Ferizaj

Komuna e Ferizajt dhe “Jetimat e Ballkanit” do të ndërtojnë 15 shtëpi për familjet skamnore

Published

6 years ago

19 June, 2020

Kryetari i komunës së Ferizajt Agim Aliu, priti sot humanistin kosovar Halil Kastratin, me të cilin nënshkruan një memorandum bashkëpunimi që parasheh ndërtimin e 15 shtëpive për familjet nevojtare në Ferizaj.

Nikoqiri i këtij takimi, kryetari i Ferizajt, tha se pret që ky bashkëpunim të thellohet edhe më shumë në ditët në vazhdim.

”Ne do të fillojmë ndërtimin e 10 shtëpive dhe sigurisht që ky është vetëm fillimi me zotëri Halil Kastratin dhe shoqatën, por jam i bindur që javëve dhe muajve në vijim ne po ashtu jemi dakorduar që këtë bashkëpunim ta thellojmë me qëllim të vetëm që sa më shumë familje në nevojë, familje skamnore të jenë përfitues të kësaj ndihme. Ne ju falënderojmë për gjithë këtë punë që e keni bërë dhe jeni duke e bërë“, u shpreh Aliu.

Derisa ky memorandum parasheh ndërtimin e 10 shtëpive, Kastrati tha se nga shoqata “Jetimat e Ballkanit” në Ferizaj do të ndërtohen edhe 5 shtëpi të tjera.

“Ne si shoqatë jemi tejet të kënaqur me këtë bashkëpunim që filluam edhe me komunën e Ferizajt. Bashkëpunime të tilla kemi pothuajse me të gjitha komunat e Republikës së Kosovës dhe ne jemi aktiv për të ndihmuar familjet në nevojë në çdo pëllëmbë të Kosovës. Ne vazhdimisht po bëjmë familje të shumta me shtëpi dhe banesa. Në memorandumin e sotëm janë të parapara që të ndërtohen 10 shtëpi, por ne si shoqatë do të ndërtojmë edhe 5 shtëpi të tjera, pra do të jenë jashtë memorandumit “,tha Kastrati.

Për familjet në nevojë që nuk kanë pronë të tyre, Kastrati tha se janë të gatshëm të dhurojnë edhe banesa. Kurse, kryetari i komunës së Ferizajt tha se tashmë e kanë siguruar listën e përfituesve.

“Ne jemi të gatshëm, por nuk e di ju si komunë, vlera jonë për çdo shëpi në këtë memorandum është 15 mijë euro, nëse hasim në familje që nuk ka truall dhe gjejmë banesë me 20 mijë euro 15 mijë ne i japim, ose shtëpi ose banesë, nëse gjendet banesa me vlerën e shtëpisë që është në marrëveshje ne jemi të gatshëm me dhuru banesë. Neve na duhen 2 ditë për verifikim të familjeve dhe pas dy dite mundemi me nisë ndërtimin”, tha Kastrati.

“Nga ajo që kemi folur këto shtëpi do të kryhen të gjitha sivjet dhe çelësat do t’i marrin sivjet të gjithë përfituesit. Është një listë e pritjes që është duke pritur një kohë të gjatë dhe ne e dorëzuam një listë prej 10 emrash dhe të gjithë janë të merituar për t’iu ndërtuar shtëpi“, tha Aliu.

Humanisiti Halil Kastratii që është drejtues i shoqatës “Jetimat e Ballkanit”, tregoi se vetëm vitin e kaluar kanë ndërtuar 400 shtëpi, ndërsa për këtë vit planifikojnë t’i ndërtojnë 300 shtëpi.

Ferizaj

Bëhet i ditur identiteti i viktimave të aksidentit tragjik në Gjermani

Published

1 day ago

07 August, 2026

Redaksia

Në aksidentin tragjik të komunikacionit, që ndodhi ditë më parë në afërsi të Nittendorfit, në rajonin e Regensburgut në Bavari, humbën jetën Tahir Tahiri, 61 vjeç, Gentian Tahiri, 34 vjeç dhe Laurent Aliu, 16 vjeç, që të tre nga lagjja Nuhaj e fshatit Komogllavë të Ferizajt.

