Ferizaj

Grabitësit e argjendarisë akoma në arrati

Published

7 years ago

05 January, 2019

Mbrëmjen e fundvitit 2018, qyteti i Ferizajt u trondit nga një plaçkitje e armatosur, me ç’rast grabitësit pasi e plaçkitën një argjentari në qendër të qytetit, gjatë ikjes shkrepën edhe disa plumba nga armët e zjarrit, por fatmirësisht pa pasoja në njerëz.
Në ikje e sipër nga vendi i ngjarjes, grabitësit vepruan edhe në rrugën “Ahmet Hoxha”, dhe nën kërcënimin e armës, ia rrëmbyen veturën një banori, i cili në atë moment po zbriste për të hyrë në shtëpi.
Një dëshmitar okular, larg kamerës, flet për ngjarjen e asaj nate, me plot besim se ishin grabitësit e argjentarisë ata të cilët e rrëmbyen veturën e fqiut të tij.

“Ka qenë 31 dhjetori, ora 18 e pak minuta. Pasi kam hyrë brenda, kam dëgjuar disa zëra dhe krisma.

Kur dola jashtë e pashë se kanë qenë dy persona të armatosur. Kojshisë ja morën kerrin me dhunë, mandej kanë filluar drejt rrugës, por policia pas tyre ka qenë dhe e kanë kthye kerrin dhe kanë vazhduar drejt përsëri. Kanë gjuajtur me automat me sa kam vërejtë, me ç’rast janë edhe shenjat këtu, ka qenë një natë shumë e stresuar për të gjithë banorët, veçanërisht për kojshinë të cilin e kanë maltretuar. Ata kanë qenë dy persona, kanë ardhur nga qyteti dhe janë lëshu drejt kah rruga jonë, ku kanë shkrepur me armë para këmbëve të kojshisë” tha dëshmitari.
Pasi kishin gjuajtur në drejtim të banorëve, në largim e sipër, grabitësit kishin dëmtuar disa vetura, ndërsa në kthesë e kanë aksidentuar një fëmijë, duke i shkaktuar lëndime të lehta trupore.
“Policia janë kanë në ndjekje të tyre nuk kanë qenë edhe larg por nuk kanë mundur me gjujtë se ka pasur qytetarë e vetura të tjera afër. Kur kanë dalë në rrugë kanë goditur edhe një fëmijë kur kanë tentu me ikë dhe një veture me tabela të jashtit, ata kanë mundur me ba gjithçka vetëm me pshtu veten”, shprehet ky banor i rrugës Ahmet Hoxha.

Ekziston edhe një video që po qarkullon nëpër rrjetet sociale, e që eshtë bërë natën kritike nga kamerat e sigurisë në rrugën Enver Topalli. Aty shihet anashkalimi i veturës së policisë me veturën e grabitësve të armatosur, dhe momenti kur kriminelët me veturën e vjedhur ngjyrë të bardhë, aksidentuan fëmijën dhe shkrepën disa plumba, si duket nga paniku. Një dëshmitar tjetër i cili e pa incidentin, thotë se në rrugë krahas kolonës së veturave kishte pasur edhe shumë kalimtarë. Videoja mbaron para se të shihet nëse kjo patrullë ka vazhduar me ndjekjen e grabitësve, apo është ndalur tek fëmija i aksidentuar. Policia e Ferizajt akoma nuk ka publikuar ndonjë rezultat nga veprimet e ndërmarra për identifikimin dhe arrestimin e këtij grupi të armatosur kriminal.

Ferizaj

Ngritët aktakuza e parë për zgjedhjet e 28 dhjetorit

Published

2 weeks ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

2 weeks ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.

Ferizaj

Për manovra të rrezikshme ndëshkohen 7 shoferë në Ferizaj

Published

3 weeks ago

12 January, 2026

Redaksia

Policia në Ferizaj ka njoftuar se gjatë kontrolleve të realizuara në pika të ndryshme të qytetit, kanë identifikuar dhe ndëshkuar tetë shoferë për shkelje të rënda në komunikacion.

Sipas njoftimit, 7 shoferë janë ndëshkuar, sepse kanë kryer manovra të rrezikshme, përfshirë rrëshqitjen e gomave me frenë dore, ndërsa një shofer është ndëshkuar për qarkullim me automjet me afat të skaduar të regjistrimit.

Për këto kundërvajtje, shtatë shoferëve u është shqiptuar gjobë nga 150 euro dhe nga një (1) pikë negative secilit.

Të ndëshkuarit janë:

V.H. (31 vjeç), me veturë Mercedes-Benz, ngjyrë hiri, me targa vendore

B.R. (30 vjeç), me veturë BMW XM, ngjyrë e kaltër, me targa vendore

D.B. (21 vjeç), me veturë Audi, ngjyrë e bardhë, me targa vendore

B.B. (22 vjeç), me veturë VW Golf, ngjyrë e bardhë, me targa vendore

B.I. (20 vjeç), me veturë Opel, ngjyrë hiri, me targa vendore

L.S. (31 vjeç), me veturë Audi, ngjyrë e bardhë, me targa vendore

L.A. (32 vjeç), me veturë BMW, ngjyrë e bardhë, me targa vendore

Ndërsa shoferi A.G. (29 vjeç), me veturë Ford, ngjyrë e gjelbër, me targa vendore, është ndëshkuar pasi automjeti kishte afat të skaduar të regjistrimit që nga data 02.12.2025.

Atij i është shqiptuar gjobë prej 200 euro dhe automjeti i është konfiskuar përkohësisht.