Kosovë

Osmani dhe Kurti: SHBA-ja pajtohet që dialogu të përqendrohet në njohje

Published

2 years ago

30 July, 2022

Presidentja e Kosovës, Vjosa Osmani, dhe kryeministri Albin Kurti, thanë se gjatë vizitës së tyre në Shtetet e Bashkuara është rikonfirmuar mbështetja e Uashingtonit për Kosovën, si në fushën e ekonomisë, por edhe të integrimeve evropiane.

Osmani dhe Kurti qëndruan për disa ditë në SHBA, ku u takuan me sekretarin amerikan të Shtetit, Antony Blinken, dhe morën pjesë në nënshkrimin e një marrëveshjeje në vlerë prej mbi 200 milionë dollarësh me Korporatën e Sfidës së Mijëvjeçarit (MCC).

Pas kthimit në Kosovë, në një konferencë për media në aeroportin “Adem Jashari”, Osmani tha se në takim, Blinken ka konfirmuar qëndrimi që dialogu me Serbinë të përqendrohet në njohje reciproke.

“Në këtë temë është tejet me rëndësi që sërish është rikonfirmuar qëndrimi amerikan që asesi nuk shtyjnë përpara një zgjidhje që do ta prekte integritetin territorial, sovranitetin e Republikës së Kosovës apo edhe rregullimin kushtetues të Kosovës”, tha Osmani.

Kosova dhe Serbia që nga viti 2011 zhvillojnë bisedime me ndërmjetësimin e Bashkimit Evropian, me qëllim të normalizimit të raporteve.

Por, Kosova insiston që procesi duhet të përmbyllet me njohje reciproke, ndërkaq Serbia kërkon një zgjidhje kompromisi.

Kryeministri Kurti tha se takimi me sekretarin Blinken ishte i “veçantë” dhe i “dobishëm” për Kosovën. Duke folur për dialogun, ai tha se Prishtina dhe Uashingtoni pajtohen se si duhet të përmbyllet procesi.

“Dhe si duket formula e këtij normalizimi, përsëri ne pajtohemi plotësisht me SHBA-në. E ajo është: marrëveshje ligjërisht e obligueshme për normalizim të plotë të marrëdhënieve e cila në qendër ka njohjen reciproke”, tha Kurti.

Osmani bëri të ditur se në takim me Blinkenin kanë biseduar për njohjet e Kosovës dhe ka marrë mbështetjen e SHBA-së në këtë çështje, por edhe për rritjen e bashkëpunimit në fushën e sigurisë dhe mbrojtjes.

Të dy krerët shtetërorë pranuan se gjatë takimit më 27 korrik në Uashington, sekretari Blinken ka shtruar edhe çështjen e Manastirit të Deçanit, por as Osmani dhe as Kurti nuk elaboruan më tej nëse ka pasur një kërkesë nga SHBA-ja për këtë temë, teksa Osmani tha se kjo temë u shtrua “në kontekstin e vendimit të Gjykatës Kushtetuese të Kosovës”.

SHBA-ja vazhdimisht i kërkon Kosovës që të zbatojë vendimin e Gjykatës Kushtetuese të vitit 2016 që t’i njihet e drejta e pronësisë Manastirit të Deçanit për 24 hektarë tokë.

Por, Kurti dhe autoritetet lokale në Deçan në të kaluarën ka thënë se ky vendim është diskriminues dhe legalizon vendimin e ish-presidentit të Jugosllavisë, Sllobodan Millosheviq, që më 1997 vendoi t’ia dhurojë pronën Manastirit të Deçanit./rel

Related Topics:Blinken Kosove Kurti Osmaniu

Up Next

ShBA-ja e Rusia në bisedime për shkëmbimin e të burgosurve, rriten tensionet

Don't Miss

Kryeministri Kurti nesër mbledh Këshillin e Sigurisë, shkak targat

Click to comment

Kosovë

Arratiset Enver Sekiraqa

Published

9 hours ago

18 May, 2024

Redaksia

Policia e Kosovës ka njoftuar se Enver Sekiraqa është arratisur pasi nuk është gjetur në shtëpi gjatë të premtes dhe të shtunës. Ai duhej të kthehej në paraburgim pasi dy ditë më parë, Gjykata e Apelit vendosi për ndryshimin e masës së sigurisë ndaj tij.

Bazuar në aktvendimin e pranuar nga Gjykata e Apelit dhe mos gjetjes së Sekiraqës, policia ka ndërmarrë masat e nevojshme për informim dhe ndalim të tij, në të gjitha vendkalimet kufitare dhe drejtoritë rajonale policore.

Njoftimi i policisë:

“Policia e Kosovës, bazuar në aktvendimin e pranuar të Gjykatës së Apelit, të datës 17.05.2024, për ndryshim të masës së sigurisë së të pandehurit Enver Sekiraqa, sipas procedurave dhe mandatit të saj ligjor i ka dërguar ftesën të njëjtit, mirëpo i njëjti nuk është hasur në vendbanimin e tij në rrugën ‘Vëllezërit Fazliu’ Prishtinë.

Meqë i njëjti nuk është hasur në shtëpi, Policia e Kosovës, përmes zyrtarëve kompetent, ka njoftuar organet e drejtësisë se ftesa zyrtare i është dërguar të pandehurit Sekiraqa, mirëpo i njëjti nuk është hasur në shtëpi. Po ashtu sot me datën 18.05.2024, për të zbatuar aktvendimin e Gjykatës së Apelit, ku i dyshuari duhet të dërgohet në paraburgim, zyrtarët policorë e kanë kërkuar të njëjtin, por nuk e kanë hasur në shtëpi.

Veprimet e mëtejme policore, do të bazohen në procedurat e parapara ligjore, aktvendimin dhe rekomandimet e organeve të drejtësisë. Njëkohësisht Policia e Kosovës ka ndërmarrë masat e nevojshme për informim dhe ndalim në të gjitha vendkalimet kufitare dhe drejtoritë rajonale policore, ndaj të pandehurit”.

Kosovë

Deri më 24 maj regjistrimi i popullatës mund të kryhet vetëm nga stafi i ASK-së

Published

15 hours ago

18 May, 2024

Redaksia

Agjencia e Statistikave së Kosovës ka njoftuar se regjistrimi i popullsisë është shtyrë deri më 24 maj 2024. Në njoftim bëhet e ditur se shtyrja e afatit u mundësua pas miratimit në Qeveri të propozimit nga ASK-ja bazuar në kërkesën e disa komunave .

“Meqenëse Regjistrimi i Popullsisë në terren, sipas Vendimin të Qeverisë të datës 21 nëntor 2023 ishte deri më 17 Maj 2024, bazuar në kërkesat e disa komunave dhe duke u bazuar në sistemin monitorues që ka ngritur Agjencia e Statistikave të Kosovës (ASK) për ta monitoruar ecurinë e procesit, vlerësuam se mund të ketë individë, ekonomi familjare ose edhe ata që kanë refuzuar (për momentin) dhe kërkuam nga Qeveria një shtyrje të afatit të Regjistrimit të Popullsisë (ReKos2024) deri më 24 Maj 2024 që është aprovuar nga ana e Qeverisë”, thuhet në njoftimin e ASK-së.

ASK thotë se gjatë kësaj periudhe, regjistrimi do të bëhet në çdo zonë regjistruese (fshat e komunë) të Kosovës dhe do të zhvillohen vetëm nga stafi i Agjencisë së Statistikave të Kosovës.

Po ashtu ASK bën thirrje për qytetarët që nuk janë regjistruar të kërkojnë të regjistrohen, duke inkurajuar ata që t’i kontaktojnë zyrtarët e Agjencisë së Statistikave të Kosovës.