Në Komunën e Ferizajt janë rreth 900 pacientë me diabet të cilët njëkohësisht janë me terapi të insulinës.

Përkundër mungesës së kohëpaskohshme të insulinës në të kaluarën dhe numrit gjithnjë në rritje të pacientëve që preken nga diabeti, këtë vit, furnizimi me këtë ilaç esencial në Qendrën Kryesore të Mjekësisë Familjare është i mjaftueshëm për të gjithë pacientët.

Lirije Mahmuti teknike e farmacisë në QKMF të Ferizajt tregoi për procedurën e regjistrimit që duhet ta ndjekin pacientët e rinj, në mënyrë që të furnizohen me insulinë e cila jepet falas. 

“Procedura shkon me recetë të mjekut, së pari shkon me raport të specialistit të cilën e cekë specialisti dhe duhet me marr recetën tek mjeku familjar dhe me i sjellë dokumentet këtu. Nëse është pacient i ri shtrihet në spital, por prej momenti që lirohet nga spitali vjen tek ne dhe ne i kërkojmë dokumentet që duhet me u regjistru dhe furnizohet tek ne me insulinë për çdo muaj. Një herë në muaj e merr dhe i japim ne për një muaj komplet, varet sa ka njësi. Shembull, ky pacient që i ka 20 njësi në mëngjes 20 në mbrëmje shkojnë 4 copë insulina dhe ia japim 4 copat përnjëherë për një muaj.”

Lirije Mahmuti – Teknike e farmacisë në QKMF të Ferizajt

Mahmuti tha se furnizimi i fundit me sasi të insulinës ka ardhur me 15 shkurt dhe në stoqet e barnatores ka sasi të mjaftueshme të tre llojeve të insulinës. 

“Kemi tri lloje të insulinës, atë NovoMix , NovoRapid dhe Levemir. Furnizimi me këto tre lloje është i mjaftueshëm dhe shumë i mirë. Numri i pacienteve  shkon rreth 900 pacientë, mirëpo për çdo muaj shtohen pacientët. Tek ne, nëse mungon njëri lloj i insulinës, pacientit nuk mundem t’ia zëvendësoj me tjetrën insulinë, sepse secila insulinë e ka veprimin e vet të ndryshëm.

Bahrie Salihu, e cila vuan nga diabeti,  tha se tash e 10 vite furnizohet me insulinë në këtë barnatore dhe me përjashtim të disa rasteve, insulina nuk ka munguar.

“Me insulina jam që 10 vite por furnizimi  kryesisht është i rregullt. Para 2 viteve ka pasur pak mungesë por tash është mirë. Tash në kohën e fundit e kanë ndarë që 2 herë me data me ardhë me i marr insulinat që mos me u bë këtu grumbulli i pacienteve.

Bahrie Salihu – Banore e Ferizajt

Në Qendrën e Mjekësisë Familjare në Ferizaj, aktualisht janë në stok mbi 4 mijë e 600 insulina, derisa furnizimi i rregullt me sasi të reja bëhet në baza mujore.