Kosovë

Rritet numri i turistëve në Kosovë, ndikuan edhe festivalet ndërkombëtare

Published

3 years ago

10 August, 2022

Këtë vit Kosova ka shënuar rritje të numrit të vizitorëve nga e gjithë bota. Krahasuar me periudhën e njëjtë të vitit të kaluar deri më tash, ka pasur rritje prej mbi 25 për qind të vizitorëve, thotë kryetari i Unionit të Turizmit të Kosovës, Baki Hoti.

Ai apelon institucionet shtetërore për zhvillim të infrastrukturës në mënyrë që vendi të tërheq sa më shumë turistë

Hoti thotë se këtë vit, aktivitetet kulturore si “Manifesta”, Sunny Hill” dhe “Dokufest” kanë ndikuar në rritjen e numrit të turistëve në vend.

“Kjo është pozitive, unë mund të them që kemi një rritje mbi 25 për qind në krahasim me vitin e kaluar në të njëjtën periudhë, kështu që na gëzon fakti që numrit i turistëve dita ditës po shtohet dhe ka kërkesa nga agjenci të ndryshme, nga individë të ndryshëm, nga grupe të ndryshme që ta vizitojnë Kosovën, duke pasur parasysh edhe aktivitetet të cilat janë duke ndodhur në Kosovë dhe këto kanë rritur frekuentimin dhe numrin e turistëve”, thotë ai.

Megjithëkëtë, kryetari i Unionit të Turizmit të Kosovës thotë se mund të bëhet edhe më shumë në mënyrë që përmes atraksioneve të ndryshme Kosova të tërheq edhe më shumë vizitorë.

“Jemi duke punuar për çdo ditë për t’i ngritur këto kapacitete, institucionet e Republikës së Kosovës duhet të punojnë shumë më tepër sa i përket pjesëve të infrastrukturës dhe bizneset pra komunitetet të punojnë në zhvillimin e produkteve dhe të shërbimeve të cilat janë me vlerë jashtëzakonisht të madhe. Pra ne bashkërisht qoftë institucionet qoftë akterët tjerë duhet të punojmë bashkërisht me qëllim që të ofrojmë kushte sa më të përshtatshme për një zhvillimi sa më të madh të turizmit dhe tërheqjes sa më të madhe të turistëve për ta vizituar Kosovën”, shton ai.

Sa i përket situatës me pandeminë COVID-19 dhe rritjes së rasteve, Hoti thotë se nuk ka pasur ndonjë problem për ardhjen e vizitorëve nga jashtë.

Hoti thekson se në kuadër të Unionit të Turizmit në Kosovë janë duke punuar në disa projekte, përmes të cilave interesuarit do të mund të informohen për aktivitetet kulturore që ndodhin në vend, por edhe për zonat turistike.

Ai thotë se përmes bashkëpunimeve ndërkombëtare, synojnë të shkollojnë edhe të rinjtë në fushën e turizmit.

“Në kuadër të Unionit të Turizmit të Kosovës ne jemi duke punuar jashtëzakonisht shumë, ju e dini që brenda këtij viti kemi realizuar pesë projekte promovuese për turizmin të Kosovës. Tash së fundi, kemi bërë përditësimin e aplikacionit ‘Think Kosova’, i cili është një aplikacion që shkarkohet në dy platforma Android dhe IOS, është pa pagesë për qytetarët por edhe për vizitorët por së shpejti besojmë që do të shkon nëpërmes Ministrisë së Punëve të Jashtme nëpër të gjitha ambasadat dhe zyrat diplomatike ku Kosova ka në mbarë botën me qëllim që të jetë një ndër adresat e promovimit të turizmit të Kosovës”, tregon ai.

Agjencia e Statistikave të Kosovës (ASK) para disa ditësh ka publikuar Statistikat e Hotelerisë në Kosovë për muajin maj 2022, sipas të cilave del se 32 mijë e 444 persona kanë vizituar hotelet gjatë kësaj periudhe.

Sipas ASK-së, prej tyre 37.12 për qind ishin vendorë dhe 62.88 për qind ishin të huaj./KP

Kosovë

Avokati i Popullit kërkon pezullimin e vendimeve për rritjen e çmimit të energjisë elektrike

Published

1 day ago

30 April, 2025

Redaksia

Avokati i Popullit ka kërkuar nga Zyra e Rregullatorit për Energji (ZRrE) pezullimin e vendimeve që kanë të bëjnë me rritjen e çmimit të energjisë elektrike (V_2697_2025 dhe V_2698_2025), deri në përfundimin e hetimeve lidhur me ankesat e qytetarëve.

Avokati i Popullit thekson se Vendimi për rritjen e tarifave ka ndikim të drejtpërdrejtë në të drejtat themelore të njeriut, duke rënduar veçanërisht grupet më të cenueshme dhe familjet në asistencë sociale. Kjo situatë ngrit shqetësime serioze për përballueshmërinë ekonomike të qytetarëve dhe qasjen e barabartë në shërbimet bazë.

Avokati i Popullit vë në pah mungesën e koordinimit institucional dhe nënvizon se këto vendime janë marrë në një moment boshllëku institucional – pa Kuvend të konstituuar dhe pa Qeveri të mandatuar, gjë që ka ndikuar në mungesën e debatit të nevojshëm publik dhe institucional për çështje që janë me rëndësi jetike për qytetarët.

Avokati i Popullit rikujton se Qeveria e Republikës së Kosovës, në përputhje me Ligjin Nr. 05/L-085 për Energjinë Elektrike, mban përgjegjësi për garantimin e interesit publik, sigurimin e qasjes të barabartë dhe përfshirjen sociale në politikat energjetike. Vendimet që prekin në mënyrë kaq të drejtpërdrejtë mirëqenien e qytetarëve duhet të jenë gjithëpërfshirëse, të bazuara në analizë të thelluar sociale dhe të ndërmerren vetëm në kohë kur institucionet janë funksionale dhe të koordinuara për të mbrojtur interesin e përgjithshëm shoqëror.

Avokati i Popullit thekson nevojën që organet e pavarura si ZRrE, duhet të kenë përgjegjësi të shtuar, transparencë dhe bashkëpunim me institucionet përkatëse, sidomos kur vendimet prekin interesin publik në masë të madhe.

R. nr. 538/2025, Kërkesë për pezullimin e zbatimit të vendimit V_2697_2025 dhe të vendimit V_26982025 të datës 11 prill 2025

Kosovë

Nga 5 maji kosovarët mund të udhëtojnë në Izrael pa viza

Published

1 day ago

30 April, 2025

Redaksia

Qytetarët e Kosovës nga 5 maji 2025 do të mund të udhëtojnë në Izrael për qëllime turistike pa viza.

Kështu ka njoftuar ambasadorja e Shtetit të Izraelit në Republikën e Kosovës, Tamar Ziv, përmes një postimi në platformën X.

Megjithatë, së paku 72 orë përpara udhëtimit, shtetasit e Kosovës duhet të pajisen me një Autorizim Elektronik për Udhëtim (ETA-IL), i vlefshëm për qëndrime deri në 90 ditë për çdo vizitë.

Procesi i aplikimit për ETA-IL kryhet në mënyrë elektronike përmes faqes zyrtare të autoriteteve izraelite https://israel-entry.piba.gov.il/learn-about/

Kosovë

Dështon edhe për herë të tetë konstituimi i Kuvendit

Published

2 days ago

29 April, 2025

Redaksia

Ka përfunduar pa sukses edhe përpjekja e tetë për konstituimin e Kuvendit të Kosovës, pasi kandidatja e Lëvizjes Vetëvendosje, Albulena Haxhiu, nuk arriti t’i merr 61 votat e nevojshme për kryetare të Kuvendit.

Në vazhdimin e sotëm të seancës, Haxhiu mori 54 vota për, kundër ishin 44 dhe 3 deputetë abstenuan.

Edhe para votimit të sotëm, nga PDK-ja thanë se nuk do ta votojnë Albulena Haxhiun pasi kandidaturën e saj nuk e konsiderojnë bashkuese derisa kryetari i AAK-së, Ramush Haradinaj u shpreh se vetëm një ndërrim i kandidatit për kryeparlamentar mund të sjellë zhvillime të reja.

Kryetari i Nismës, Fatmir Limaj tha se ai bashkë me dy deputetet e kësaj partie abstenuan në votim duke theksuar se partia e tij do të japë kontributin maksimal për të shmangur zgjedhjet, por nuk i përjashtoi ato si opsion të fundit në mungesë të një zgjidhjeje tjetër.

LDK-ja ka vazhduar me qëndrimin e saj se nuk do ta votojë asnjë kandidat të Lëvizjes Vetëvendosje për kryetar të Kuvendit, tha deputeti i zgjedhur i kësaj partie, Arben Gashi.

Në anë tjetër, Ministri në detyrë i Financave, Hekuran Murati, tha se ka deputetë individualë të partive tjera që kanë shprehur dëshirë që të votojnë për Albulena Haxhiut për kryeparlamentare, por që kjo, sipas tij, nuk po iu lejohet nga partitë e tyre.

Vazhdimi i seancës mbahet të enjten me fillim në ora 10:00.