Ferizajt i shtohet edhe një Festival, me karakter ndërkombëtar. Mbrëmë në qytetin e Ferizajt u përmbyll Festivali ndërkombëtar i fotografisë “Lens Fest“. Në këtë Festival ishin pjesëmarrës fotografë nga vendet e ndryshme po ashtu kishte pjesëmarrës edhe nga diaspora. Organizatorja Bardha Goga, na tregon për rrjedhën e Festivalit.
“Lens Fest është menduar para 1 viti me u organizu mirëpo për shkak të pandemisë që ishte në atë kohë e realizuam këtë vit, mirëpo edhe ky vit na gjeti prapë me pandemi por sido që të jetë ne prapë e realizuam “Lens Festin”, kjo është dita e fundit dhe hapja e një ekspozite kolektive me 16 emrat më të njohur të fotografisë shqiptare ndër vite. Juri për përzgjedhje nuk ka pasë, fotografitë që janë, përshembull në ekspozitë janë nga miqtë tanë fotografë, pra i kemi ftuar me ftesë nga ne të bëhen pjesë e kësaj ekspozite, ndërsa për pjesëmarrësit që kanë marrë pjesë patjetër që ka pasë juri, juria ka qenë e përbërë nga 3 persona që i kemi përzgjedhë punën më të mirë të tyre që e kanë pasur ata, sepse 100 persona kanë aplikuar dhe vetëm 15 persona janë përzgjedhë për ta vazhduar për me qenë pjesë e ligjëratave dhe trajnimeve.”
Bardha Goga – Organizatore e “Lens Fest“
Gjithashtu në këtë ekspozitë pos fotografisë kishte edhe aktivitete të ndryshme si vizita në galeri, trajnime me ligjërues mbi artin e fotografisë, aktivitete në natyrë dhe performanca muzikore.
“Ligjërues në këto 3 ditë trajnime kanë qenë profesori i mirënjohur shqiptar i fotografisë Afrim Spahiu i cili ka ligjëruar në ditën e parë për fotografinë analoge dhe digjitale, pra ju ka treguar të rinjve se si është përdorur më herët aparati apo kamera me film dhe se si përdoret tash kamera digjitale, pastaj ka qenë në ditë e dytë Arian Mavriqi, ku kemi qenë në fshatin Jezerc dhe ju ka treguar të rinjve për fotografinë e jetës së egër dhe pas kësaj kemi ardhur me një ligjëratë për historikun e fotografisë shqiptare nga unë dhe pastaj me trajnime nga fotografi i njohur i fotografisë së portreteve Arbër Elezi, i cili ka studiuar në New York, për fotografinë e portreteve dhe ka ardhur në festivalin tonë për t’i mësuar pjesëmarrësit në përdorimin e teknikës së dritës e po ashtu në realizimin e një fotoportreti sa më të bukur dhe sa më artistik.”
Bardha Goga – Organizatore e “Lens Fest“
Pos fotografëve të njohur që ishin pjesë e kësaj ekspozite ndërkombëtare të fotografisë ishte edhe kuratorja e kësaj ekspozite Rozafa Shpuza.
“Ishte shumë kënaqësi për mu kur mu bë ftesa me qenë kuratore e kësaj ekspozite, kjo është ekspozitë ndërkombëtare me pjesëmarrjen e 16 artistëve që vijnë nga vendet e ndryshme të botës. Ideja e kësaj ekspozite ishe pak ndryshe se bëhet në një vend publik pra jo në një vend të mbyllur siç janë zakonisht ekspozitat e fotografisë, ekspozita mbahet në një nënkalim të ri të qytetit me qëllim që çdo kalimtarë, çdo njeri i thjesht që kalon që ndoshta nuk ka pas rast ndonjë herë me pa fotografi ose art të shfaqur përballë këtu e ka rastin me e pa. Ekspozita është e tillë e ndërtuar pra janë dy fotografi që kanë një qëllim të dyja bashkë e kanë një ide, e gjithashtu jam e kënaqur se unë vijë nga Shkodra, që është vendi i Marubit dhe djepi i fotografisë dhe them se unë do të jem ogur i mirë edhe i “Lens Festit”, të ketë vazhdimësi, pra ky të jetë fillimi që të bëhet për çdo vit dhe të mbledh sa më shumë fotografë nga e gjithë bota dhe Ferizaj pse jo të bëhet qendër e fotografisë.”
Rozafa Shpuza – Kuratore
Kjo ekspozitë ndërkombëtare e fotografisë do të vazhdoj edhe viteve të ardhshme që të sjell sa më shumë fotografë të rijnë dhe ndërkombëtar në qytetin e Ferizajt.
