Ferizaj

Për 9 muaj 140 raste të dhunës në familje në Ferizaj

Published

7 years ago

25 October, 2018

Vetëm në 9 mujorin e këtij viti, në rajonin e Ferizajt janë shënuar rreth 140 raste të dhunës në familje. Këto statistika u bën të ditura sot nga Policia e Kosovës, në hapje të fushatës për parandalimin e kësaj dukurie. Udhëheqësi i i hetimeve në Policinë rajonale të Ferizajt, Refki Morina, tha se rritja e numrit të rasteve po shkon paralelisht me ngritjen e vetëdijes së qytetarëve për t’i raportuar rastet e tilla.

“Derisa më parë ka pasur hezitim për t’i lajmëruar rastet e dhunës në familje tani është ngritur vetëdija e qytetarëve ku raportimet janë shumë më të shpeshta, si duket më kjo dhunë nuk po tolerohet, prandaj në me këtë kuptojmë që besimi për t’i paraqitur rastet në polici po ashtu është në rritje, por edhe sensibilizimi medial po kryen efektin e vet”, tha Morina.

Ndërkaq, përfaqësues të qeverisë lokale të Ferizajt në hapje fushatës “Respekto familjen për t’u respektuar”, konsideruan se mobilizimi i të gjitha institucioneve është mjaftë i nevojshëm.

“Duke qenë të shqetësuar me këtë çështje ne si pushtet vazhdimisht po angazhohemi së bashku edhe me akterë të tjerë që të bëjmë aktivitete së pari për të ngritur vetëdijen qytetare që dhuna në familje nuk është zgjidhje. Është me rëndësi që secili nga ne të shfrytëzoj të gjithë potenacialin që ka për të lobuar çdo kund që është prezent me aktivitetin e tij për të këqijat që sjellë kjo dukuri negative”, tha nënkryetari i Ferizajt Naim Ferati.

“Ne duhet të forcojmë sistemin tonë dhe të sigurohemi që bartësve të dhunës t’iu jepet dënimi adekuat, sepse Kosova, e në veçanti komuna jonë, nuk toleron akte të tilla. Shoqëria jonë ka nevojë të adresoj dukuritë që e kërcënojnë mbarëvajtjen e saj dhe mirëqenien e qytetarit. Përpjekjet tona duhet të përqëndrohen në veçanti në krijimin e një ambienti në të cilin fëmijët tanë rriten me kujdes, në dashuri dhe qasje në shkollim”, tha kryesuesja e Kuvendit Komunal Kristina Gashi-Bytyqi.

Fushata që ka për qëllim parandalimin e dhunës në familje, u tha se do të zgjasë disa ditë dhe do të ketë shtrirje nëpër shkolla e institucione tjera publike, ku do të jepen këshillat e nevojshme se si duhet raportuar dhuna dhe çfarë masa duhet të merren ndaj rasteve që kanë të bëjnë me këtë dukuri të shëmtuar.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

2 days ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

3 days ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

1 week ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim