Ferizaj

Dëmtimi i kontejnerëve shqetësim për kompaninë ”Pastërtia”

Published

6 years ago

18 December, 2019

Shqetësim i vazhdueshëm mbetet ndotja nga mbeturinat në qytetin e Ferizajt. Përveç mosrespektimit të hedhjes së mbeturinave me kohë dhe në vendet e caktuara, ka raste kur edhe janë dëmtuar kontejnerët nga ndezja e bërllokut. Kryeshefi ekzekutiv i kompanisë “Pastërtia”, Dukagjin Etemi, thotë se kanë bërë shpërndarjen e kontejnerëve në vende të caktuara, por që dëmtimi i tyre akoma mbetet një dukuri shqetësuese.

“Sa i përket Ferizajt gjatë muajit paraprak kemi marrë 600 kontejnerë familjarë të plastikës 120 litërsh dhe kemi marrë gjatë sezonës së verës një donacion nga GIZ-i, një bashkëpunim i cili ka qenë në mes të komunës dhe GIZ-it, kemi marrë 256 kontejnerë, 1.1 metër kub të madhësisë. Për fat jo të mirë, kontejnerët janë të plastikës dhe 1.1 metër kub dhe ne i kemi furnizuar edhe bizneset edhe ndërtesat kolektive edhe vendet ku ka pasur nevojë të sigurohen kontejnerët, mirëpo në shumicën e rasteve ata janë dëmtuar. Përveç kontejnerëve 1.1 metër kub ne kemi raste që janë dëmtuar edhe ata nëntokësor të cilët janë mjaft të kushtueshëm dhe për të cilën çështje komuna është obliguar që të bëj një procedurë për riparimin e tyre dhe aktualisht është në fazën e fundit të riparimit të kontejnerëve nëntokësor”, tha Dukagjin Etemi.

Ai tha se ka një numër të konsiderueshëm të gjobave që janë shqiptuar si për bizneset ashtu edhe për qytetarë individual.

“Rezultati nuk mund të them që është shumë i mirë edhe pas shqiptimit të gjobave, sepse sidomos një pjesë e bizneseve nuk e ka respektuar orarin e hedhjes së mbeturinave dhe vendin e hedhjes së mbeturinave. Ne kemi vështirësi të jashtëzakonshme me qelq, me shishe, sidomos në pjesën e qytetit ku janë të vendosura kafeteritë apo qoftë edhe këto që shërbejnë ushqim si qebaptore e të tjera të cilat vendosin sasi të mëdha të shisheve. Ne këtë sasi të shisheve duhet ta dërgojmë në deponi dhe çmimi i shisheve në krahasim me mbeturinën komunale është 10 herë më i shtrenjtë që e ngarkon kompaninë jashtë mase me shpenzime shumë të mëdha”, tha Dukagjin Etemi.

Ai bëri apel tek qytetarët qe të respektojnë orarin hedhjes së mbeturinave.

“Ne kemi kërkuar si kompani që vendosja e shisheve të mos bëhet gjatë ditës, të bëhet ose në mëngjes ose në mbrëmje kur kompania operon në mënyrë që të kemi mundësinë që të dërgojmë një kamion apo një kamionetë extra vetëm për shishe, për qelq, në mënyrë që të kemi mundësinë që së paku shpenzimet t’i kemi pak më të vogla”, tha Etemi.

Etemi tha se kompania “Pastërtia” shpeshëherë ka shërbyer me kapacitete shtesë për qytetarët e Ferizajt, duke ngritur koston e shpenzimeve për këtë ndërmarrje publike.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

6 days ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

7 days ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

1 week ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim