Me projekt-ligjin për pagat, anëtari i Kuvendit Komunal të një qyteti si Ferizaj me mbi 100 mijë banorë do të ketë koeficient 5.9.
Me koeficientin prej 5.9 dhe që një koeficient të jetë me shumë prej 120 eurosh atëherë i bie që një asamblist në Ferizaj të paguhet 708 euro.
Me gjithë këtë rritje, shumica e qytetarëve nuk është se janë të informuar në detaje se çfarë funksione kryen Kuvendi Komunal.
Për të ditur se çfarë detyrash kanë kuvendarët të cilët i zgjedhim me votë mjafton të lexojmë Ligjin nr 03/L-040 për Vetëqeverisjen Lokale.
Ky ligj me nenin 40 përcakton funksionet e Kuvendeve Komunale në Kosovë.
Paragrafi i dytë i nenit 40 thotë: Kuvendi i komunës nuk i delegon përgjegjësitë e tij lidhur me marrjen e vendimeve për:
a) statutin dhe Rregulloren e punës, rregulloret komunale dhe miratimin, ndryshimin dhe shfuqizimin e tyre,
b) miratimin e buxhetit dhe planeve investuese;
c) miratimin e çështjeve të tjera financiare, të cilat janë të rezervuara për kuvendin sipas statutit aporregullores së punës;
d) planin vjetor të punës dhe raportin vjetor;
e) themelimin e komisioneve të kërkuara sipas këtij Ligji;
f) zgjedhjen e kryetarit dhe zëvendëskryetarit të komunës;
g) niveli i tarifave dhe ngarkesave;
h) krijimin dhe përdorimin e simboleve, dekoratave dhe titujve të nderit të komunës, në pajtim me ligjin në fuqi;
i) emërimin dhe riemërimin e rrugëve, rrugicave dhe vendeve të tjera publike;
j) arritjen e marrëveshjeve ndërkomunale dhe brenda komunale;
k) marrjen e vendimeve për t’u bashkuar me asociacione përfaqësuese të komunave të Republikës së Kosovës; dhe
l) përgjegjësive të tjera që kërkohen me ligj.
Pra, ky nen tregon se për të gjitha këto çështje, të votuarit tonë për Kuvendin Komunal(Asamblenë Komunale) kanë detyrë dhe përgjegjësi që të marrin vendime.
Kuvendi Komunal për marrjen e vendimeve mundet që t’i delegojë këto detyra dhe mund të tërheqë delegimin kurdo që kuvendarët duan.
Paragrafi i tretë i nenit 40-të thotë: Për marrjen e vendimeve, kuvendi i komunës mund t’ia delegojë pushtetin e tij komitetit të kuvendit të komunës, apo kryetarit të komunës. Kuvendi i komunës mund të tërheqë delegimin në çdo kohë.
Të gjitha Kuvendet janë të obliguara me këtë ligj që të mbajnë së paku 10 takime të rregullta në vit.
A e keni ditur se të gjitha këto takime të Kuvendit Komunal janë të hapura për opinionin?
Se çdo kush mund të marr pjesë në këto takime, kjo rregullohet me ligjin për vetëqeverisje lokale, saktësisht me nenin 45 të këtij ligji:
45.1 Takimet e kuvendit të komunës dhe të gjitha komisioneve të tij janë të hapura për opinion. Anëtarëve të publikut u lejohet pjesëmarrja në takime të kuvendit të komunës, ashtu siç është paraparë në Rregulloren e punës.
Ligji i jep mundësinë Kuvendit Komunal që të thërrasë edhe takime të jashtëzakonshme, takime këto që precizohen me nenin 44 të këtij ligji:
44.1 Takimi i jashtëzakonshëm i kuvendit të komunës caktohet me kërkesën e bërë me shkrim nga, më së paku, një e treta e numrit të përgjithshëm të anëtarëve të kuvendit të komunës, apo me kërkesë të kryetarit.
