Kur dalim dhe ecim nëpër sheshe, shumica e njerëzve kanë telefon në duar, për dallim që vite më parë qytetarët kishin në duar gazeta e libra.

Kjo ka ndikuar që në qytetin e Ferizajt të zvogëlohet numri i librarive.

Rinor Berisha, librar nga libraria “Rilindja” thotë se me kalimin e viteve interesi për librin po bie.

“Interesimi për libra, çdo vit e më shumë është në rënie, ndoshta arsyet konkretisht nuk dihen se pse po ndodh ky fenomen. Por këtë rast më së miri mund ta dëshmojë edhe se në qyteti e Ferizajt, libraritë janë në numër shumë të vogël dhe ato që janë merren kryesisht me furnizime shkollore e material për zyre sepse për libër kërkesa është shumë e vogël. Tek ne kryesisht shiten titujt “Best Seller” që kanë reklamim më të madh dhe lektyrat shkollore që janë të domosdoshme nga mësimdhënësit. Përndryshe kërkesa nuk është në rritje por çdo vit e më shumë është duke rënë” deklaroi Rinor Berisha – Librar

Shkrimtari dhe publicisti Bardh Frangu, me të cilin TV Tema komunikoi me shkrim, thotë se mësimdhënësit e gjuhës shqipe nuk po e kultivojnë leximin tek nxënësit tanë.

“Niveli u civilizimit të një shoqërie matet me moshën e shkollimit të saj. Ne ende mësuesit e parë i kemi gjallë. Sigurisht që kjo reflekton në mungesën e konsumimit të librit, përkatësisht të mungesës së leximit. Në qytetin tonë kurrë nuk patëm një librari ku shitet vetëm libri, por të tilla ku libri ekspozohet mes shkumësave, lapsave, çantave, topave… Edhe bibliotekat nëpër shkolla nuk janë në gjendje më të mirë. Zakonisht librat vendosen nëpër kthina dhe janë të rëndësisë së dytë. Për më keq, tash viteve të fundit ato janë shndërruar në depo, ku grumbullohen librat e atyre që botojnë pa kriter dhe i shpërndajnë nëpër biblioteka. E librat e dhuruar nuk preferohen për lexim, aq më tepër për fëmijët. E keqja është se edhe arsimtarët e gjuhës, shumica nga ta, nuk kultivojnë kulturën e leximit, sepse nuk e kanë atë. Për me keq tani libri refuzohet edhe shkaku i teknologjisë, nëpërmjet të cilës mund të konsumohen edhe imazhe të ndryshme, që injorantët besojnë se është kompensim i leximit. Për sa kohë do të jetojmë nën pushtetin e injorancës dhe mediokritetit libri do të jetë i dënuar me refuzim.” thotë Bardh Frangu – Shkrimtar dhe publicist

Bardh Frangu – Shkrimtar dhe publicist

Në anën tjetër, librari Berisha shton se edhe zbritjet nuk po ndikojnë në rritjen e shitjes së librit.

“Tash librat mund të gjinden edhe në formën online por ky është një fenomen që po ndodhë çdo ditë dhe ne nuk jemi të kënaqur si librari me librat që po i shesim. Jemi edhe ne të interesuar, po i stimulojmë (lexuesit) ndonjëherë edhe me zbritje edhe pse fitimi në libra është i vogël por prapë se prapë, nuk e di…” deklaroi Rinor Berisha – Librar

Derisa të vazhdohet blerja e librave vetëm për të mbushur raftet e thata në shtëpitë tone, vendi ynë do të ketë probleme me kulturën e leximit por edhe me nivelin e edukimit e arsimit në përgjithësi.

Të ngjashme

Të tjera