Kosovë

156 policë të suspenduar gjatë vitit 2022

Published

4 years ago

06 January, 2023

Vitin e kaluar është shënuar numër rekord i arrestimeve dhe suspendimeve të policëve të Kosovës. Të njëjtit janë hetuar dhe është marrë masa për vepra penale korruptive. Vetëm gjatë vitit 2022 janë arrestuar mbi 100 policë, janë proceduar mbi 100 kallëzime penale dhe janë suspenduar 156 prej tyre.

Në intervistën për KP, kryeshefi ekzekutiv i Inspektoratit Policor, Kushtrim Hodaj flet për operacionet e njohura “Pika 1” dhe “Pika 2”, e po ashtu edhe për rastin e vrasjes së Hamide Magashit, ku u pasua me suspendime në stacionin policor në Lipjan.

Hodaj thotë se numri i ankesave për zyrtarët policorë është i lartë, raste të cila kanë të bëjnë me punën e tyre.

“Kemi pranuar mbi 1600 ankesa, është një shifër relativisht e lartë e numrit të ankesave që tashmë për vite me radhë adresohet edhe në drejtim të punës së policisë. Dhe këto ankesa janë trajtuar, janë trajtuar disa prej tyre që kanë elemente penale, janë trajtuar dhe hetuar penalisht nga hetuesit tanë. Disa prej tyre që janë vlerësuar që kanë elemente të shkeljeve administrative apo disiplinore janë kthyer në polici për trajtim administrativ”, tregon Hodaj.

Sipas tij, vitin e kaluar është numri më i lartë i të arrestuarve dhe të suspenduarve për raste të korrupsionit dhe keqpërdorim të detyrës zyrtare.

“Kemi pasur një ritëm të shtuar të punës dhe të fokusit në rastet e krimeve ekonomike apo raste të korrupsionit dhe të keqpërdorimit të detyrës zyrtare. Mund të themi lirisht që është viti që ka numrin më të lartë të të arrestuarve dhe të suspenduarve, e që kryesisht lidhet me veprat penale korruptive. E përmend këtu rastin e pikave të njohur si ‘Pika 1’ dhe ‘Pika 2’, që ka qenë një operacion i madh i luftës anti-korrupsion i zhvilluar jo vetëm në Kosovë.

Ka qenë një rast që e kemi hetuar bashkë edhe me ndihmën e institucioneve të tjera në Kosovë, mirëpo edhe me bashkëpunim ndërkombëtar, në këtë rast me Republikën e Shqipërisë. Janë diku 76 zyrtarë policorë të arrestuar vetëm në këto dy raste. Totali i zyrtarëve të arrestuar ka arritur në 107, që është shifra më e lartë që ka ndodhur ndonjëherë në një vit pune të Inspektoratit Policor të Kosovës”, shton Hodaj.

Duke u ndalur te operacionet e njohura si “Pika 1” dhe “Pika 2”, Hodaj thotë se zyrtarët policorë dyshohet se kanë marrë ryshfetit në këmbim të lejimit të kalimit ilegal të njerëzve dhe mallrave.

“Këtu kanë qenë dyshime që qytetarë, kontrabandistë, njerëz të dyshuar kanë kaluar kufirin në mungesë të dokumentacionit, apo kanë kaluar gjëra ilegale në kufi dhe në këmbim të kësaj, kanë dhënë ryshfet për zyrtarët policorë në ato pika.

Ne kemi pasur dyshime dhe në përdorimin e masave të fshehta kemi arritur të dokumentojmë qindra e qindra raste korruptive të zyrtarëve policorë dhe si rezultat i argumentimit të dyshimeve, ne në bashkëpunim me dhe me urdhër të Prokurorisë Speciale, kemi realizuar operacione ku kemi arrestuar këta zyrtarë dhe kemi konfiskuar provat të nevojshme për procedurë penale. Këta janë suspenduar, është dërguar kallëzimi penal në Prokurorinë Speciale. Prokuroria Speciale është duke punuar, është ndoshta pothuajse në përfundim të hetimeve për ngritjen e aktakuzës për pjesën më të madhe të tyre. Dhe këta mbesin të suspenduar derisa të qartësohet përgjegjësia e tyre penale”, shton Hodaj.

Më tej, kryeshefi ekzekutiv i IPK-së deklaron se gjatë vitit 2022 janë suspenduar mbi 150 zyrtarë policorë e po ashtu janë proceduar mbi 100 kallëzime penale.

“Si rezultat i hetimeve të tjera penale dhe kallëzimeve penale që janë ngritur në prokurori është rekomanduar suspendimi te drejtori i përgjithshëm të policisë për 156 zyrtarë që suspendohen për efekte, apo për nevoja të hetimeve që kemi zhvilluar ne. Edhe kjo shifër është ndër më të lartat që ka ndodhur ndonjëherë, si rezultat i rasteve edhe të kufirit që ka qenë rasti më masiv.

Janë proceduar mbi 100 kallëzime penale apo raporte të veçanta në prokurori përkatëse të shtetit për këto dhe raste të tjera. Gjithashtu, kemi pasur një dinamikë të re dhe numër të madh inspektimeve, ku kemi inspektuar fushat e ndryshme të menaxhimit policor. Kemi realizuar pesë inspektime që kanë qenë të planifikuara me planin vjetor të inspektimeve, gjithashtu kemi realizuar edhe shtatë inspektime të jashtëzakonshme cilat kanë ndodhur për shkak të ngjarjeve që kanë ndodhur gjatë vitit”, njofton Hodaj për KP.

Ai flet edhe për rastin e 35-vjeçares, Hamide Magashi, e cila gjatë muajit nëntor u vra nga ish-bashkëshorti i saj. Hodaj thekson se ka dyshime të bazuara që disa prej raporteve janë plotësuar pas rastit tragjik.

“Kemi krijuar një grup të veçantë hetimor dhe inspektues, të cilët kanë verifikuar veprimet që janë ndërmarrë prej momentit të paraqitjes së rastit e deri në ditën kritike kur e ndjera është vrarë. Ne kemi gjetur, apo kemi dyshimet tona të bazuara, që disa prej raporteve janë plotësuar pas ndodhjes së rastit tragjik.

Dhe kjo për ne ka qenë shqetësuese dhe kjo ka qenë arsyeje që zyrtarët përgjegjës, duke përfshirë edhe komandantin e policisë, është rekomanduar suspendimi për ta. Hetimet janë në zhvillim e sipër dhe për përgjegjësinë përfundimtare të tyre apo të zyrtarëve të tjerë që mund të dalin përgjegjës në këtë rast, sigurisht që do t’i japim në një moment tjetër për shkak se jemi në proces të hetimit”, thekson Hodaj.

Kosovë

Kushtetuesja: Qeveria u zgjodh në përputhje me Kushtetutën, presidenti të zgjidhet deri më 6 tetor

Published

5 hours ago

23 September, 2026

Redaksia

Gjykata Kushtetuese e Kosovës ka konstatuar se Qeveria e udhëhequr nga Albin Kurti është zgjedhur në përputhje me Kushtetutën.

Sa i përket zgjedhjes së presidentit, Gjykata ka sqaruar se afati 60-ditor ka nisur më 8 gusht dhe përfundon më 6 tetor.

Vendimi i publikuar pasditen e sotme vjen pas ankesave të Partisë Demokratike të Kosovës, e cila kishte kontestuar konstituimin e Kuvendit dhe formimin e Qeverisë.

Gjykata ka konstatuar se Kuvendi, i konstituuar më 13 shtator, e ka tejkaluar afatin kushtetues prej 30 ditësh. Megjithatë, deputetët duhet të zgjedhin ende nënkryetarin e dytë të Kuvendit, i cili duhet të jetë nga PDK-ja, si partia e dytë e dalë nga zgjedhjet e 7 qershorit.

Kushtetuesja ka rrëzuar gjithashtu edhe kërkesën për masë të përkohshme ndaj punimeve të Kuvendit.

Kuvendi u konstituua më 13 shtator me votat e deputetëve të Lëvizjes Vetëvendosje, Lidhjes Demokratike të Kosovës dhe përfaqësuesve të komuniteteve joshumicë, në mungesë të deputetëve të PDK-së dhe AAK-së.

Disa orë më vonë, Kuvendi votoi edhe Qeverinë e re, të udhëhequr nga Albin Kurti.

Njoftim për vendim në rastet KO256/26 dhe KO258/26

23.09.2026

Gjykata Kushtetuese e Republikës së Kosovës, më 23 shtator 2026, vendosi lidhur me kërkesat e bashkuara KO256/26 dhe KO258/26, në lidhje me vlerësimin e kushtetutshmërisë së “Vendimit nr. 11-V-002, të 9 shtatorit 2026, për zgjedhjen e Kryetares së Kuvendit; Vendimit procedural të 11 shtatorit 2026 për mënyrën e votimit të nënkryetarëve; dhe konstatimit të 13 shtatorit 2026 për konstituimin e legjislaturës XI të Kuvendit”, si dhe “Vendimit Nr. 11-V-007, të 13 shtatorit 2026, për zgjedhjen e Qeverisë së Republikës së Kosovës”, të parashtruar nga: KO256/26, Arian Tahiri dhe nëntë (9) deputetë të tjerë të Kuvendit të Republikës së Kosovës; dhe KO258/26, Arian Tahiri dhe dhjetë (10) deputetë të tjerë të Kuvendit të Republikës së Kosovës, bazuar në paragrafin 5 të nenit 113 [Jurisdiksioni dhe Palët e Autorizuara] të Kushtetutës së Republikës së Kosovës.

Gjykata, njëzëri, vendosi:

1. TË DEKLAROJË kërkesën të pranueshme;
2. TË KONSTATOJË që Kuvendi i Republikës së Kosovës është konstituuar pas kalimit të afatit tridhjetë (30) ditor, të përcaktuar në paragrafin 1 të nenit 66 [Zgjedhja dhe Mandati] të Kushtetutës së Republikës së Kosovës;
3. TË KONSTATOJË që kalimi i afatit tridhjetë (30) ditor për konstituimin e Kuvendit të Republikës së Kosovës, të përcaktuar në paragrafin 1 të nenit 66 [Zgjedhja dhe Mandati] të Kushtetutës së Republikës së Kosovës, ka për pasojë fillimin e rrjedhjes së afateve kushtetuese për zgjedhjen e Presidentit të Republikës së Kosovës, kur posti i Presidentit është vakant dhe për zgjedhjen e Qeverisë së Republikës së Kosovës sipas neneve 86 [Zgjedhja e Presidentit], 95 [Zgjedhja e Qeverisë] dhe nënparagrafëve 1 dhe 3, paragrafit 1 të nenit 82 [Shpërndarja e Kuvendit] të Kushtetutës së Republikës së Kosovës;
4. TË KONSTATOJË që deputetët e Kuvendit të Republikës së Kosovës duhet që sa më parë të zgjedhin Nënkryetarin e Kuvendit të Republikës së Kosovës nga radhët e grupit të dytë më të madh parlamentar, në pajtim me paragrafin 3 të nenit 67 [Zgjedhja e Kryetarit dhe Nënkryetarëve] të Kushtetutës së Republikës së Kosovës;
5. TË KONSTATOJË që Vendimi [Nr. 11-V-007] i 13 shtatorit 2026 i Kuvendit të Republikës së Kosovës për zgjedhjen e Qeverisë së Republikës së Kosovës nuk është në kundërshtim me nenin 95 [Zgjedhja e Qeverisë] të Kushtetutës së Republikës së Kosovës;
6. TË KONSTATOJË që afati gjashtëdhjetë (60) ditor për zgjedhjen e Presidentit të Republikës së Kosovës, sipas nënparagrafit 3, paragrafit 1 të nenit 82 [Shpërndarja e Kuvendit] të Kushtetutës së Republikës së Kosovës ka filluar më 8 gusht 2026 dhe përfundon më 6 tetor 2026;
7. TË REFUZOJË kërkesën për masë të përkohshme;
8. T’UA KUMTOJË këtë Aktgjykim palëve;
9. TË PUBLIKOJË këtë Aktgjykim në Gazetën Zyrtare të Republikës së Kosovës, në pajtim me paragrafin 4 të nenit 20 (Vendimet) të Ligjit nr. 03/L-121 për Gjykatën Kushtetuese të Republikës së Kosovës;
10. TË KONSTATOJË që ky Aktgjykim hyn në fuqi në ditën e publikimit të tij nga Gjykata Kushtetuese e Republikës së Kosovës.

Botë

Trump falënderon Kosovën për kontributin me trupa në Bordin e Paqes

Published

1 day ago

22 September, 2026

Redaksia

Presidenti amerikan, Donald Trump, ka falënderuar Kosovën për kontributin e saj në Bordin e Paqes – nismës së udhëheqësit amerikan për arritjen e paqes në botë.

“Dua të falënderoj ato shtete që kanë vendosur të kontribuojnë me trupa, e trajnime për të stabilizuar Gazën, përfshirë Indonezinë, Marokun, Shqipërinë, Kosovën, Kazakistanin, Egjiptin, Jordaninë dhe të tjerë”, tha Trump gjatë fjalimit para Asamblesë së Përgjithshme të Kombeve të Bashkuara.

Gjatë fjalimit të tij, Trump e përmendi Kosovën dhe Serbinë edhe në kontekstin e ndaljes së një lufte, duke deklaruar se i kërcënoi këto dy shtete se do të ndalte tregtinë e tyre me SHBA-në nëse do të shpërthente lufta.

Edhe në të kaluarën, Trump ka përmendur ndaljen e një përplasjeje të mundshëm mes Kosovës dhe Serbisë.

Ndryshe, Kosova është në mesin e pesë shteteve të para – së bashku me Indonezinë, Marokun, Kazakistanin dhe Shqipërinë – që janë zotuar për angazhim në misionin në Gazë, me qëllim ofrimin e sigurisë dhe mbikëqyrjen e armëpushimit në Rripin e Gazës.

Më 7 shtator, Kosova u bë formalisht pjesë e Forcës Ndërkombëtare Stabilizuese (ISF), pasi u nënshkrua marrëveshja formale për t’u bërë pjesë e kësaj force.

Marrëveshja, e nënshkruar nga komandanti i Forcës së Sigurisë së Kosovës (FSK), gjenerallejtënant Bashkim Jashari, dhe komandanti amerikan i ISF-së, gjeneralmajor Jasper Jeffers, formalizon përfshirjen e Kosovës në forcën e planifikuar.

“Ky zhvillim i rëndësishëm nënvizon përkushtimin e Kosovës ndaj misionit të ISF-së dhe mbështetjen e saj të vazhdueshme për planin 20-pikësh për Paqe të presidentit [Donald] Trump”, u tha në deklaratën e Bordit të Paqes.

Nënshkrimit të kësaj marrëveshjeje i ka paraprirë miratimi nga Kuvendi për dërgimin e FSK-së jashtë vendit dhe marrëveshjes për anëtarësim në Bordin e Paqes, si dhe autorizimit për dërgimin e tyre në Gazë nga Presidenca.

Ndërkaq, në prill një ekip i FSK-së shkoi në Rripin e Gazës për të bërë një vlerësim të vendit ku pritet të veprojnë trupat kosovare si pjesë e një force ndërkombëtare në territorin palestinez.

Forca Ndërkombëtare Stabilizuese buron nga një plan 20-pikësh i presidentit amerikan, Donald Trump, për t’i dhënë fund luftës së Izraelit në Gazë.

Trumpi krijoi Bord të Paqes për të mbikëqyrur planin e tij për t’i dhënë fund luftës së Izraelit në Gazë dhe për të rindërtuar territorin e shkatërruar.

Sipas planit, forca paqeruajtëse duhet të zhvendosen në Gazë për të siguruar zonat pas tërheqjes së forcave izraelite, si dhe t’i trajnojnë forca e reja policore palestineze dhe të mbështesin dërgimin e ndihmave atje.

Pjesa më e madhe e Gazës mbetet në rrënoja pas dy vjetësh luftë, e cila u shkaktua nga sulmet e udhëhequra nga Hamasi – grupi palestinez i shpallur organizatë terroriste nga SHBA-ja dhe BE-ja – më 7 tetor 2023.

Por, që nga njoftimi për një marrëveshje në fund të korrikut, përpjekjet për dërgimin e trupave kanë ngecur, pasi si Izraeli, ashtu edhe Hamasi nuk kanë pranuar t’i përmbushin kushtet që do ta mundësonin zbatimin e marrëveshjes.

| Radio Evropa e Lirë

Kosovë

Tre të lënduar në aksidentin mes trenit dhe veturës në Klinë

Published

1 day ago

22 September, 2026

Redaksia

Tre persona mbetën të lënduar si pasojë e një aksidenti mes trenit dhe veturës në fshatin Jagodë të Klinës.

Sipas njoftimit, rasti është raportuar mëngjesin e sotëm rreth orës 06:10.

Të lënduarit janë dërguar për trajtim në Spitalin Rajonal të Pejës dhe janë jashtë rrezikut për jetë.

Në vendngjarje hetimin është duke e kryer ekipi nga Autoritetit Kombëtar të Hetimit të Aksidenteve dhe Incidenteve Aeronautike, Hekurudhore dhe Detare (KHAIA).