Numri i të infektuarve po rritet. Këto janë pamjet e sotme, në Spitalin e Përgjithshëm në Ferizaj. Mjekët dhe infermierët janë duke u përballë me përpjekje, në ndihmë qytetarëve të prekur. Po ashtu janë duke u shfrytëzuar të gjitha hapësirat e spitalit për këtë qëllim.

Për gjendjen e pacientëve të shtrirë në spital, na sqaron doktori Besim Luri.

“Sot në spitalin e përgjithshëm në Ferizaj momentalisht kemi të shtruar afërsisht 70 pacientë në të gjitha repartet, të cilët i kemi improvizuar edhe pse ma herët nuk kanë qenë të destinuara për trajtimin e Covid-19. Situata ka bërë, që na të mobilizohemi, të gjitha hapësirat që i kemi në dispozicion t’i shfrytëzojmë dhe t’iu dalim në ndihmë qytetarëve, për të ju ofruar ndihmë atyre nga kjo pandemi, e cila e ka goditur globin dhe vendin tonë. Gjendja e pacientëve në spitalin tonë është e qëndrueshme, ku moshat e tyre ndryshojnë edhe në moshat e reja pasi që dihet se varianti Delta po i prekë mezo moshat dhe moshat e reja, por nuk kemi ndonjë numër shumë të madh të moshave të reja të prekur nga varianti Delta ”.

Besim Luri – Kryetar i Komunitetit Anti Covid, në Spitalin e Ferizajt

Doktor Luri bën thirrje që sa më shumë qytetarë të vaksinohen në mënyrë që ta kenë më lehtë përballimin e këtij virusi.

“Kemi pasur në vazhdimësi prej fillimit të valës së katërt, pacientët të cilët janë vaksinuar me dy dozat ose me nga një dozë të vaksinës. Por, kjo nuk është mesazh që qytetarët të mos vaksinohen, sepse pacientët të cilët kanë qenë me dy dozat e vaksinuar e kanë kaluar Covidin më lehtë. Andaj bëj thirrje te të gjithë qytetarët të cilët nuk janë vaksinuar ende, të vaksinohen pasi që është arma e vetme të cilën e kemi në dorë dhe duhet ta shfrytëzojmë për tu mbrojtur nga ky virus famëkeq.”

Besim Luri – Kryetar i Komunitetit Anti Covid, në Spitalin e Ferizajt

Gjithashtu në Spitalin e Përgjithshëm në Ferizaj, na thanë se janë të furnizuar barna si me anti-kuagulantë, me infuzione dhe me antibiotikë, përpos me ndonjë vitaminë ose tabletë të cilat duhet t’i blejnë vetë pacientët, në raste të veçanta.