Identiteti i të ndjerëve u bë i ditur në njoftimin mortor të publikuar në faqen e fshatit Komogllavë, ku më tej thuhet se data dhe koha e ceremonisë së varrimit do të bëhet e ditur sapo të merren vendimet përkatëse.

Të ndjerët humbën jetën teksa po ktheheshin nga Kosova drejt vendit ku jetonin në Gjermani.

Ferizaj

Arrestohen tre persona të dyshuar për trafikim të narkotikëve në Ferizaj

Published

1 day ago

07 August, 2026

Redaksia

Policia e Kosovës ka ndaluar tre persona në Ferizaj, nën dyshimin për blerjen, posedimin, shpërndarjen dhe shitjen e paautorizuar të narkotikëve, si dhe mbajtjen në pronësi të paautorizuar të armës.

Të dyshuarit u arrestuan të enjten, rreth orës 18:30, në Ferizaj derisa gjatë kontrollit u janë gjetur dhe konfiskuar substanca të dyshuara narkotike, përfshirë 485.27 gramë marihuanë, 181.7 gramë hashash dhe 2.1 gramë kokainë, para të gatshme, një pistoletë me gaz me një karikator dhe tri boca gazi.

Me vendim të prokurorit të shtetit, tre të dyshuarit, pas intervistimit nga Policia, janë dërguar në mbajtje për 48 orë.

Ferizaj 06.08.2026 – 18:30.

“Janë ndaluar tre të dyshuar meshkuj kosovarë, gjatë kontrollimit tek personat e dyshuar janë gjetur dhe konfiskuar: substancë e llojit Marihuanë rreth 485.27 gramë, substancë e dyshuar e llojit Hashash e gjetur në dy pjesë me peshë 181.7 gramë , substancë e dyshuar e llojit Kokainë 2.1 gramë, para të gatshme. një pistoletë me gaz me një karikator dhe tri boca gazi. Paketime të zbrazëta të qeseve të najlonit, dy peshore njëra digjitale dhe tjetra me tërheqje, dy mulli (grindera) për bluarje, tetë telefona celularë të llojeve të ndryshme, një DVR i kamerave. Me vendim të Prokurorit tre personat e dyshuar pas intervistimit dërgohen në mbajtje për 48 orë”, bëri të ditur Policia në raportin 24 orësh.

Ferizaj

Qytetarëve u vijnë mesazhe mashtruese – Policia apelon për kujdes

Published

3 days ago

05 August, 2026

Redaksia

Drejtoria Rajonale e Policisë në Ferizaj ka njoftuar se ditëve të fundit, disa qytetarëve u kanë ardhur mesazhe (SMS) mashtruese kinse të dërguara në emër të Policisë së Kosovës duke pretenduar se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesën e tyre.

Sipas Policisë, këto mesazhe janë të rreme dhe nuk janë dërguar nga institucionet e rendit dhe ligjit, pra janë mesazhe të dërguara si tentativë për mashtrim.

Policia paralajmëron qytetarët që nëse pranojnë ndonjë e-mail apo mesazh të dyshimtë, të veprojnë si në vijim:

Mos klikoni në linkun e dyshimtë;

Mos i jepni të dhëna personale apo bankare;

Mos kryeni pagesa përmes lidhjeve të dërguara me SMS;

Raportojeni rastin në stacionin më të afërt policor;

Kontaktoni bankën tuaj nëse keni ndarë të dhëna personale ose bankare;

Fshijeni menjëherë mesazhin e dyshimtë;

Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192.

Drejtoria Rajonale e Policisë në Ferizaj apelon për kujdes të shtuar ndaj mashtrimeve online dhe bashkëpunim me policinë për parandalimin e tyre.