Ferizaj

Përmes ecjes nga Ferizaj deri në Jezerc, kujtohet sakrifica e të rënëve për liri

Published

7 years ago

29 September, 2018

Duke përshkuar rrugën që e kaluan para 20 viteve, e duke kënduar këngë për atdhe, të veshur me uniforma të Ushtrisë Çlirimtare të Kosovës, ish-luftëtarët e UÇK-së kujtuan çastet e rënda që kaluan pikërisht në malet e Jezercit.

Ecja nga Ferizaj deri në fshatin Jezerc, e cila u organizua në kuadër të aktiviteteve për 20 vjetorin e “Epopesë së lavdishme të Jezercit”, i ka rikthyer në kohë ish-luftëtarët e UÇK-së. Veterani Nexhat Shahini, thotë se qenka ndjenjë e veçantë që pas 20 vitesh të veshësh unformën e ushtarit dhe të kalosh rrugën që para 20 viteve nuk ishte e lehtë.

“Një emocion i veçantë, rikthimi pas 20 vitesh në uniformë dhe përshkimi kësaj rruge për t’i përkujtuar të gjithë të rënët për liri në këtë ditë të veçantë përpos dhembjes ndjejmë edhe krenari që dikur shërbyem për çlirimin e vendit tonë, faleminderit për organizatorët që na e dhuruan këtë emocion që pas 20 viteve t’i kthehesh uniformës ushtarake”,tha Shahini.

Kjo ecje nga qyteti deri në malet e Jezercit, u organizua nga Organizata e Veteranëve të Luftës dhe Shoqëria Bjeshkatare Alpiniste “Lybeteni”. Pjesëmarrësit thanë se kjo është më e pakta që mund të bëjnë në nderim të atyre që dhanë jetën për liri.

“Ka 5 ditë që janë duke u organziuar aktivitete për 20 vjetorin e jubileut të Jezercit, prandaj edhe ne deshëm të kontribuojmë si shoqatë që ta shënojmë në mënyrën tonë këtë manifestim”, tha Besnik Reka nga Shoqëria Bjeshkatare Alpiniste “Lybeteni”.

“Për të nderuar ushtarët të cilët kanë dhënë jetën dhe janë flijuar në fshatin Jezerc ne e kemi bërë organizimin në bashkëpunim edhe me komunën, kemi organizuar një ecje dhe në të njëjtën kohë kemi pasur mundësi të kuptojmë rreth luftës dhe ngjarjeve të cilat kanë ndodhur në atë kohë”, tha Arbenita Topalli.

Me ecje nga Ferizaj deri në Jezerc, u përmbyllën aktivitetet që ishin organizuar për të shënuar 20 vjetorin e ”Epopesë së Jezercit”.

Ferizaj

Ngritët aktakuza e parë për zgjedhjet e 28 dhjetorit

Published

1 week ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

2 weeks ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.

Ferizaj

Për manovra të rrezikshme ndëshkohen 7 shoferë në Ferizaj

Published

3 weeks ago

12 January, 2026

Redaksia

Policia në Ferizaj ka njoftuar se gjatë kontrolleve të realizuara në pika të ndryshme të qytetit, kanë identifikuar dhe ndëshkuar tetë shoferë për shkelje të rënda në komunikacion.

Sipas njoftimit, 7 shoferë janë ndëshkuar, sepse kanë kryer manovra të rrezikshme, përfshirë rrëshqitjen e gomave me frenë dore, ndërsa një shofer është ndëshkuar për qarkullim me automjet me afat të skaduar të regjistrimit.

Për këto kundërvajtje, shtatë shoferëve u është shqiptuar gjobë nga 150 euro dhe nga një (1) pikë negative secilit.

Të ndëshkuarit janë:

V.H. (31 vjeç), me veturë Mercedes-Benz, ngjyrë hiri, me targa vendore

B.R. (30 vjeç), me veturë BMW XM, ngjyrë e kaltër, me targa vendore

D.B. (21 vjeç), me veturë Audi, ngjyrë e bardhë, me targa vendore

B.B. (22 vjeç), me veturë VW Golf, ngjyrë e bardhë, me targa vendore

B.I. (20 vjeç), me veturë Opel, ngjyrë hiri, me targa vendore

L.S. (31 vjeç), me veturë Audi, ngjyrë e bardhë, me targa vendore

L.A. (32 vjeç), me veturë BMW, ngjyrë e bardhë, me targa vendore

Ndërsa shoferi A.G. (29 vjeç), me veturë Ford, ngjyrë e gjelbër, me targa vendore, është ndëshkuar pasi automjeti kishte afat të skaduar të regjistrimit që nga data 02.12.2025.

Atij i është shqiptuar gjobë prej 200 euro dhe automjeti i është konfiskuar përkohësisht.