Mbrëmë përfundoi, Festivali i Filmit “FerFilm”. Në natën e fundit të këtij Festivali, u ndanë çmimet për katër kategoritë e filmave nga juria e këtij Festivali. Për këto çmime na flet vetë anëtari i jurisë Arben Marevci, dramaturg.
“Kanë marrë pjesë filma nga e gjithë bota. Në këtë Festival ndahen katër çmime, çmimi për filmin Dokumentar, filmin Eksperimental, filmin e Shkurtë të Luajtur dhe Animacion. Unë e kam përzgjedhur filmin Dokumentar si filmi më i mirë dhe filmin Eksperimental, te këta filma ka qenë e veçanta, diçka që nuk është pa më herët në këta filma, tek filmat Eksperimental e kemi edhe të tashmen por mbase edhe të ardhmen, ndërsa në këtë rast fitues si film Dokumentar doli të jetë filmi “Mbijetesa dhe Shkolla”.
Arben Marevci – Anëtar i jurisë së Festivalit “FerFilm”
Regjinë e këtij filmi e ka bërë Ilir Kabashi, kurse skenarin e ka shkruar Producenti i filmit Nuhi Bytyçi, i cili foli për idenë e filmit.
“Po natyrisht se është një vlerësim shumë i rëndësishëm i jurisë profesionale dhe i organizatorit të Festivalit, por pas disa bisedave vumë re që dokumentari ju ka pëlqye shumë, se vërtetë ka qenë një dokumentar i mirëfilltë që ka pasqyruar sakrificën e popullit tonë në rrugëtimit tonë për lirinë dhe pavarësinë. Është një vlerësim, është një çmim jo vetëm për ekipin e këtij filmi, por edhe për ata fëmijë ata arsimtarë ata luftëtarë të lirisë, të cilët kanë punuar edhe në rrethanat e luftës për të funksionuar shkollat Shqipe, kështu që nuk ka qenë lufta vetëm për liri por edhe për dije dhe populli ynë ka qenë optimist se do ta fitoj luftën. Ky film pasqyron vërtet sakrificën e mbarë popullit shqiptar të Kosovës për liri dhe pavarësi.”
Nuhi Bytyçi – Skenarist dhe Producent i Dokumentarit “Mbijetesa dhe Shkolla”
Gjithashtu në këtë Festival u ndanë edhe mirënjohje për të gjithë pjesëmarrësit, ndërkaq nga filmat e vendeve të huaja u shpërblyen: Filmi më i mirë “The Other” nga Irani , filmi më i mirë eksperimental ”The Atom of Reality” nga Kanada, filmi më i mirë Animacion ”Migrant” nga Franca dhe çmimi Special për “Paris The Mecca of Parkour” nga Spania.
