Ferizaj

Përkujtohet dëshmori Bekim Sejdiu

Published

7 years ago

31 January, 2020

Në sallën e teatrit “Adriana” në Ferizaj, është mbajtur akademi përkujtimore për dëshmorin e kombit Bekim Sejdiu, i vrarë në moshën 15 vjeçare nga forcat serbe 30 vite më parë në oborrin e shkollës së fshatit Koshare.

Në këtë akademi përkujtimore të organizuar për dëshmorin Bekim Sejdiu, kryetari i komunës së Ferizajt Agim Aliu, u shpreh se trimëria e nxënësit Bekim Sejdiu është dëshmi se Republika e Kosovës u bë falë të gjitha gjeneratave.

“Si sot 30 vite më parë pamë e dëgjuam atë që asnjë mendje e shëndosh e veç barbaria mund ta bëj, një krim të shëmtuar, një vrasje në prag të shkollës, ra djaloshi, u vra Bekim Sejdiu. Zaten vetëm ndër shqiptarët merr peshë e kuptim më të thellë lufta e grave, burrave, pleqëve, të rinjve e fëmijëve si Bekimi për liri. As mosha, as shtati, e as njomësia nuk ndali rininë heroike të Kosovës që gjoks përpara t’i dalë armikut. Nxënësi dëshmor Bekim Sejdiu la një gjurmë në çdo faqe historie, la shembulltyrën më krenare për çdo shqiptarë se si një njeri vritet e sakrifkohet, shembet, por nuk përkulet, madje edhe pranë vatres së dijes”, tha Aliu.

Pjesë nga rrugëtimi historik i Kosovës të viteve 90-ta , ndau historiani njëherit udhëheqësi i trashëgimisë kulturore në Ferizaj, Ilir Bytyqi, i cili tha se këto vite ishin ndër vitet më të rënda në të cilat kaloi populli i Kosovës.

” Vitet 1989-90 janë vite shumë të vështira që kaloi populli shqiptarë. Ajo nisi me suprimimin e autonomisë së Kosovës më 23 mars 1989, por megjithatë kjo nuk kaloi pa reagime gjithëpopullore siç ishin protestat e grevat dhe format e tjera për të kundërshtuar pushtimin serb në Kosovë”, tha Ilir Bytyqi.

Familjarë të dëshmorit Bekim Sediu, u shprehën falënderues që u organizua kjo akademi përkujtimore në shenjë respekti për familjarin e tyre të rënë.

” Në emër të familjes Sejdiu, ju falënderoj të gjithëve që jeni mbledhur në këtë sallë për të nderuar dhe respektuar dëshmorin Bekim Sejdiu”, tha Luljeta Bajrami, motra e dëshmorit Bekim Sejdiu.

Në fund të kësaj akademie përkujtimore të organizuar për nder të dëshmorit Bekim Sejdiu, u shfaq edhe një program kulturo-artistik.

Ferizaj

Qytetarëve u vijnë mesazhe mashtruese – Policia apelon për kujdes

Published

1 day ago

05 August, 2026

Redaksia

Drejtoria Rajonale e Policisë në Ferizaj ka njoftuar se ditëve të fundit, disa qytetarëve u kanë ardhur mesazhe (SMS) mashtruese kinse të dërguara në emër të Policisë së Kosovës duke pretenduar se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesën e tyre.

Sipas Policisë, këto mesazhe janë të rreme dhe nuk janë dërguar nga institucionet e rendit dhe ligjit, pra janë mesazhe të dërguara si tentativë për mashtrim.

Policia paralajmëron qytetarët që nëse pranojnë ndonjë e-mail apo mesazh të dyshimtë, të veprojnë si në vijim:

Mos klikoni në linkun e dyshimtë;

Mos i jepni të dhëna personale apo bankare;

Mos kryeni pagesa përmes lidhjeve të dërguara me SMS;

Raportojeni rastin në stacionin më të afërt policor;

Kontaktoni bankën tuaj nëse keni ndarë të dhëna personale ose bankare;

Fshijeni menjëherë mesazhin e dyshimtë;

Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192.

Drejtoria Rajonale e Policisë në Ferizaj apelon për kujdes të shtuar ndaj mashtrimeve online dhe bashkëpunim me policinë për parandalimin e tyre.

Ferizaj

Tërhiqet mjeti i dyshuar shpërthyes nga Lybeteni

Published

1 week ago

28 July, 2026

Redaksia

Policia e Kosovës ka njoftuar se në bashkëpunim me njësitet e specializuara të FSK-së dhe KFOR-it kanë identifikuar dhe tërhequr një mjet të dyshuar shpërthyes në territorin e Parkut Kombëtar të Lybetenit.

Raportimin dje e kishte bërë të një qytetar i cili ka hasur në mjetin e dyshuar përderisa kishte qenë duke mbledhur boronica.

Luboten, Parku Nacional 27.07.2026 – 12:16.

“ Dëshmitari mashkull kosovar ka raportuar se derisa ka qenë duke mbledhur fruta-Boronica, në fushë ka hasur në një mjetë të dyshuar shpërthyes. Njësiti përkatës policor ka siguruar vendin e ngjarjes derisa njësiti për deminim i FSK-së dhe KFOR-it kanë dalë në vendin e ngjarjes dhe kanë bërë tërheqjen e mjetit pa incidente”, ka njoftuar Policia.

Ferizaj

Brenda një jave në rajonin e Ferizajt u regjistruan 63 aksidente në trafik

Published

1 week ago

27 July, 2026

Redaksia

Policia Rajonale e Ferizajt ka bërë të ditur se nga data 20 deri më 26 korrik 2026 ka shqiptuar 1699 gjoba të trafikut derisa janë pezulluar edhe 36 patentë shoferë për drejtuesit e automjeteve që kanë kryer shkelje të rënda në komunikacion.

Gjatë kësaj periudhe janë regjistruar gjithsej 63 aksidente, prej të cilave 25 aksidente me lëndime, ku janë lënduar 36 persona ndërsa 38 aksidente tjera ishin vetëm me dëme materiale.