Ferizaj

Institucionet të kënaqura me zbatimin e Strategjisë për Personat me Aftësi të Kufizuara

Published

6 years ago

11 June, 2020

Strategjia komunale për personat me aftësi të kufizuara dhe plani i veprimit i miratuar një vit më parë nga komuna e Ferizajt, është zbatuar rreth 52%. Përmes kësaj strategjie synohet realizimi i të drejtave të kësaj kategorie të shoqërisë.

Koordinatori i ekipit vlerësues për fëmijë me nevoja të veçanta në nivel komunal, Burim Sylejmani, tha se kërkesat e personave me aftësi të kufizuara janë të shumta, mirëpo po bëhet përpjekje që ato të realizohen.

“Është përqindje e kënaqshme, 52% nuk është pak që është bërë, por mbetet të shihet edhe në vazhdim, prandaj jemi sot këtu për të parë se sa është gatishmëria për të vazhduar tutje në zbatimin e kësaj strategjie që mbështetet në disa çështje”,tha Burim Sylejmani.

Kryesuesja e Kuvendit Komunal të Ferizajt Kristina Gashi-Bytyqi, tha se ndihen të kënaqur që kjo strategji ka arritur të gjej zbatim qysh në vitin e parë.

“Në bazë të afateve ligjore kjo strategji është bërë e plotfuqishme në janar të vitit 2019 dhe sa i përket zbatimit të saj konsiderojmë se ka arritur të realizohet 52% në bazë të monitorimit që është bërë nga ekipi vlerësues ku konsiderojmë se është një arritje e kënaqshme. Kjo strategji bazohet në 4 shtylla kryesore, arsimin, infrastrukturën, punësimin dhe shëndetësinë, ne gjithmonë dëshirojmë të kemi hapa edhe të tjerë pasi kjo stategji bazohet në ligjet në fuqi për personat me nevoja të veçanta”,tha Gashi-Bytyqi.

Strategjia komunale për personat me aftësi të kufizuara ishte nismë e shoqatës “Handikos”, ku objektiv kryesor kishte rregullimin e infrastrukturës në shkollat ku frekuentojnë personat me aftësi të kufizuara, rritjen e shërbimeve mbështetëse, si asistentë në institucionet arsimore, zgjerimin dhe përmirësimin e shërbimeve mjekësore, rehabilituese dhe sociale, krijimin e kushteve dhe mundësive të barabarta për punësimin e personave me aftësi të kufizuara, ndarjen e granteve për vetëpunësim të personave me aftësi të kufizuara dhe ofrimin e punës praktike për ta.

Ferizaj

Bëhet i ditur identiteti i viktimave të aksidentit tragjik në Gjermani

Published

2 days ago

07 August, 2026

Redaksia

Në aksidentin tragjik të komunikacionit, që ndodhi ditë më parë në afërsi të Nittendorfit, në rajonin e Regensburgut në Bavari, humbën jetën Tahir Tahiri, 61 vjeç, Gentian Tahiri, 34 vjeç dhe Laurent Aliu, 16 vjeç, që të tre nga lagjja Nuhaj e fshatit Komogllavë të Ferizajt.

Identiteti i të ndjerëve u bë i ditur në njoftimin mortor të publikuar në faqen e fshatit Komogllavë, ku më tej thuhet se data dhe koha e ceremonisë së varrimit do të bëhet e ditur sapo të merren vendimet përkatëse.

Të ndjerët humbën jetën teksa po ktheheshin nga Kosova drejt vendit ku jetonin në Gjermani.

Ferizaj

Arrestohen tre persona të dyshuar për trafikim të narkotikëve në Ferizaj

Published

2 days ago

07 August, 2026

Redaksia

Policia e Kosovës ka ndaluar tre persona në Ferizaj, nën dyshimin për blerjen, posedimin, shpërndarjen dhe shitjen e paautorizuar të narkotikëve, si dhe mbajtjen në pronësi të paautorizuar të armës.

Të dyshuarit u arrestuan të enjten, rreth orës 18:30, në Ferizaj derisa gjatë kontrollit u janë gjetur dhe konfiskuar substanca të dyshuara narkotike, përfshirë 485.27 gramë marihuanë, 181.7 gramë hashash dhe 2.1 gramë kokainë, para të gatshme, një pistoletë me gaz me një karikator dhe tri boca gazi.

Me vendim të prokurorit të shtetit, tre të dyshuarit, pas intervistimit nga Policia, janë dërguar në mbajtje për 48 orë.

Ferizaj 06.08.2026 – 18:30.

“Janë ndaluar tre të dyshuar meshkuj kosovarë, gjatë kontrollimit tek personat e dyshuar janë gjetur dhe konfiskuar: substancë e llojit Marihuanë rreth 485.27 gramë, substancë e dyshuar e llojit Hashash e gjetur në dy pjesë me peshë 181.7 gramë , substancë e dyshuar e llojit Kokainë 2.1 gramë, para të gatshme. një pistoletë me gaz me një karikator dhe tri boca gazi. Paketime të zbrazëta të qeseve të najlonit, dy peshore njëra digjitale dhe tjetra me tërheqje, dy mulli (grindera) për bluarje, tetë telefona celularë të llojeve të ndryshme, një DVR i kamerave. Me vendim të Prokurorit tre personat e dyshuar pas intervistimit dërgohen në mbajtje për 48 orë”, bëri të ditur Policia në raportin 24 orësh.

Ferizaj

Qytetarëve u vijnë mesazhe mashtruese – Policia apelon për kujdes

Published

4 days ago

05 August, 2026

Redaksia

Drejtoria Rajonale e Policisë në Ferizaj ka njoftuar se ditëve të fundit, disa qytetarëve u kanë ardhur mesazhe (SMS) mashtruese kinse të dërguara në emër të Policisë së Kosovës duke pretenduar se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesën e tyre.

Sipas Policisë, këto mesazhe janë të rreme dhe nuk janë dërguar nga institucionet e rendit dhe ligjit, pra janë mesazhe të dërguara si tentativë për mashtrim.

Policia paralajmëron qytetarët që nëse pranojnë ndonjë e-mail apo mesazh të dyshimtë, të veprojnë si në vijim:

Mos klikoni në linkun e dyshimtë;

Mos i jepni të dhëna personale apo bankare;

Mos kryeni pagesa përmes lidhjeve të dërguara me SMS;

Raportojeni rastin në stacionin më të afërt policor;

Kontaktoni bankën tuaj nëse keni ndarë të dhëna personale ose bankare;

Fshijeni menjëherë mesazhin e dyshimtë;

Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192.

Drejtoria Rajonale e Policisë në Ferizaj apelon për kujdes të shtuar ndaj mashtrimeve online dhe bashkëpunim me policinë për parandalimin e tyre.