Partia Demokratike e Ashkalinjve të Kosovës në Ferizaj, ka akuzuar nënkryetarin e komunës së Ferizajt nga rradhët e komuniteteve, Florim Bajrami, për përzgjedhjen jo të drejtë të familjeve në nevojë që kanë përfituar lëndë djegëse për sezonin e dimrit këtë vit. Sekretari i përgjithshëm i PDAK-së, Asllan Kryeziu, thotë se hartimi i listës së familjeve të zgjedhura është bërë në baza politike. 

 “Nuk kanë përfituar familjet me nevojë, por kanë përfituar njerëzit e afërt të politikës, njerëz të cilët janë të lidhur ngushtë me Partinë e Ashkalinjve për Integrim,  ne kemi kontaktuar edhe me zyrtarët e Zyrës për Komunitete dhe Kthim, regjistrat dhe rekomandimet për përfituesit të cilët kanë shkuar nga ana e zyrtarëve të komunës, në këtë rast zyrtarë të komuniteteve nuk janë marrë parasysh. Lista ka qenë kryesisht e hartuar nga bashkëpartiakët e tyre dhe në këtë rast do të thotë kanë përfituar njerëz jo me meritë dhe për të gjithë këtë ne e akuzojmë nënkryetarin e komunës për komunitete, Florim Bajramin, po ashtu jemi këtu për t’i bërë thirrje edhe Drejtorisë së Bujqësisë, Pylltarisë dhe Zhvillimit Rural njëkohësisht edhe kryetarit Aliu që të mbikëqyrë punën e përfaqësuesëve të komuniteteve pasi që ndihma e komunës, programet e komunës për qytetarët kur bëhet fjalë për komunitetet nuk po shkojnë në vendin e duhur”, tha Asllan Kryeziu, sekretar i përgjithshëm.

Ndërsa, nënkryetari i komunës nga radhët e komuniteteve të Ferizajt, Florim Bajrami, i mohon këto akuza.

“Kjo mund të them lirshëm është një shpifje me vetë faktin që ne posedojmë listën që është bërë nga Drejtoria e Bujqësisë dhe Pylltarisë dhe ata janë marrë me këtë, ne nuk kemi dalë të bëjmë përzgjedhjen nën pozicion të nënkryetarit unë nuk kam dalë asnjëherë, nuk e kemi këtë parim, instuticioni dhe përzgjedhja bëhet nga Drejtoria e Bujqësisë, këto propozime që kemi ende nevojë është e ditur që këto unë si nënkryetar të ngreh këtë çështje, mirëpo nuk e bëj përzgjedhjen dhe qytetari ka të drejtën të bëjë listën në sistemin ligjor që e kemi poshtë në zyrë, me ato janë paraqitur shumica edhe të skamnorëve që janë futur në listë. Domethënë kjo listë është bërë nga Bujqësia dhe është shpërndarë, mirëpo shumica janë reduktuar, sepse në vendin aty ku mbledhen derivatet për lëndë djegëse nuk ka dhe është e pamundshme t’i ndihmojmë ne të gjithë skamnorët apo të gjithë komunitetin ashkalinj apo qofshin edhe komunitete të tjera”, tha Florim Bajrami.

Janë 150 familje sociale nga komuna e Ferizajt që kanë përfituar lëndë djegëse për këtë dimër, në mesin e të cilave janë 25 familje të komuniteteve joshumicë.