44.2 E drejta për të thirrur një takim të jashtëzakonshëm gjithashtu përfshin të drejtën për caktimin e rendit të ditës për takimin e caktuar.
44.3. Pikat e caktuara në rendin e ditës për mbledhjet e jashtëzakonshme, nuk mund të ndryshohen gjatë mbledhjes.
44.4 Takimi i jashtëzakonshëm i kuvendit të komunës nuk mbahet nëse të gjithë anëtarët e kuvendit të komunës dhe publiku nuk janë njoftuar me shkrim, siç kërkohet me rregulloret e punës, së paku tri (3) ditë pune para datës së mbajtjes së takimit.
44.5 Procedurat e njëjta që kërkohen për njoftimin dhe çështjet e tjera që zbatohen për mbledhjet e rregullta, zbatohen për mbledhjet e jashtëzakonshme gjithashtu.
44.6 Procedurat e lartpërmendura nuk zbatohen për takimet që thirren për shkak të rrethanave urgjente.
Rendi i ditës, pra ajo se për çka flitet në këto mbledhje të Kuvendeve Komunale rregullohet me po këtë ligj.
Ky ligj u jep mundësinë anëtarëve të Kuvendit Komunal të propozojnë pika të rendit të ditës të cilat sipas tyre kanë rëndësi diskutimi.
Neni 47
Rendi i ditës
47.1 Rendi i ditës për takimin e kuvendit të komunës caktohet nga kryesuesi i kuvendit të komunës në marrëveshje me Kryetarin e Komunës.
47.2 Anëtari i kuvendit të komunës mund të kërkojë shtimin e një pikë në rendin e ditës gjatë seancës së rregullt të kuvendit të komunës, nëse çështja që kërkohet të përfshihet në rend të ditës është çështje urgjente me rëndësi publike.
47.3 Kërkesa e tillë mund të miratohet apo refuzohet me votën e shumicës.
47.4 Rregullorja e punës së kuvendit të komunës parasheh dispozita tjera për përgatitjen, miratimin dhe ndryshimin e rendit të ditës.
Kuvendet Komunale, vendimet i marrin përmes votimit, e që një vendim të jetë i vlefshëm duhet që të votojnë së paku shumica e anëtarëve prezent.
Neni 48
Votimi
48.1 Në të gjitha takimet e kuvendit të komunës dhe komitetet e tij, çdo person, përfshirë edhe kryesuesin, ka nga një votë, por kryesuesi ka një votë shtesë nëse votimi është i barabartë për ose kundër një propozimi.
48.2 Nëse ndryshe nuk parashihet shprehimisht në këtë ligj, vendimet e kuvendit të komunës aprovohen me shumicën e anëtarëve që janë të pranishëm dhe votojnë.
48.3 Abstenimet regjistrohen me qëllim të themelimit të kuorumit, por nuk merren parasysh në rezultatet e votimit.
Por a e keni ditur që Qeveria e Kosovës mund të shpërndajë Kuvendin Komunal në rast se ai shihet si jofunksional?
Në një rast të tillë Komuna do të shkonte në zgjedhje.
Neni 50
Shpërndarja e kuvendit jofunksionues të komunës
50.1 Nëse kuvendi i komunës dështon në kryerjen e funksionit të detyrueshëm sipas standardeve të përcaktuara me ligj, apo nëse bëhet jofunksionuese dhe kështu rrezikon ushtrimin e të drejtave themelore të qytetarëve, ministria përgjegjëse për qeverisje lokale njofton komunën për dështimin dhe kërkon që të ndërmerren masa të duhura në mënyrë që të sigurohet kryerje e qetë e funksionit komunal.
50.2 Kuvendi i Komunës konsiderohet jo funksionuse nëse:
a) nuk e zgjedh kryesuesin, tridhjetë (30) ditë pas themelimit;
b) nuk miraton statutin e saj brenda gjashtëdhjetë (60) ditësh pas themelimit;
c) nuk miraton buxhetin sipas afatit të paraparë me ligjin përkatës; ose
d) nuk mban mbledhje për një periudhë më të gjatë se gashtë (6) muaj;
50.3 Ministria përgjegjëse për qeverisje lokale e njofton Qeverinë e Republikës së Kosovës për mosfunksionimin e komunës. Qeveria mund ta shpërndajë kuvendin e komunës jofunksionues.
50.4 Zgjedhjet e reja për kuvendin e komunës mbahen në pajtim me ligjin për zgjedhjet komunale.
Këto janë disa nga detyrat dhe funksionet e asamblistëve në Kuvendet Komunale.
Detajet e tërësishme mund të gjenden në Ligjin nr 03/L-040 për Vetëqeverisjen Lokale të miratuar nga Kuvendi i Kosovës më 20.02.2008.
Sot nis edicioni i 54-të i Festivalit të Teatrove në Ferizaj, një ngjarje e rëndësishme kulturore që do të zhvillohet gjatë gjithë javës në qytetin e Ferizajt. Ky festival sjell në skenë një program të pasur me shfaqje dhe performanca teatrale nga artistë të njohur lokalë dhe ndërkombëtarë.
Aktivitetet e ditës së parë nisin në ora 11:00 në Qendrën Rinore me punëtorinë teatrale dhe performancën “LUFTA E IV BOTËRORE” nga Gjorgji Rizeskin. Kjo punëtori do të zhvillohet deri në orën 17:00 dhe do të ofrojë një hapësirë për eksplorimin e teknikave të teatrit të rrugës.
Në ora 19:30, në Teatrin “Adriana”, do të mbahet ceremonia e hapjes së festivalit. Pas ceremonisë, në ora 20:00, do të vijojë shfaqja “MISHI I EGËR”, një produksion i Teatrit Shqiptar të Shkupit me tekst nga Goran Stefanovski dhe regji nga Martin Koçovski. Kjo shfaqje është një nga pikat kyçe të programit të sotëm dhe pritet të tërheqë një audiencë të gjerë.
Dita e parë e festivalit do të mbyllet me performancën “ASGJË SIKUR DIELLI” në ora 21:00 në oborrin e Teatrit “Adriana”.
Ky edicion i 54-të i festivalit vazhdon traditën e tij të gjatë duke ofruar një platformë të rëndësishme për artistët dhe adhuruesit e teatrit për të ndarë dhe për të eksploruar format e ndryshme të shprehjes teatrale. Festivali do të vazhdojë gjatë gjithë javës me një varg shfaqjesh, punëtorish dhe aktivitetesh të tjera kulturore, duke ofruar mundësi për pjesëmarrësit që të angazhohen në një spektër të gjerë të artit teatror.
Për detaje të mëtejshme mbi programin dhe aktivitetet, vizitorët mund të konsultojnë faqen zyrtare të festivalit “Festivali Teatrove Ferizaj”.
Partitë e koalicionit të udhëhequr prej PDK-së së kryetarit Agim Aliu, nuk ia kanë dalë as në seancën e rregullt të gushtit që t’i bindin të gjithë kuvendarët e tyre që t’i hapet rruga procedurës për dhënien në shfrytëzim deri në pesëmbëdhjetë vjet të çerdheve publike të Ferizajt. Bashkë me kuvendarët e rebeluar të pozitës, edhe kuvendarët opozitarë të tri partive dolën nga salla ende pa nisur diskutimi i kësaj pike të rendit të ditës. Kjo pika kishte dështuar edhe në seancën e fundkorrikut po për mungesë kuorumi.
Kryetari i Kuvendit Komunal të Ferizajt, Xhavit Zariqi i AAK-së, ua dha kuvendarëve disa minuta pauzë pasi vetëm 19 kuvendarë koalicioni mbetën në sallë, por PDK-ja nuk ia doli t’u mbushte mendjen as tri kuvendareve të saj për t’u kthyer. PDK-së i munguan gjatë gjithë seancës dy anëtarë tjerë Kuvendi, derisa AAK-së një.
Koalicionit nuk i bëri punë as pauza për t’ia lejuar Drejtorisë së Arsimit nisjen e procedurave për dhënien në shfrytëzim të dy çerdheve aktive, që për dy vite kishin funksionuar bazuar në një kontratë të lidhur me organizatën “Caritas Kosova” për t’i rekrutuar dhe paguar edukatoret dhe stafin e tyre. Komuna nuk kishte buxhet të planifikuar për ta. Edukatoret janë përballur qe disa muaj me vonesa pagash.
Dy përpjekjet e pasuksesshme brenda një seance
Me propozimin e ri, parashihej që nga ky ndryshim statusor të përfshihej çerdhja funksionale në “Lagjen e re” dhe ajo afër tregut të gjelbër, bashkë me objektet e çerdheve jofunksionale në Talinoc të Jerlive, Greme, Lloshkobare dhe objektin e papërfunduar në rrugën “Rexhep Bislimi” në qytet.
Në Lloshkobare synohet të kthehet në çerdhe shkolla e re, e cila asnjëherë nuk u lëshua për nxënës derisa komuniteti e hap për të pame kur vdes dikush në afërsi.
Ndryshe nga seanca e kaluar kur opozita akuzonte kryetarin Aliu se çerdhet synon t’ua japë “njerëzve të pushtetit”, pa ofruar emra konkretë, kësaj here nuk ka qëndruar fare për të debatuar para votimit eventual.
Drejtori i Drejtorisë së Arsimit, Afrim Llabjani, ka thënë pas përpjekjes së dytë brenda së njëjtës seancë se kuvendarët e rebeluar është dashur të qëndronin dhe të ofronin propozime dhe alternativa konkrete. Ai ka thënë se me këtë plan synohet të funksionalizohen të gjitha çerdhet “sepse ka kërkesa ekstreme për regjistrim për çerdhe”.
Edhe kryesuesi Zariqi ka thënë se kuvendarët duhet të ofrojnë propozime, “por jo mos me pas asnjë ide sesi duhet të bahet një zgjidhje që është interes i të gjithëve pa përjashtim”.
Kurrkund katër parqet e premtuara të Agim Aliut
Llabjani, i cili në një pikë ndaras, ku ka raportuar për gjendjen e shkollave të komunës së Ferizajt para fillimit të vitit shkollor, ka thënë se në shkollën “Rizah Matoshi” në Nikadin mësimi do të mbahet me një ndërrim krahas vazhdimit të punimeve për rinovim.
Verona Isaki, kuvendare nga radhët e LDK-së, ka thënë se kësaj shkolle i është hequr kulmi para dy javësh, porse punimet janë ndalur pasi që punëtorët e kompanisë që e ka fituar tenderin, kanë shkuar në pushime vjetore. “Domethanë punimet në shkollën ‘Rizah Matoshi’ fillojnë më 2 shtator”, ka thënë Isaki, duke shprehur drojën se reshjet eventuale atmosferike do të pengonin procesin mësimor.
Në këtë seancë, janë shqyrtuar edhe raportet e kompanive publike komunale e rajonale
Brahim Osmani, shef i grupit parlamentar të Lëvizjes Vetëvendosje, së pari ka shprehur habinë se pse aksionarët e “Pastërtisë” dhe “Ambientit” nuk ishin të pranishëm në sallë, përderisa vetëm “Stacioni i Autobusëve” kishte dërguar një përfaqësues. Ai ka akuzuar pushtetin se ka dështuar të bëjë zgjidhje në kompaninë rajonale për mbledhjen e mbeturinave, “Pastërtia”, ku nga disa herë në vit punëtorët hyjnë në grevë.
Shkarkim të aksionarëve të komunës në këto kompani ka kërkuar Amir Rexhepi i LVV-së.
Edhe Flamur Istrefi, shef i grupit parlamentar të LDK-së, ka thënë se pushteti i Aliut qysh “e ka mbush qytetin me bërllok, bërllok e ka bëa” edhe me mënyrën e menaxhimit të krizave të vazhdueshme të kësaj kompanie, mirëpo tender prej 1.6 milionë eurosh i ka dhënë një kompanie private për pastrimin e disa pjesëve të qendrës së qytetit dhe përreth.
Kuvendari i LDK-së, Besim Haziri para votimit për dhënien e një pjese të hapësirës së stacionit të vjetër të autobusëve “Ambientti”, ka thënë se kryetari Aliu në fushatë u kishte premtuar ferizajasve katër parqe të reja brenda qytetit – “Stacioni i Autobusëve” do të kalojë te stacioni i ri në periferi – porse hapësirën që do të lirohet te stacioni i vjetër po e merr për t’ia dhënë “Ambientit” pa zyra e hapësirë të veten për punëtorët dhe makinerinë. Edhe kjo pikë kaloi me shumicën e koalicionit.
Është shtyrë për seancën e radhës kërkesa e një ndërtuesi privat për t’ia lejuar ndërtesës së tij 19-katëshe në qendër – pa përfshirë katet e bodrumit – edhe tri kate në këmbim të një parcele në Nikadin me kusht që të mos i kërkojë komunës shpronësim për shfrytëzim e tokës për një projekt të realizuar komunal.
Kryeministri i Kosovës, Albin Kurti, së bashku me Ministren e Ekonomisë, Artane Rizvanolli, dhe zyrtarë të tjerë, kanë lansuar sot thirrjen e dytë publike për subvencionimin e masave të efiçiencës së energjisë për shtëpitë individuale të banimit. Procesi i aplikimit do të hapet nesër, duke ofruar mundësi për qytetarët që të përfitojnë nga masa si izolimi i mureve të jashtme, izolimi i kulmit, dhe ndërrimi i dritareve dhe dyerve të jashtme, me mbështetje financiare deri në 45% të shumës së investimit. Mbështetja totale për një përfitues mund të arrijë deri në 5,500 euro.
Kryeministri Kurti theksoi se interesimi për thirrjen e parë vitin e kaluar ishte i madh dhe për këtë arsye, thirrja e dytë do të jetë e hapur për vetëm dy javë, ndryshe nga planifikimi fillestar.
“Thirrja ka qenë e parimit të njëjtë, kush vjen i pari, shërbehet i pari. Interesimi ka qenë i lartë dhe si rezultat, këtë herë thirrja do të jetë e hapur për dy javë,” deklaroi Kryeministri Kurti. Ai u bëri thirrje qytetarëve të aplikojnë sa më parë për të përfituar nga kjo mundësi e rëndësishme për të ulur shpenzimet e energjisë dhe për të përmirësuar cilësinë e jetesës në shtëpitë e tyre.
Ministrja Rizvanolli shtoi se ky projekt është pjesë e pakos së përkrahjes emergjente të BE-së për shtetet e Ballkanit Perëndimor, ku Kosova ka përfituar 75 milionë euro, shumën më të lartë për kokë banori në rajon. “Qëllimi i kësaj pakoje ishte zbutja e efekteve socio-ekonomike. Masat janë dizajnuar për të përmirësuar cilësinë e jetesës dhe për të ulur shpenzimet e energjisë për familjet dhe bizneset tona,” shpjegoi ajo.
Qytetarët që dëshirojnë të aplikojnë duhet të sigurojnë që kanë një llogari të hapur në platformën e-Kosova dhe të kenë kryer verifikimin e nivelit të dytë. Aplikimi përfshin disa hapa të detajuara që duhet të ndiqen për të përfunduar me sukses procesin.
Për më shumë informacione dhe udhëzime për procesin e aplikimit, qytetarët mund të vizitojnë faqen zyrtare të Fondit të Kosovës për Efiçiencë të Energjisë (FKEE) ose të kontaktojnë zyrat e FKEE në Prishtinë ose në Mitrovicën e Veriut.
