Kosovë

Fillojnë në Hagë deklarimet përmbyllëse për rastin e Sali Mustafës

Published

4 years ago

13 September, 2022

Disa nga dëshmitarët në gjykimin e Salih Mustafës, ish-pjesëtar i Ushtrisë Çlirimtare të Kosovës(UÇK), konfirmuan qartë se ishin viktima, sepse pjesëtarët e UÇK-së i konsideronin “armiq të Kosovës apo spiunë”, thuhet në deklaratën përmbyllëse të Prokurorisë së Specializuar të Kosovës në Hagë.

Bëhet fjalë kryesisht për shqiptarë të Kosovës dhe prokurori Jack Smith shpjegoi se viktimat kanë kaluar nëpër agoni gjatë gjithë këtyre viteve, si dhe rikujtoi disa dëshmi, në të cilat dëshmitarët kanë thënë se edhe sot “dëgjojnë zërat e njerëzve që i kanë torturuar”.

Deklaratat përmbyllëse para Dhomave të Specializuara (Gjykata Speciale) në Hagë duhet të përfundojnë më 16 shtator.

Prokuroria e specializuar e akuzon Salih Mustafën për krime lufte dhe krime kundër njerëzimit, përkatësisht se ai ka nxitur ose urdhëruar akte kriminale të privimit arbitrar nga liria, trajtim mizor, torturë dhe vrasje.

Në ditën e parë të deklaratave përmbyllëse, Smith theksoi se gjykata duhet të fokusohet te viktimat.

“Tortura ka lënë efekte afatgjata, si në psikikën, ashtu edhe në trupin e viktimave”, theksoi Smith.

Ai tha se qëllimi i këtyre torturave ka qenë identifikimi i shqiptarëve të Kosovës që nuk e kanë përkrahur Ushtrinë Çlirimtare të Kosovës.

Prokuroria e Specializuar pohoi se individët ende ndiejnë frikë të flasin lirshëm për torturat që kanë përjetuar, duke theksuar se këta persona nuk kanë qenë kurrë “armiq të Kosovës”.

“Viktimat janë etiketuar si bashkëpunëtorë dhe spiunë që punojnë për armikun, sepse nuk e kanë përkrahur mjaftueshëm UÇK-në, prandaj janë burgosur në një pronë në Zllash”, tha prokurori Smith.

Në paraqitjen e tij të parë në Gjykatën Speciale në Hagë, Mustafa refuzoi të deklarohet për fajësinë.

Për çfarë ngarkohet Mustafa?

Gjykimi i Salih Mustafës ka nisur më 15 shtator të vitit 2021 dhe ky është gjykimi i parë për krime lufte që ka nisur në Dhomat e Specializuara.

Mustafa u arrestua në 24 shtator të vitit 2020 dhe është personi i parë i arrestuar kundër të cilit u konfirmua aktakuza, prej që janë formuar Dhomat e Specializuara dhe Prokuroria e Specializuar, në vitin 2015.

Pretendohet se Salih Mustafa, i njohur gjithashtu si komandant Cali, ishte komandant i njësisë guerile Agjencia për siguri dhe informacion, e cila i përkiste zonës operative të Llapit të UÇK-së.

Ish-eprori i UÇK-së, Salih Mustafa gjatë nisjes së gjykimit ndaj tij pranë Dhomave të Specializuara në Hagë më 15 shtator 2021.

Kjo njësi, në përbërjen e saj, kishte afërsisht 500-600 trupa, të cilat vepronin kryesisht në zonat e qytetit në Prishtinë dhe Obiliq, në rrethinat e tyre, si dhe në zonën e Gollakut, ku ndodhet fshati Zllash.

Gjithashtu, thuhet se veprat penale, për të cilat janë paraqitur akuzat, kanë ndodhur në kontekstin e “konfliktit të armatosur” dhe kanë qenë të ndërlidhura me konfliktin e armatosur në Kosovë, ndërmjet UÇK-së dhe forcave të Republikës Federative të Jugosllavisë (RFJ) dhe Republikës së Serbisë, “përfshirë edhe njësitë e Ushtrisë së Jugosllavisë, njësitë e policisë dhe njësitë tjera të Ministrisë së Punëve të Brendshme, si dhe grupeve tjera që luftonin në anën e RFJ-së dhe Serbisë”.

Më tej, thuhet se në periudhën nga 1 prilli 1999 deri më 19 prill 1999, Salih Mustafa dhe anëtarët e tjerë të UÇK-së kanë mbajtur të mbyllur në një pronë në Zllash, të paktën gjashtë persona.

Gjithashtu, thuhet se gjatë prillit të vitit 1999, në atë vend, është vrarë një i burgosur.

Ndër të tjera, shtohet se Mustafa “së bashku me anëtarët e tjerë të UÇK-së”, e morën një person për ta marrë në pyetje, identiteti i të cilit ishte i fshehur, “dhe urdhëroi që ta rrihnin”. Siç thuhet në aktakuzë, derisa po e rrihnin me mjete të ndryshme të forta, atij personi iu tha se është “spiun dhe se do ta vrisnin”.

Zyra e Prokurorit të Specializua të Kosovës në Hagë po heton krimet e pretenduara të anëtarëve të Ushtrisë Çlirimtare të Kosovës të kryer kundër pakicave etnike dhe rivalëve politikë në periudhën nga janari 1998 deri në dhjetor 2000./REL

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

20 hours ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Kosovë

Aktakuzë ndaj katër të dyshuarve për manipulim të votave në Shtime

Published

20 hours ago

18 March, 2026

Redaksia

Prokuroria Themelore në Ferizaj ka ngritur aktakuzë kundër katër personave nën dyshimin për falsifikim të votave të kandidatëve për deputetë në një qendër numërimi në Shtime.

Sipas aktakuzës së Prokurorisë, të pandehurit: Y.S, B.V, Sh.B dhe R.R, më datë 30.12.2025, në Qendrën Komunale të Numërimit në Shtime, gjatë procesit të numërimit të votave në cilësinë e anëtarëve të ekipit të numërimit, duke vepruar në bashkëkryerje dhe me dashje kanë ndërmarrë veprime të koordinuara dhe të ndërlidhura, me qëllim të shtrembërimit të rezultateve të votimit.

Kështu, i pandehuri Y.S, akuzohet se i kishte lexuar dhe komunikuar në mënyrë të pasaktë dhe të pakontrolluar votat nga fletëvotimet, kurse B.V. akuzohet se duke përdorur qasje ekskluzive në sistemin elektronik të KQZ-së, kishte regjistruar të dhëna të pasakta në sistem, pa lejuar mekanizma verifikimi dhe kontrolli nga anëtarët e tjerë.

Dy të pandehurit tjerë, Sh.B dhe R. R., akuzohen se, edhe pse ishin të pranishëm dhe pjesëmarrës në procesin e ndarjes dhe verifikimit të fletëvotimeve, me vetëdije kishin dështuar të ndërmarrin veprime për të parandaluar ose korrigjuar parregullsitë. Kësisoj, përmes këtij mekanizmi të organizuar të veprimit dhe mungesës së kontrollit të ndërsjellë, janë regjistruar rezultate të pasakta të votimit për kandidatët, të cilat janë konstatuar si mospërputhje thelbësore gjatë procesit të rinumërimit në Qendrën e Numërimit dhe Rezultateve (QNR), duke cenuar drejtpërdrejt integritetin, besueshmërinë dhe ligjshmërinë e procesit zgjedhor.

Me këto veprime, të akuzuarit në bashkëkryerje kanë kryer veprën penale “Falsifikimi i rezultateve të votimit”.

Pas zgjedhjeve të parakohshme parlamentare të Kosovës të mbajtura më 28 dhjetor 2025, hetime për manipulim të votave u zhvilluan në Prizren, Ferizaj, Mitrovicë, Malishevë dhe Podujevë.

Kosovë

Tre shtetas të Kosovës vdesin në një aksident në punishte ndërtimi në Vjenë

Published

1 day ago

18 March, 2026

Redaksia

Tre shtetas të Kosovës kanë humbur jetën si pasojë e një aksidenti në një punishte ndërtimi në Vjenë, kanë bërë të ditur autoritetet dhe Ambasada e Kosovës në Austri.

Sipas njoftimit fillestar të Ambasadës, aksidenti ka ndodhur në distriktin Alsergrund, gjatë punimeve ndërtimore, kur një pjesë e konstruksionit është shembur, duke lënë punëtorë të bllokuar nën rrënoja.

Fillimisht, autoritetet kosovare konfirmuan se dy nga viktimat janë shtetas të Kosovës: Pajtim Bajrami (1990) dhe Asllan Musliu (1977).

Në një njoftim të përditësuar më 18 mars, Ambasada bëri të ditur se edhe viktima e tretë nga katër viktimat e përgjithshme të këtij aksidenti është shtetas i Kosovës, Istref Zekaj.

Ambasada e Kosovës në Austri tha se është në kontakt të vazhdueshëm me autoritetet austriake dhe me familjarët e viktimave, për të ofruar mbështetjen e nevojshme dhe për të koordinuar procedurat e mëtejme.

Kryeministri i Kosovës, Albin Kurti, reagoi për rastin duke shprehur tronditjen për ngjarjen dhe duke theksuar se institucionet janë në koordinim për t’u dalë në ndihmë familjeve të viktimave.

“Në këto momente të rënda, shpreh ngushëllimet e mia më të sinqerta për familjet e viktimave dhe të gjithë ata që janë prekur nga kjo humbje e madhe”, ka shkruar Kurti.

Në një përgjigje për REL-in, Policia e Austrisë tha se “disa punëtorë ndërtimi janë zënë nën dhe për arsye ende të paqarta” në oborrin e brendshëm të një ndërtese shumëbanesore.

Policia bëri të ditur gjithashtu të ditur se katër punëtorë janë gjetur pa shenja jete, ndërsa një tjetër është nxjerrë i gjallë dhe është dërguar për trajtim në spital.

Radio Evropa e Lirë ka kontaktuar e dhe Ministrinë e Punëve të Jashtme të Austrisë për më shumë informacione lidhur me rrethanat e aksidentit, por ende nuk ka marrë përgjigje.

Autoritetet austriake nuk kanë dhënë ende detaje të plota për shkaqet e shembjes së konstruksionit, ndërsa hetimet për rastin pritet të sqarojnë përgjegjësitë dhe kushtet e sigurisë në punishte.

| Radio Evropa e Lirë