Ferizaj

Në Ferizaj mbahet “Panairi i gatimeve”

Published

5 years ago

11 May, 2021

administrator

Në sheshin e qytetit të Ferizajt u mbajt “Panairi i gatimeve” i organizuar nga organizata ”Nisja, Zhvillohu”.

Ky panair përmbante ushqime tradicionale, ëmbëlsira dhe ushqime të konservuara të gatuara nga gratë ferizajase.

Drejtoresha ekzekutive e ”Nisja, Zhvillohu”, Florina Ujupi tregon se gratë pjesëmarrëse në panair kanë punuar edhe më herët, por pandemia i dëmtoi në punën e tyre.

“Është panairi që e kemi bërë në prag të festës së Fitër Bajramit që gratë me i shitë produktet e veta, e kemi quajtur si paniri i gatimeve, me të ardhurat që këto i bëjnë janë për familjet e tyre dhe diçka kemi me dhanë për bamirësi. Kjo është në bashkëpunim me ”Caritas”-in, projekt i Bashkimit Evropian, është një ditor, përndryshe ne jemi duke u bërë gati do ta hapim një treg ditor të grave, diku kah data 20 qershor po planifikojmë me çel, e kjo është si pikënisje që me i njoftu njerëzit që ne tash e tutje kemi me qenë në treg çdo ditë, e jo vetëm një ditë“, thotë Ujupi.

Pjesëmarrësja e këtij panairi, Valdete Sahiti, e cila është edhe përfaqësuese e shoqatës “Agro Skifteraj” që merret me prodhimin dhe përpunimin e perimeve, thotë se panairet si ky i sotit janë mundësia e tyre e vetme për tregti.

“Për ne si shoqata këto panaire janë shumë të rëndësishme, për shkak se si shoqatë nuk mundesh me depërtu në markete, as në të voglat as në të mëdhajat. Panairet janë shumë të mirëseardhura për ne, por që nga fillimi i pandemisë, sot është hera e parë që po marrë pjesë në panair. Shitja ka ra shumë, edhe prodhimi ka ra për arsyen se kur e di që nuk e ke shitjen e sigurtë nuk je në gjendje me prodhu aq sa duhet. Ndihma kish me qenë e mirëseardhur, por ne si shoqata nuk jemi të përfshira askund, as në programin e rimëkëmbjes ekonomike, kështu që ne duhet me forcat e tona me u rikthy prap ku kemi qenë“, deklaroi Sahiti për Tv Tema.

Motoja e këtij panairi ishte “Blej ëmbëlsira, ndihmo gratë”.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

1 week ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

1 week ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

2 weeks ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim