Njësia e Komunikacionit Rrugor e Policisë në Ferizaj, ka ndëshkuar dy shoferë të cilët u kapën në flagrancë kur po bënin gara shpejtësie nga rruga “Brahim Ademi” në rrugën “Driton Islami”.

Sipas njoftimit të policisë, shoferi me inicialet A.M. (23 vjeç), me veturë të tipit Audi dhe shoferi me inicialet P.M (20 vjeç) me veturën Golf, me targa vendore, janë kapur në flagrancë duke bërë gara shpejtësie.

Të dy shoferëve, për kundërvajtje të rënda në trafik, u janë shqiptuar gjoba prej 500 euro, 5 pikë negative dhe masa mbrojtëse për ndalim të së drejtës për të drejtuar automjetin për 12 muaj, thuhet në njoftimin e policisë.

Policia në Ferizaj ka njoftuar se të dielën u raportua një rast për një grua të zhdukur.

Sipas raportit 24 orësh të policisë, gruaja  dyshohet se ka dalë nga shtëpia mesditën e së dielës, derisa ende nuk dihet gjë për të.

“Ankuesi mashkull kosovar ka raportuar se viktima femër kosovare është larguar nga shtëpia dhe nuk dihet asgjë për vendndodhjen saj. Rasti po hetohet nga ekipet relavante policore”, thuhet në njoftim.

Policia Rajonale e Ferizajt, gjatë 24 orëve të fundit, ka shtuar prezencën në rrugë me qëllim parandalimin e aksidenteve.

Si rezultat, janë shqiptuar 297 gjoba për kundërvajtje të ndryshme dhe janë ndaluar 8 shoferë me shkelje të rënda, ndaj të cilëve është iniciuar masa mbrojtëse e heqjes së patentë-shoferit, si dhe janë konfiskuar disa motoçikleta për mungesë të dokumentacionit.

Gjatë kësaj periudhe janë raportuar gjithsej 5 aksidente trafiku:

– 3 me lëndime, ku kanë mbetur të lënduar 5 persona;

– 2 me dëme materiale.

Policia apelon tek të gjithë shoferët për kujdes të shtuar në komunikacion dhe fton qytetarët të bashkëpunojnë me policinë duke raportuar shkeljet përmes numrit 192, stacionit më të afërt policor ose aplikacionit “Lajmëro Policinë”.