Ferizaj

Shënohet 40 vjetori i klubit të futbollit ”Tefik Çanga”

Published

7 years ago

31 December, 2018

I themeluar në vitin 1978 në fshatin Tërrn të Ferizajt, klubi i futbollit “Tefik Çanga”, ka festuar 40 vjetorin e themelimit të tij.

Në një ceremoni të organizuar nga këshilli organizativ i klubit” Tefik Çanga”, ky klub u shqua për rezistencën që tregoi gjatë këtyre dekadave.

Kryetari i Federatës së Futbollit të Kosovës Agim Ademi, tha se derisa klubet tjera në kohëra të vështira i ndërprenë aktivitetetet e tyre, një gjë të tillë nuk e bëri klubi i futbollit “Tefik Çanga”.

“Tefik Çanga ka ekzistuar edhe atëherë kur ka qenë më së vështiri dhe nuk e ka ndërprerë aktivitetin e vet dhe më vjen mirë që ekziston një përkushtim i tillë nga banorët e këtij fshati ku shihet se ka përkushtim nga të gjithë dhe besoj se do të ketë ngritje edhe më tej. Ne do të jemi afër gjithsesi dhe do t’u mundësojmë brenda mundësive tona që këtë klub ta ndihmojmë”, tha Agim Ademi.

Kurse, kryetari i klubit të futbollit ”Tefik Çanga”, Gafurr Ibrahimi, duke falënderuar ata që kanë kontribuar në mbajtjen gjallë të këtij klubi, u shpreh i bindur se sukseset nuk do të mungojnë edhe në të ardhmen.

“Falëndroj të gjithë që kanë mbështetur klubin për gjithë këto dekada, e ardhmja do të jetë edhe më e ndritur për klubin tonë dhe shpresoj se nuk do të mungoj asnjëherë përkrahja”, tha Ibrahimi.

Në shënimin e këtij përvjetori të pranishëm ishin edhe familjarë të heroit Tefik Çanga, emrin e së cilit e mban ky klub futbollistik.

“Tefik Çanga varrin e ka në Tiranë, por gjakun e ka në Kosovë, pra ne si familje gjaku na thërret dhe ne vijmë këtu tek gjaku jonë. Ky klub me gjithë vështirësitë që ka pasur vazhdon të funksionoj dhe ne si familje jemi të nderuara dhe gjithmonë do jemi prezent”, tha Burhan Çanga.

“Unë kam marrë vesh për këtë klub rastësisht, më pas më bëri të vëmendshëm Gafurr Ibrahimi për ekzistencën e klubit dhe për mua është kënaqësi që ju keni respektuar figurën e personit, por dhe vet keni krijuar një jetë sociale përmes sportit, unë do të angazhohem që të mbështes skuadrën dhe unë do të jem i hapur për çdo lloj gjëje që unë mund të ndihmoj fshatin dhe skuadrën”, tha Florian Çanga.

Në këtë organizim të shënimit të 40 vjetorit të klubit futbollistik të fshatit Tërrn, u prezantua edhe një dokumentar i cili shpalosi historikun e këtij klubi, përgatitur nga Hekuran Ibrahimi.

Ferizaj

Ngritët aktakuza e parë për zgjedhjet e 28 dhjetorit

Published

2 weeks ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

2 weeks ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.

Ferizaj

Për manovra të rrezikshme ndëshkohen 7 shoferë në Ferizaj

Published

3 weeks ago

12 January, 2026

Redaksia

Policia në Ferizaj ka njoftuar se gjatë kontrolleve të realizuara në pika të ndryshme të qytetit, kanë identifikuar dhe ndëshkuar tetë shoferë për shkelje të rënda në komunikacion.

Sipas njoftimit, 7 shoferë janë ndëshkuar, sepse kanë kryer manovra të rrezikshme, përfshirë rrëshqitjen e gomave me frenë dore, ndërsa një shofer është ndëshkuar për qarkullim me automjet me afat të skaduar të regjistrimit.

Për këto kundërvajtje, shtatë shoferëve u është shqiptuar gjobë nga 150 euro dhe nga një (1) pikë negative secilit.

Të ndëshkuarit janë:

V.H. (31 vjeç), me veturë Mercedes-Benz, ngjyrë hiri, me targa vendore

B.R. (30 vjeç), me veturë BMW XM, ngjyrë e kaltër, me targa vendore

D.B. (21 vjeç), me veturë Audi, ngjyrë e bardhë, me targa vendore

B.B. (22 vjeç), me veturë VW Golf, ngjyrë e bardhë, me targa vendore

B.I. (20 vjeç), me veturë Opel, ngjyrë hiri, me targa vendore

L.S. (31 vjeç), me veturë Audi, ngjyrë e bardhë, me targa vendore

L.A. (32 vjeç), me veturë BMW, ngjyrë e bardhë, me targa vendore

Ndërsa shoferi A.G. (29 vjeç), me veturë Ford, ngjyrë e gjelbër, me targa vendore, është ndëshkuar pasi automjeti kishte afat të skaduar të regjistrimit që nga data 02.12.2025.

Atij i është shqiptuar gjobë prej 200 euro dhe automjeti i është konfiskuar përkohësisht.