Ferizaj

Banorët e rrugës “Fehmi Agani” ankohen se deponia ilegale po ua rrezikon shëndetin

Published

5 years ago

05 March, 2021

administrator

Banorët e rrugës “Fehmi Agani” në Ferizaj tash e disa vite janë duke ‘’bashkëjetuar” me një deponi të mbeturinave.

Ata thonë se nga kjo deponi mbeturinash po u rrezikohet jeta.

“Ka disa vite me radhë që është kështu, ne kemi dashur që vet të organizohemi edhe ta pastrojmë, por nuk kemi mundur, përveç erës ka edhe minj e gjarpërinj, gjithçka është e mundur këtu”, tha Xhelal Bislimi, banor.

“Unë këtu e kam shtëpinë, 5 metra nga kjo deponi, është shumë rrezik, dritaret nuk vjen në shprehje me i hap me vite, është rrezik jo vetëm nga kundërmimi, por ka edhe gjarpërinj e minj, mandej grubmullohen edhe qentë endacakë, ne këtu po jetojmë nuk po kemi ku të shkojmë”, tha Avni Hajdari, banor.

“Këto mbeturina po shkaktojnë sëmundje të ndryshme, vet fakti që kur kalon këtu shkaktohet stres dhe më pas shkaktohen edhe shumë sëmundje të ndryshme, kur kalojmë këtu duhet me mbulu fytyrën për shkak të erës që vjen”, tha Alina Jashari, banore.

Banorët paralajmërojnë protesta në rast se institucionet nuk ndërmarrin asgjë në këtë drejtim.

“Me vite e kemi këtë problem, fajtor kryesor janë edhe banorët edhe pronari i shtëpisë, por edhe komuna se kurrë s’ka intervenu, këtu ka banorë, ka fëmijë, këtu jo që ka minj, por edhe gjarpërinj, është e pabesueshme se si është neglizhuar kjo nga komuna. Nëse nuk intervenohet unë do të organizoj protestë dhe do të bllokoj çdo rrugë, nuk do të tolerojmë më”, tha Fadil Bislimi.

Në kompaninë “Pastërtia” thonë se disa herë e kanë larguar këtë deponi, por ajo përsëri po krijohet si pasojë e papërgjegjësisë së vet banorëve.

“Ne si kompani jemi informuar disa herë për atë deponi aty dhe kemi bërë tërheqjen dhe bartjen e mbeturinave nga aty, por aty është një pjesë edhe private dhe ne si kompani nuk kemi të drejtë me hy, por ne si kompani sa herë është kërkuar nga drejtoria e ambientit kemi bërë tërheqjen e asaj deponie, por papërgjegjësia e qytetarëve dhe ka vazhduar e njëjta gjë, kjo është krejt papërgjegjësi e atyre banorëve”, tha Naim Nuhiu, zv.kryeshef i kompanisë “Pastërtia”.

Për këtë problem disavjeçar që ka kjo lagje në Inspektoratin komunal të Ferizajt dhe në Drejtorinë e Shërbimeve Publike nuk pranuan të flasin duke ia bartur përgjegjësinë njëra tjetrës, e duke u arsyetuar se kjo deponi është në pronë private dhe nuk e kanë të lehtë të intervenojnë.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

1 week ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

2 weeks ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

2 weeks ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim