Policia e Kosovës ka arrestuar sot Dardan Krivaqën, personin i cili ishte në kërkim për vrasjen e Marigona Osmanit.

Zëdhënësi i Policisës së Ferizajt, Kanun Veseli tregon se Krivaqa është arrestuar sot rreth orës 12:05 pasi që ndodhej në arrati që nga dita e diel, kur së bashku me të arrestuarin tjetër Arbër Sejdiu kishte dërguar viktimën në Spitalin e Ferizajt dhe më pas ishin larguar.

“Mbrëmë është arrestuar nga Policia i dyshuari i parë A.S, pas intervistimit është dërguar në mbajtje për 48 orë. Sot i është caktuar masa e paraburgimit. Ndërkaq sot Policia ka arritur ta arrestoj të dyshuarin tjetër D.K 29 vjeçar, në një fshat të Ferizajt. I njëjti në prani të avokatit të caktuar me detyrë është mbrojtur në heshtje dhe me vendim të prokurorit është ndaluar për 48 orë”.

Kanun Veseli – Zëdhënës i Policisë së Ferizajt

Tutje ai tregoi se rasti po kompletohet dhe se dy të arrestuarit ishin shokë me njëri-tjetrin dhe bashkëpjesëmarrës ne vrasje.

“Tani për tani, Policia është duke e kompletuar rastin dhe është duke grumbulluar informacionet që ka quar në këtë vrasje të rëndë siç është cilësuar. Po punohet në këtë drejtim,  nëse ka të implikuar të tjerë, do të shoqërohen në Polici.”

Kanun Veseli – Zëdhënës i Policisë së Ferizajt

Prokuroria Themelore në Ferizaj përmes një komunikate për media ka deklaruar se Krivaqa është ndalur në kohëzgjatje prej 48 orësh.

“Prokuroria Themelore në Ferizaj, njofton opinionin publik se lidhur me rastin e vdekjes së 18 vjeçares në Ferizaj, sot rreth orës 12 e 05 minuta, është arrestuari edhe personi i dytë i dyshuar (D.K) i cili ka qenë në arrati dhe është ndaluar në kohëzgjatje prej 48 orësh, për shkak të dyshimit se i njëjti në bashkëkryerje ka kryer veprën penale  “Vrasje e rëndë” të Kodit Penal të Republikës së Kosovës (KPRK). “, thuhet në komunikatën e Prokurorisë.

Kryeprokurori i Ferizajt, Shukri Jashari tregoi se akoma nuk është pranuar raporti i obduksionit nga Mjekësia Ligjore për të ditur saktë arsyet që çuan në vdekjen e Marigona Osmanit.

Gjatë ditës është mbajtur edhe seanca dëgjimore ndaj të arrestuarit Arbër Sejdiut, ku u aprovua kërkesa e Prokurorisë për masën e paraburgimit prej 30 ditësh për bashkëkryerje të veprës penale “Vrasje e rëndë”.

Në arsyetimin e Gjykatës thuhet se i dyshuari Sejdiu gjatë gjithë kohës ishte i pranishëm në vendin e ngjarjes dhe mori pjesë në ushtrimin e dhunës fizike dhe psikike që dërgoi në vdekjen e Marigona Osmanit.

Arbër Sejdiu nuk e ka kundërshtuar masën e paraburgimit, pasi sipas avokates së tij, Arbnora Shefkiu, ai ka pranuar të bashkëpunojë me organet për zbardhjen e rastit.