Kosovë

Ditëve të fundit rriten rastet me meningjit në Kosovë

Published

2 years ago

16 August, 2023

Ministria e Shëndetësisë u ka bërë thirrje qytetarëve të kenë kujdes të shtuar dhe kontroll të vazhdueshëm të ujit të pijes, për shkak të rritjes të rasteve me meningjit gjatë dy muajve të fundit.

Në komunikatën për media, Ministria e Shëndetësisë kërkon kontroll të shtuar i ujit të pijes dhe pishinave për të parandaluar infeksionet e ndryshme.

Sipas një raporti të Shërbimit Spitalor të Klinikës Universitare të Kosovës, numri i rasteve të raportuara për Sindromën meningjeale gjatë muajve korrik dhe gusht ka shënuar rritje, krahasuar me të njëjtën periudhë të vitit të kaluar.

“Meningjiti mund të prekë këdo që bie në kontakt me agjensin, por disa grupmosha janë më të rrezikuara. Sipas Organizatës Botërore të Shëndetësisë, meningjiti prek më së shumti moshat e reja ngaqë sistemi imunitar tek personat e rinj, kryesisht foshnjat, fëmijët dhe adoleshentët nuk është zhvilluar mjaftueshëm për të luftuar agjentët”, tha Ministria e Shëndetësisë

Shkaktar i sindromës meningjeale janë infeksionet bakteriale ose virale. Ndërsa, si rrugë e përhapjes së infeksionit mund të jenë pishinat, vendet e freskimit, kontakti dhe uji për pije, paralajmëroi ajo.

Ministria e Shëndetësisë njoftoi edhe për simptomat e meningjitit, për të cilat tha se janë të ngjashme me ato të një gripi normal, por që rëndohen për një kohë shumë të shkurtër.

Meningjiti mund të shfaqet menjëherë ose 3-7 ditë pas marrjes së infeksionit dhe trajtohet vetëm në spital, thuhet mes tjerash në njoftim.

“Tek simptomat e sëmundjes përfshihen: të vjella, marramendje, temperaturë e lartë e trupit, dhimbje e muskujve, ndjeshmëri ndaj dritës, dhimbje e kokës, konfuzion, gjymtyrë të ftohta, skuqje e lëkurës. Ndërsa tek fëmijët mund të ketë edhe simptoma si frymëmarrja e shpejtuar, irritim dhe të qara për një kohë të gjatë, humbje të përqendrimit dhe mungesë oreksi. Sapo të vëreni simptomat e mësipërme apo gjendje të rënduar shëndetësore, duhet menjëherë të konsultoheni tek mjeku”, njoftoi Ministria e Shëndetësisë.

Kosovë

Shpallen rezultatet përfundimtare të zgjedhjeve të 9 shkurtit

Published

1 day ago

15 March, 2025

Redaksia

Komisioni Qendror i Zgjedhjeve ka shpallur sot rezultatet përfundimtare të zgjedhjeve parlamentare të mbajtura më 9 shkurt 2025.

Sipas këtyre rezultateve, Lëvizja Vetëvendosje ka fituar 42.30 % të votave nga të cilat konfirmohet se ka marrë 48 ulëse në Kuvendin e Kosovës.

Partia Demokratike e Kosovës, si partia e dytë, ka marrë 20.95 % apo 24 ulëse derisa Lidhja Demokratike e Kosovës, si e treta, ka marrë 18.27 % apo 20 ulëse.

Nga partitë shqiptare, koalicioni AAK-Nisma ka dalë në vend të katërt me 7.06 % të votave apo 8 ulëse të deputetëve.

Lista serbe ka siguruar 9 ulëse apo 4.26 % të votave të përgjithshme.

Në këto zgjedhje, të drejtën e votës e kanë shfrytëzuar 966 mijë e 283 qytetarë apo 46.54 % nga mbi 2 milion shtetas me të drejtë vote.

Kosovë

Vendimi i Supremes hap rrugën për certifikimin e rezultateve zgjedhore

Published

3 days ago

13 March, 2025

Redaksia

Me vendimin e sotëm të Gjykatës Supreme, me të cilin refuzohet si “e pa themeltë” ankesa e Partisë Demokratike të Ashkalinjëve – LPB, lidhur me manipulimin e votave me postë, është hapur rruga drejt shpalljes së rezultateve përfundimtare për zgjedhjet parlamentare të 9 shkurtit.

Partia Demokratike e Ashkalinjëve – LPB kishte kontestuar vendimin e Panelit Zgjedhor për Ankesa dhe Parashtresa, i cili kishte hedhur poshtë si “të pasafatshme” ankesën e kësaj partie lidhur me manipulimet për votat me postë.

Pasi më nuk ka ankesa të tjera, tani është në dorën e Komisionit Qendror të Zgjedhjeve të shpallë rezultatet përfundimtare.

Sipas rezultateve preliminare, Lëvizja Vetëvendosje pritet t’i ketë 48 deputetë, Partia Demokratike 24, Lidhja Demokratike 20 dhe koalicioni AAK – Nisma 8 deputetë.

Kosovë

Vdes shoferi i automjetit të aksidentuar në Vushtrri

Published

3 days ago

13 March, 2025

Redaksia

Një automjet, që po transportonte nxënës, pësoi aksident mëngjesin e sotëm në Vushtrri, duke lënë të vdekur shoferin dhe duke lënduar disa nxënës.

Policia e Kosovës njoftoi se aksidenti ka ndodhur rreth orës 08:00 në fshatin Galicë të Vushtrrisë kurse disa orë më vonë Shërbimi Spitalor Klinik Universitar njoftoi se shoferi i automjetit të aksidentuar, Hajzer Sadiku 59 vjeç, ndërroi jetë si pasojë e lëndimeve të marra.

“Nga hetimet e para të zhvilluara në vendngjarje, bëhet e ditur se si shkaktar i aksidentit dyshohet të ketë qenë pakujdesia dhe mospërshtatja e shpejtësisë me kushtet e rrugës ku për pasojë vetura përfundon jashtë rruge”, u tha në njoftimin e Policisë.

Ndërkaq, kryetari i Vushtrrisë, Ferit Idrizi, tha se me veturën e aksidentuar po transportoheshin nxënës nga fshati Duboc i kësaj komune dhe se nxënësit e lënduar tashmë janë duke marrë trajtim në Emergjencën e Spitalit “Sheikh Zayed” në Vushtrri.

Ndërkohë nga spitali i Vushtrrisë u bë e ditur se gjendja e nxënësve tq7 lënduar është përgjithësisht stabile. Një nxënëse është referuar për trajtim në Prishtinë, në QKUK, për shkak të lëndimeve pak më të rënda. Të tjerët janë liruar, duke iu rekomanduar edhe konsultimin me mjekët dhe trajtimin e mëtutjeshëm.