Në bibliotekën Sadik Tafarshiku sot u mbajt një takim përkujtimor për veprimtarinë letrare të poetit Ymer Elshani.

Drejtoresha e bibliotekës Teuta Demiri, në hapje të kësaj ngjarjeje tha se veprat e Elshanit do të mbesin pjesë e kujtimeve tona përherë.

“Poetët janë ata që e bëjnë këtë ditë, prandaj edhe kemi zgjedhur që në muajin Prill të promovojmë dhe të ruajmë në kujtesë veprën e poetit Ymer Elshani. Ky emër që ka hyrë në mendjet tona që në fëmijëri, ka skalitur tani në mendjet tona edhe dhembshurinë dhe fatin e tij tragjik. Në prill të vitit 1999 atij iu ndalua të shkruajë poezi, por ai shkruajti historinë.” tha Demiri.

Teuta Elshani, e bija e të ndjerit Ymer Elshani rikujtoi rëndësinë që shkrimtarët bartin mbi supet e veta gjatë veprimtarisë së tyre.  

“Pas luftës kam botuar të gjitha dorëshkrimet e prindit, sepse ai la pas vetes shumë dorëshkrime. Gjendja e vështirë e para luftës nuk ia mundësonte atij të botoj, por ai asnjëherë nuk u ndal të shkruajë. 11 vepra i kemi botuar pas lufte unë bashkë me vëllezërit e Ymerit, sepse ishte momenti që t’i ruajmë që ato të mos humbin. Ishte e vetmja gjë që na kishte mbetur nga ai, e për fat në fatkeqësi, shkrimet nuk i humbën.” tha Elshani

I pranishëm në këtë ngjarje ishte edhe deputeti i Kuvendit të Kosovës Enver Dugolli, i cili shpalosi një kujtim nga jeta e shkrimtarit gjatë kohës sa në Kosovë po organizoheshin demonstratat e viteve të 80-ta.

“Ymer Elshani Ishte drejtor i shkollës së mesme në Drenas dhe përkundër atyre pengesave që bënte pushteti, Ymer Elshani e gjeti një mënyrë se si edhe profesorët të jenë pjesë e demonstratave kështu duke i urdhëruar të shkojnë me nxënësit që të mos i lënë vetëm. Ne protestonim e demonstronim së bashku me profesorët e iniciator i asaj pjesëmarrjeje të profesorëve ishte Ymer Elshani.”

Xhevat Syla, studiues i letërsisë, shpalosi biografinë e poetit Elshani e poashtu duke e  vlerësuar lartë krijmtarinë e tij letrare.

“Krimi ka qenë shumë i madh, në rradhë të parë aty ka shku poeti, shkrimtari Ymer ELshani i cili vërtetë ka qenë një shkrimtar, vepra e të cilit ndoshta më shumë së e gjithë të tjerëve ka rrezatu humanizëm, dashuri për njeriun, pa dallim ngjyre, kombi, race ka qenë e tillë, e gjithë vepra e tij. Por krahas tij, që krimi të bëhej edhe më i madh, në atë turmë janë gjetur edhe katër djemtë e tij. E vetmja e asaj familje, Teuta e cila ka qëllu tek agja i vet në Prishtinë dhe falë atij fati, tani e kemi të pranishme këtu edhe e kemi faktikisht një pjesë edhe të familjes por edhe një pjesë të vetë shkrimtarit Elshani.”

Profesori Anton Berisha, theksoi se jo të gjithë që shkruajnë janë poet, ndërsa veprat e poetit Elshani janë art në vetvete.

“Letërsia është art, gjithçka përtej artit e ka jetën e shkurtë. Vetëm arti është ajo që e bën një vepër apo një shkrimtar të pavdekshëm, asgjë tjetër. Nëse e lexojmë poezinë e Ymerit, atëherë vërejmë se jo të gjithë që shkruajnë janë poet.”

Shkrimtari Ibrahim Kadriu, tha se ne ende nuk i kemi larë borxhin shkrimtarit Elshani, edhe pse kanë kaluar 22 vite kur ai dhe gjithë familja janë vra.

“Është bërë alarm këtë kohë rreth shtëpisë së tij, të bëhet muze apo mos të bëhet. Kjo për ne është me të vërtetë një tragjedi, është një e keqe të cilën ne në Kosovë e bartim për shumë personalitete, por ky ishte personaliteti më i madh.”

Shkrimtari Ymer Elshani u vra më 17 prill të vitit 1999 nga forcat serbe në fshatin Poklek të vjetër të Drenasit bashkë me gruan, të katër djemtë, nënën, kunatën dhe me afro gjashtëdhjetë bashkëfshatarë të tij.