Ferizaj

Edhe sivjet nxënësit të painteresuar për shkollat profesionale

Published

8 years ago

03 July, 2018

Afati i parë për regjistrimin e nxënësve në shkollat e mesme të komunës së Ferizajt tashmë ka përfunduar. Edhe këtë vit drejtimet më të pëlqyera kanë qenë ato të gjimnazit shkencor dhe të mjekësisë, duke bërë kështu që numri i nxënësve të paraparë të regjistrohen këtë vit në këto shkolla të plotësohet qysh në afatin e parë të regjistrimit.

“Në shkollën e mesme “Kuvendi i Arbrit” në gjimnazin shkencor tashmë numri është plotësuar nga 448 nxënës që janë dashur të pranohen sipas kriterit që kemi vu ne, ku nga 28 nxënës do të jenë nëpër paralele nga gjithsej 16 paralele, aty ka qenë një konkurrencë mbi 500 nxënës dhe tashmë janë përfshi mbi 90% të nxënësve, njëjtë e kemi pasur edhe në shkollën e mjekësisë “Elena Gjika”, ku dje janë shpallur rezultatet ku kanë qenë mbi 300 nxënës që kanë konkuru në 5 drejtime dhe në këto 5 drejtime janë pranuar 140 nga ta, ndërsa gjendjen më mirë e kemi në gjimnazin “Shaban Hashani’, aty ende nuk është plotësu numri dhe do të ketë afat të dytë, njëjtë e kemi edhe në shkollat e mesme profesionale ku ka vende të lira, po ashtu edhe në shkollën e mesme ekonomike aty ka mbet edhe pak hapësirë për t’u regjistruar në afatin e dytë”, tha drejtori i Arsimit Afrim Llabjani.

Si shqetësim të përvitshëm Llabjani përmendi interesimin e ulët të nxënësve për regjistrim në shkollat e mesme profesionale, edhe pse mundësitë që japin ato për vetëpunësim janë shumë të mëdha.

“E njëjta sfidë është duke na përcjellur edhe këtë vit, por nga informacionet që kemi nga të dy shkollat profesionale teknike dhe të bujqësisë, këtë vit ka qenë pak më mirë, sidomos në shkollën e teknikës ku janë regjistruar mbi 150 nxënës, ndërsa në shkollën “Zenel Hajdini” tani më ka kaluar numri 70 dhe pasi ne jemi konsistent atëherë nxënësit do ta shohin si alternativë dhe mendoj se do të jetë alternativë e mirë dhe kërkoj edhe nga prindërit që të ndikojnë tek fëmijët, t’i orientojnë ata në arsimin profesional pasi është një mundësi e mirë për vetëpunësim”, tha Llabjani.

Këtë vit shkollën fillore e kanë përfunduar afër 2 mijë nxënës, ndërsa numri i atyre që janë regjistruar nëpër shkollat e mesme ende nuk dihet.

Afati i dytë për regjistrim do të jetë gjatë muajit gusht.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

2 weeks ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

2 weeks ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

2 weeks ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim