizojë atë.

“Me të arritur në vendngjarje, i dyshuari ka refuzuar t’u bindet urdhrave policorë, duke mbajtur një thikë në dorë, ka sulmuar zyrtarët policorë me gurë dhe mjete të forta, si dhe është vërsulur ndaj tyre me thikë.

Gjatë ndërhyrjes, nëna e tij ka penguar zyrtarët policorë në kryerjen e detyrës zyrtare.

Në një moment, i dyshuari ka marrë një shishe me benzinë dhe ia ka hedhur vetes mbi trup, duke vazhduar t’i kërcënojë policët me thikë dhe duke mos lejuar afrimin e tyre.

Gjatë përpjekjeve për vënien e tij nën kontroll, tre zyrtarë policorë kanë pësuar lëndime, ndërsa njëri prej tyre është goditur me thikë në pjesën e qafës.

Pas ndërhyrjes policore, i dyshuari me inicialet P.GJ (16 vjeç) është vënë nën kontroll dhe është arrestuar së bashku me nënën e tij D.GJ (47 vjeçe).

Gjithashtu është sekuestruar edhe thika, e cila dyshohet se është përdorur në sulmin ndaj qytetarëve”, ka njoftuar policia.

Në përditësimin e fundit, thuhet se në sulmin që ndodhi rreth orës 07:53, në rrugën ‘Dëshmorët e Kombit’, në afërsi të Postës Qendrore në Ferizaj, mbetën të plagosur dy qytetarë, të cilët u dërguan për trajtim mjekësor në Spitalin e Ferizajt.

Njëri nga të plagosurit, I.M. 81 vjeç, ishte therur në fytyrë dhe në gjymtyrë, ndërsa i plagosuri tjetër, një zyrtar i degës së Postës së Kosovës në Ferizaj, pas trajtimit mjekësor është liruar për në shtëpi.

Në njoftimin e Prokurorisë në Ferizaj, i dyshuari me vendim të Prokurorit të Shtetit është ndaluar në kohëzgjatje prej 24-orësh, për shkak të dyshimit se i njëjti ka kryer veprat penale “Sulmi ndaj personit zyrtar” dhe “Vrasja në tentativë”.