Ferizaj

Të rinjtë e Ferizajt ndihmojnë skamnorët

Published

6 years ago

17 December, 2019

Këto pako janë bërë gati për t’iu shpërndarë familjeve nevojtare. Të gjitha këto janë grumbulluar nga Kuvendi i të Rinjve të Ferizajt që kryesohet nga Vanesa Sadriu, e cila tashmë e ka bërë traditë që në festa të gëzoj familjet nevojtare.

Sadriu tha se bashkë me donatorë e biznese të ndryshme, për këto festa të fundvitit do të ndihmojnë mbi 1 mijë familje nga rajoni i Ferizajt.

“Që tri vite radhazi në prag të festave u ndihmojmë familjeve skamnore në Ferizaj ku tani me përkahjen e donatorëve e bizneseve kemi arritë me deportu edhe jashtë Ferizajt. Për secilin vit që e marrim këtë inciativë rritet numri i familjeve, para 3 viteve kemi pasur 12 familje, kurse tani ky numër është shumë më i madh. Familjet i përzgjedhim në Entin Social, ato verifikohen nga ne dhe më pas marrim të dhëna sa anëtarë janë për t’u ndihmuar“, tha Sadriu.

Ajo tha se përveç produkteve ushqimore, në pako fusin edhe veshëmbathje e artikuj higjenik.

“Duke marrë parasysh që jemi në prag të festave të fundvitit mundohemi pak a shumë me ua mbush sofrat këtyre familjeve që të paktën atë natë mos me ndje mungesën nëpër familjet e tyre. Përveç ushqimeve mundohemi që me u dërgu sa më shumë ushqim, por edhe produkte higjenike që të paktën për disa muaj të mbulohen nevojat e këtyre familjeve”, tha Sadriu.

Kryetarja e Kuvendit të të Rinjve të Ferizajt, tha se gjatë përzgjedhjes së familjeve kanë parë që shumë nga to jetojnë në gjendje të mjerueshme.

“Gjithë kjo lodhje e jona që bëhet një muaj rresht shpërblehet kur fillojmë shpërndarjen e këtyre ndihmave. Gjendja e tyre është e tmerrshme dhe presin vetëm kur shkojmë ne, na presin me padurim. Unë gëzohem që po rriten ndihmat për familjet skamnore, por nuk gëzohem që po rritet numri i familjeve skamnore, por sidoqoftë neve na mbetet me iu ndihmu sa herë të është nevoja”, tha Sadriu.

Familjet përfituese janë kryesisht nga fshatrat e Ferizajt, Shtimes, Kaçanikut, Vitisë dhe Klinës , ndërsa vlera e një pakoje Sadriu tha se kalon mbi 50 euro.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

6 days ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

7 days ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

1 week ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim