Ferizaj

Për Ditën e ajrit të pastër, i bjen ndërmend vetëm LVV-së

Published

5 years ago

07 September, 2021

U mblodhën tek sheshi para Komunës së Ferizajt.

Janë deputetë e aktivistë të Lëvizjes Vetëvendosjes. I fikën automobilët dhe me biçikleta ia mësyjnë fshatit Nerodime të Ferizajt, në Ditën ndërkombëtare të Ajrit të Pastër. Jo për të thithur ajër të pastër, por të pastruar hapësirën tek Bashkimi i lumenjve.

Rrugës u vërejt lodhja, por për Kryetarin e Vetëvendosjes në Ferizaj, Valon Ramadani ishte më e rëndësishme, që Ferizaj, të ketë më shumë gjelbërim dhe mjedis të pastër.

“Sot ne si Qendër e LVV-së së bashku me aktivistë e deputetë kemi pasur një aktivitet për ditën ndërkombëtare të ajrit të pastër. Motoja e këtij aktiviteti ka qenë “Për tokën, ujin dhe ajrin” dhe aktivistët iu bashkëngjitën këtij aktiviteti me biçikleta nga sheshi i qytetit deri në Nerodime dhe pasi që erdhëm këtu kemi vazhduar me aktivitetin tjetër, pra pastrimin e ambientit që ishte i mbushur me mbeturina e këto pjesë të Ferizajt janë mushkëritë e qytetit dhe duhet të jenë të pastra”.
Valon Ramadani – Kryetar i Vetëvendosjes në Ferizaj

Kësaj kauze për pastrimin e këtij vendi iu bashkangjit edhe aktivistja e mjedisit dhe njëkohësisht kryesuesja e Komisionit për Mjedis në Kuvendin e Kosovës, Fitore Dalipi-Pacolli, e cila thotë se po mungon kujdesi ndaj natyrës.

“Me gjithë dëshirë iu bashkangjita këtij aktiviteti të aktivistëve të Ferizajt, ku erdhëm me biçikleta dhe të pastrojmë këtë pjesë të bukur të Ferizajt. Ky është mesazh për gjithë qytetarët e Kosovës, sepse ashtu siç e trajtojmë ne natyrën ashtu na trajton ajo ne. Nëse ne e ndotim natyrën, ujin, tokën, e ndotim ushqimin të cilin e hamë. Nëse e trajtojmë natyrën me kujdes dhe e mbajmë të pastër atëherë edhe ne do të jemi më të shëndetshëm. Është shumë me rëndësi që të vetëdijesohemi si qytetarë që ta mbajmë vendin tonë të pastër sepse nuk kemi vend tjetër. Institucionet lokale duhet të kujdesen më shumë për mbeturinat, të krijojnë një sistem për mbledhjen e mbeturinave dhe qytetarët duhet të mbrojnë natyrën. Pashë që në këtë vend, qytetarët kalojnë një pjesë të mirë të pushimeve të tyre, atëherë pse mos ta mbajmë të pastër që kushdo që vjen ta ketë një ambient të mirë”.
Fitore Dalipi-Pacolli, Deputete e Vetëvendosjes

Teksa në këtë vend vazhdonte pastrimi, aty erdhi edhe një vizitor më interesant.

Ferizaj

Bëhet i ditur identiteti i viktimave të aksidentit tragjik në Gjermani

Published

4 days ago

07 August, 2026

Redaksia

Në aksidentin tragjik të komunikacionit, që ndodhi ditë më parë në afërsi të Nittendorfit, në rajonin e Regensburgut në Bavari, humbën jetën Tahir Tahiri, 61 vjeç, Gentian Tahiri, 34 vjeç dhe Laurent Aliu, 16 vjeç, që të tre nga lagjja Nuhaj e fshatit Komogllavë të Ferizajt.

Identiteti i të ndjerëve u bë i ditur në njoftimin mortor të publikuar në faqen e fshatit Komogllavë, ku më tej thuhet se data dhe koha e ceremonisë së varrimit do të bëhet e ditur sapo të merren vendimet përkatëse.

Të ndjerët humbën jetën teksa po ktheheshin nga Kosova drejt vendit ku jetonin në Gjermani.

Ferizaj

Arrestohen tre persona të dyshuar për trafikim të narkotikëve në Ferizaj

Published

4 days ago

07 August, 2026

Redaksia

Policia e Kosovës ka ndaluar tre persona në Ferizaj, nën dyshimin për blerjen, posedimin, shpërndarjen dhe shitjen e paautorizuar të narkotikëve, si dhe mbajtjen në pronësi të paautorizuar të armës.

Të dyshuarit u arrestuan të enjten, rreth orës 18:30, në Ferizaj derisa gjatë kontrollit u janë gjetur dhe konfiskuar substanca të dyshuara narkotike, përfshirë 485.27 gramë marihuanë, 181.7 gramë hashash dhe 2.1 gramë kokainë, para të gatshme, një pistoletë me gaz me një karikator dhe tri boca gazi.

Me vendim të prokurorit të shtetit, tre të dyshuarit, pas intervistimit nga Policia, janë dërguar në mbajtje për 48 orë.

Ferizaj 06.08.2026 – 18:30.

“Janë ndaluar tre të dyshuar meshkuj kosovarë, gjatë kontrollimit tek personat e dyshuar janë gjetur dhe konfiskuar: substancë e llojit Marihuanë rreth 485.27 gramë, substancë e dyshuar e llojit Hashash e gjetur në dy pjesë me peshë 181.7 gramë , substancë e dyshuar e llojit Kokainë 2.1 gramë, para të gatshme. një pistoletë me gaz me një karikator dhe tri boca gazi. Paketime të zbrazëta të qeseve të najlonit, dy peshore njëra digjitale dhe tjetra me tërheqje, dy mulli (grindera) për bluarje, tetë telefona celularë të llojeve të ndryshme, një DVR i kamerave. Me vendim të Prokurorit tre personat e dyshuar pas intervistimit dërgohen në mbajtje për 48 orë”, bëri të ditur Policia në raportin 24 orësh.

Ferizaj

Qytetarëve u vijnë mesazhe mashtruese – Policia apelon për kujdes

Published

6 days ago

05 August, 2026

Redaksia

Drejtoria Rajonale e Policisë në Ferizaj ka njoftuar se ditëve të fundit, disa qytetarëve u kanë ardhur mesazhe (SMS) mashtruese kinse të dërguara në emër të Policisë së Kosovës duke pretenduar se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesën e tyre.

Sipas Policisë, këto mesazhe janë të rreme dhe nuk janë dërguar nga institucionet e rendit dhe ligjit, pra janë mesazhe të dërguara si tentativë për mashtrim.

Policia paralajmëron qytetarët që nëse pranojnë ndonjë e-mail apo mesazh të dyshimtë, të veprojnë si në vijim:

Mos klikoni në linkun e dyshimtë;

Mos i jepni të dhëna personale apo bankare;

Mos kryeni pagesa përmes lidhjeve të dërguara me SMS;

Raportojeni rastin në stacionin më të afërt policor;

Kontaktoni bankën tuaj nëse keni ndarë të dhëna personale ose bankare;

Fshijeni menjëherë mesazhin e dyshimtë;

Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192.

Drejtoria Rajonale e Policisë në Ferizaj apelon për kujdes të shtuar ndaj mashtrimeve online dhe bashkëpunim me policinë për parandalimin e tyre.