Ferizaj

Shkolla “Kemajl Hetemi” furnizohet me pajisje sportive

Published

5 years ago

03 June, 2021

Veshje sportive, topa e atlete të futbollit janë donacioni që pranoi shkolla fillore “Kemajl Hetemi” në Rahovicë nga bashkëfshatari Hyzer Zariqi, i cili jeton në Mynih të Gjermanisë.

Drejtori i shkollës së Rahovicës Kadri Ramadani, falënderoi Zariqin për këtë ndihmë, që ishte shumë e nevojshme për nxënësit.

“Pas një bisede me të më ka premtuar se do t’i dërgojë disa veshje sportive dhe topa dhe këtë e ka realizuar me një sukses shumë të madh. Si drejtor i shkollës, në emër të stafit dhe nxënësve e falënderoj shumë Hyzerin për këtë ndihmë. Na ka dhënë gjithsej 18 topa, mbi 40 komplete veshje dhe diku 30 palë kopaçka”, tha Kadri Ramadani, drejtor i shkollës “Kemajl Hetemi”.

Për shkak të numrit të madh të pajisjeve sportive, Ramadani në dakordim me Zariqin, vendosi që një pjesë të tyre t’ia dhurojë shkollës “Mejdi Xhaferi” të fshatit Mirosalë.

E, nxënësit janë ata që më së shumti iu gëzuan këtij donacioni.

“Po, unë jam shumë i gëzuar për këto veshje sportive, desha të them që unë do të vazhdoj të luaj futboll, unë kam luajtur futboll nga mosha gjashtë vjeçare dhe mendoj që nuk duhet të ndalojnë këto donacione për fëmijë”, tha Arlind Maliqi, nxënës i shkollës “Kemajl Hetemi”.

“Ne i kemi pritur shumë me gëzim dhe kemi me vazhdu me shumë donacione tjera.. Unë e luaj futbollin prej moshës shtatë vjeçare dhe kam dëshirë që të luaj me Leonel Messin edhe unë, për Barcelonën”, tha Ardi Zariqi, nxënës.
Ramadani tutje tregon se mbështeten tek donacionet edhe për renovimet në shkollë, pasi që Ministria e Ekonomisë nuk e ka mbajtur premtimin për ndërrimin e dyrëve e dritareve mbi 20 vjeçare.

“Çdo shkollë, por veçanërisht shkolla jonë ka nevojë për donacione tjera. Unë kam kërkuar edhe prej donatorëve tjerë që të na furnizojnë së paku me video-projektorë dhe kompjuterë, pasi që ne e dimë që shkolla është donacion i ADRA-së dhe bashkëvendasëve tanë. Nuk kemi pase ato që i kemi pritë, megjithatë shpresojmë që kanë me na ndihmu që të kemi sa më shumë mjete shkollore që të ngritet edhe cilësia tek nxënësit. Por, edhe donacione tjera që kanë me na e rregullu shkollën, sepse dyertë dhe dritaret qe 21 vite nuk janë ndërruar. Drejtori i Arsimit na i ka ndërru të gjitha dyertë e katit të poshtëm dhe tri të katit të epërm. Besojmë që sivjet kemi me u kompletu me dyer, por për dritare nuk e dijmë. Janë të dëmtuara edhe parketi e pllakat, po shpresojmë që kanë me u ndërru sepse me të vërtetë sado që mbanë pastërti, nuk ekziston pastërtia. Na është premtu një stazë nga dera e shkollës deri tek dera e oborrit, edhe ky është premtim që dy vjet, por pse nuk po realizohet nuk po mundemi me ditë”, tha drejtori Kadri Ramadani.

Donatori Hyzer Zariqi i ka premtuar kësaj shkolle që kur të kthehet nga Gjermania do t’ia rregullojë edhe një kopsht të lodrave.

Ferizaj

Ngritët aktakuza e parë për zgjedhjet e 28 dhjetorit

Published

3 days ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

5 days ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.

Ferizaj

Për manovra të rrezikshme ndëshkohen 7 shoferë në Ferizaj

Published

2 weeks ago

12 January, 2026

Redaksia

Policia në Ferizaj ka njoftuar se gjatë kontrolleve të realizuara në pika të ndryshme të qytetit, kanë identifikuar dhe ndëshkuar tetë shoferë për shkelje të rënda në komunikacion.

Sipas njoftimit, 7 shoferë janë ndëshkuar, sepse kanë kryer manovra të rrezikshme, përfshirë rrëshqitjen e gomave me frenë dore, ndërsa një shofer është ndëshkuar për qarkullim me automjet me afat të skaduar të regjistrimit.

Për këto kundërvajtje, shtatë shoferëve u është shqiptuar gjobë nga 150 euro dhe nga një (1) pikë negative secilit.

Të ndëshkuarit janë:

V.H. (31 vjeç), me veturë Mercedes-Benz, ngjyrë hiri, me targa vendore

B.R. (30 vjeç), me veturë BMW XM, ngjyrë e kaltër, me targa vendore

D.B. (21 vjeç), me veturë Audi, ngjyrë e bardhë, me targa vendore

B.B. (22 vjeç), me veturë VW Golf, ngjyrë e bardhë, me targa vendore

B.I. (20 vjeç), me veturë Opel, ngjyrë hiri, me targa vendore

L.S. (31 vjeç), me veturë Audi, ngjyrë e bardhë, me targa vendore

L.A. (32 vjeç), me veturë BMW, ngjyrë e bardhë, me targa vendore

Ndërsa shoferi A.G. (29 vjeç), me veturë Ford, ngjyrë e gjelbër, me targa vendore, është ndëshkuar pasi automjeti kishte afat të skaduar të regjistrimit që nga data 02.12.2025.

Atij i është shqiptuar gjobë prej 200 euro dhe automjeti i është konfiskuar përkohësisht.