Ferizaj

Përurohet obelisku kushtuar 105 martirëve në fshatin Sazli

Published

5 years ago

23 October, 2020

Në Sazli të Ferizajt u përurua obelisku kushtuar 105 martirëve të masakruar nga ushtria serbe më 24 tetor të vitit 1912.

Kryetari i komunës së Ferizajt Agim Aliu, tha se ky obelisk do të mbetet kujtim i përhershëm për brezat e rinj.

“Edhe obelisku hijerëndë flet pa fjalë, flet triumfues përballë historisë mbi një shekullore për t’u rikthyer krenar me emrat e martirëve që i dhanë shumë kësaj toke pa më të voglin dyshim, kjo ngjarje e cila përkon njëjtë me lindjen e qytetit është ndër më të vjetërat histori, gjurmë të së kaluarës që brezat e ardhshëm ta nderojnë me epitet çdo copëz toke të larë me gjak dëshmorësh e martirësh, kjo pra është Kosova dhe ky është përkujtimi që sot po e bëjmë në këtë vend“, tha Aliu.

Të pranishmëve iu drejtua edhe deputeti i Kuvendit të Kosovës, njëherit bashkëvendas i sazliasve, Elmi Reçica. Ai tha se kjo ngjarje e vitit 1912 dëshmon se serbët në vazhdimësi kanë ushtruar dhunë ndaj popullit shqiptarë.

“Ky obelisk dëshmon dhunën e vazhdueshme dhe masakrat që i ka kryer shteti serb dhe këtu duhet theksuar se përgjatë historisë është pikërisht shteti serb që ka kryer maskara në Kosovë. Shqiptarët në të gjitha luftërat e tyre kanë pasur pozicion mbrojtës, shqiptarët në çdo luftë dhe angazhim kanë bërë luftë çlirimtare, ata në asnjë moment nuk kanë pasur as kapacitet e as mundësi për të ushtruar dhunë kundër të tjerëve“, theksoi Reçica.

Iniciatori i ndërtimit të këtij obelisku Liman Rushti, u shpreh se me këtë vepër realizoi një ëndërr të kahershme të tij.

“Sot jam më i gëzueshëm se kurrë në jetën time që arrita me realizu idealin, amanetin që i kam vu vetes që nga viti 1975 kur kam magjistruar, por kushtet deri sot nuk e mundësuan, prandaj falënderoj donatorët dhe bashkëfshatarët tanë që mundësuan ndërtimin e këtij obelisku“, theksoi Rushiti.

Iniciatorët e ndërtimit të këtij obelisku thanë se aty nuk janë shkruar emrat e 105 martirëve, meqë disa prej tyre nuk ishin banorë të Sazlisë, por ishin banorë të fsharave të tjerë që në ditën e masakrës ishin mysafirë në këtë fshat.

Art & Showbiz

Nis edicioni i 55-të jubilar i Festivalit të Teatrove Ferizaj

Published

2 weeks ago

01 September, 2025

Redaksia

Nga sot deri më 7 shtator 2025, në Ferizaj do të mbahet Festivali i Teatrove, i cili sivjet shënon edicionin e 55-të jubilar.

Hapja zyrtare e festivalit bëhet nga ora 19:00 me shfaqjen “13” me regji të Sulejman Rushitit, në teatrin “Adriana”, derisa ditëve në vijim, para publikut ferizajas,do të prezantohen disa shfaqje të prodhuara dhe ngjarje të veçanta nga konceptet “Retroteatri” dhe “FTF Skena”.

Festivali i Tetarove Ferizaj, është prej festivaleve më të vjetra në Kosovë, i cili që nga viti 1970, përmes shfaqjeve nga vende të ndryshme jo vetëm vendore por edhe ndërkombëtare, bashkon profesionistë të teatrit dhe artdashës.

Hapjes zyrtare të festivalit do t’i paraprijë shfaqja për të rinj “Black Box” të cilën artdashësit mund ta shohin në Galerinë e qytetit të Ferizajt.

Këtë vit, në programin zyrtar të festivalit, do të jenë shfaqjet: “13” (më 1 shtator), “Bëje ose vdis” (2 shtator), “Djali” (3 shtator), “Hijet e Kohës” dhe “Komedia e zezë” (4 shtator), “God blesh America” (5 shtator), “Kjo është rinia jonë” dhe “PRISHTINA. Vrasja e paralajmëruar e një ëndrre” (6 shtator) si dhe shfaqja “Të vërtetat tona” (7 shtator).

Ky edicion jubilar i festivalit do të përmbyllet më 7 shtator, me shfaqjen jashtë konkurrence “Të bardhët”.

Tradicionalisht, çdo ditë të festivalit organizohen edhe debate për teatrin, punëtori krijuese me artistë ndërkombëtar dhe ndeja pas çdo shfaqjeje në oborrin e Teatrit.

Ferizaj

Arrestohet për vjedhje të trotineteve dhe biçikletave në Ferizaj

Published

3 weeks ago

23 August, 2025

Redaksia

Hetuesit e stacionit policor në Ferizaj, kanë arrestuar të dyshuarin B. T, 28 vjeç, i cili gjatë periudhës 01.07.2025 – 19.08.2025 ka kryer disa raste të vjedhjeve në banesa dhe objekte banesore në qytetin e Ferizajt.

Sipas policisë, nga hetimet është vërtetuar se i dyshuari ka vjedhur dy trotinete elektrike dhe dy biçikleta, me vlerë totale prej rreth 4.220 €, të cilat më pas i kishte shitur personave tjerë, duke iu treguar se ishin të vjedhura.

Me urdhër të prokurorit të shtetit, i dyshuari B. T. është ndaluar për 48 orë për procedura tjera hetimore.

Sendet e vjedhura janë sekuestruar dhe do t’u kthehen pronarëve ligjorë.

Ndërsa ndaj dy personave të tjerë, G .B, 33 vjeç dhe B. H.,25 vjeç, është iniciuar rasti penal “Blerja, pranimi ose fshehja e sendeve të përfituara nga vepra penale”, pasi kanë pranuar se ishin në dijeni për origjinën e tyre.

Ferizaj

Digjen rreth 13 hektarë me të mbjella dhe mal në Lloshkobare të Ferizajt

Published

3 weeks ago

21 August, 2025

Redaksia

Në fshatin Lloshkobare të Ferizajt, nga zjarri janë djegur disa hektarë me të mbjella të ndryshme. Viktimat dyshojnë për zjarrëvënie të qëllimshme nga persona të panjohur.

Në raportin 24-orësh të Policisë së Kosovës, thuhet se të mërkurën pasdite, viktimat kanë raportuar se nga zjarri atyre u janë djegur 5 hektarë mjedër, 3 hektarë të mbjella me dredhëza, 1 hektar me arra dhe 3 hektarë mal.

“Ferizaj 20.08.2025-16:30. Raportohet se persona të panjohur i kanë vënë zjarrin pronës se dy viktimave meshkuj kosovarë, ku janë djegur rreth 3 hektarë me mal, 5 hektarë mjedër, 4 hektarë me dredhëza dhe 1 hektar me arra, që janë djegur në tërësi”, njoftoi Policia e Kosovës.