Kosovë

Partitë politike – Më shumë shpenzime për fushata zgjedhore se të hyra

Published

4 years ago

24 October, 2022

Partia në pushtet, Lëvizja Vetëvendosje, ka shpenzuar mbi 1.3 milion euro për fushatat zgjedhore të vitit të shkuar.

Më 2021 u mbajtën zgjedhjet qendrore dhe ato lokale.

Komisioni Qendror i Zgjedhjeve ka publikuar të hënën shpenzimet e partive politike. Nga të dhënat e publikuara, bëhet e ditur se LVV-ja ka pasur të hyra gjatë vitit 2021 mbi 2.1 milionë euro, kurse ka shpenzuar mbi 2.3 milionë euro, pra 200 mijë euro më shumë.

Përveç fushatës, Vetëvendosje ka shpenzuar mbi 600 mijë euro “për paga dhe kompensime”.

Ndërkohë partia e dytë me më së shumti shpenzime në fushatat e vitit të shkuar është Lidhja Demokratike e Kosovës. Shpenzoi mbi 750 mijë euro.

Sipas të dhënave, LDK-ja ka pasur shpenzime dyfish më shumë se të hyrat përgjatë vitit 2021.

Ky subjekt ka pasur të hyra gjatë vitit mbi 583 mijë euro, ndërsa ka shpenzuar 1 milion e 178 mijë euro, pra deficiti i përgjithshëm është gati 700 mijë euro.

Partia e dytë opozitare me më së shumti shpenzime për fushatat zgjedhore të vitit që shkoi është PDK-ja me mbi 362 mijë euro të shpenzuara.

Edhe PDK-ja ka shpenzuar më shumë se që ka pasur të hyra përgjatë një viti. Shpenzoi 49 mijë euro më shumë se që paraqiti të hyra.

Aleanca për Ardhmërinë e Kosovës ka shpenzuar mbi 310 mijë euro gjatë fushatave zgjedhore.

Njësoj, edhe kjo parti, sipas të dhënave të KQZ-së, ka pasur më shumë shpenzime sesa të hyra përgjatë vitit 2021.

Me mbi 294 mijë euro të hyra dhe mbi 477 mijë euro shpenzime, AAK-ja ka regjistruar deficit prej 182 mijë eurosh gjatë 2021-tës.

Komisioni Qendror i Zgjedhjeve ka njoftuar se këto raporte financiare janë të paaudituara dhe mund të pësojnë ndryshime./koha

Shiko edhe:

Kosovë

Sot nis numërimi i votave të kandidatëve për deputetë

Published

24 hours ago

08 June, 2026

Redaksia

Në Qendrat Komunale të Numërimit sot pritet të nisë procesi i numërimit të votave të kandidatëve për deputetë.

Zëdhënësi i KQZ-së Valmir Elezi, ka thënë se paraprakisht do të bëhet verifikimi i rezultateve të subjekteve politike nga formularët e plotësuar në vendvotime.

Elezi gjithashtu bëri të ditur se sot në ora 16:30, do të mbajnë konferencë për media ku edhe do të njoftojnë për fillimin e verifikimit /numërimit në të gjitha komunat si dhe për të gjitha aktivitetet e KQZ-së në ditët e ardhshme.

Nga publikimi i fundit i rezultateve preliminare të zgjedhjeve të 7 qershorit, nga 99.44% të votave të përpunuara, Lëvizja Vetëvendosje ka marrë në 42.91 % të votave pasuar nga Partia Demokratike e Kosovës me 21.08% dhe Lidhja Demokratike të Kosovës me 17.60% të votave. Ndërkaq Aleanca për Ardhmërinë e Kosovës fitoi 7.17 % të votave.

Kjo përqindje nuk përfshin votat nga vendvotimet me kusht, votat e personave me nevoja të veçanta dhe ato të votimit jashtë Kosovës.

Kosovë

Mbeten edhe 14 kuti votimi të pa numëruara

Published

1 day ago

08 June, 2026

Redaksia

Nga publikimi i fundit i rezultateve preliminare të zgjedhjeve të 7 qershorit, vërehet se nga 2498 kuti kanë mbetur të numërohen edhe 14 sosh.

Sipas faqes së Komisionit Qendror të Zgjedhjeve nga 99.44% të votave të përpunuara, Lëvizja Vetëvendosje ka marrë në 42.91 % ose 297.363 vota. E dyta renditet Partia Demokratike e Kosovës me 21.08% apo me 146.108 vota. Lidhja Demokratike të Kosovës ka marrë 17.60 % apo 121.987 vota, ndërkaq Aleanca për Ardhmërinë e Kosovës me 7.17 % apo 49.712 vota.

Kjo përqindje nuk përfshin votat nga vendvotimet me kusht, votat e personave me nevoja të veçanta dhe ato të votimit jashtë Kosovës.

Diasporë

Mërgata voton në përfaqësitë diplomatike në zgjedhjet parlamentare të Kosovës

Published

3 days ago

06 June, 2026

Redaksia

Mijëra shtetas të Kosovës që jetojnë jashtë vendit po votojnë të shtunën fizikisht në përfaqësi diplomatike të Kosovës për zgjedhjet e parakohshme parlamentare të 7 qershorit, njoftoi Komisioni Qendror i Zgjedhjeve (KQZ).

Mbi 27.000 shtetas të Kosovës me të drejtë vote janë regjistruar për të votuar në 30 përfaqësi diplomatike të Kosovës në 18 shtete të ndryshme të botës.

Në të gjitha këto përfaqësi është duke u zhvilluar votimi, tha të shtunën zëdhënësi i KQZ-së, Valmir Elezi, në një konferencë për media në Prishtinë.

Deri në orën 13:00 kanë votuar 38.97 për qind apo 10.804 votues, bëri të ditur Elezi.

Vendvotimet në përfaqësi diplomatike dhe konsullore do të jenë të hapur prej orës 07:00 deri në ora 19:00, sipas kohës lokale në vendet përkatëse.

Ky numër votuesit është vetëm një pjesë e një rekordi prej mbi 110.000 votuesve nga mërgata që janë regjistruar për të votuar në zgjedhjet e 7 qershorit.

Votimi po zhvillohet në vende si Gjermani, Zvicër, SHBA, Kanada, Itali, Francë, Britani e Madhe, Belgjikë, Suedi, Austri, Norvegji, Slloveni, Danimarkë, Turqi, Kroaci, Holandë, Hungari, Çeki etj.

Votimi në përfaqësi diplomatike ishte mundësuar për herë të parë në zgjedhjet parlamentare të 9 shkurtit të 2025, ndërsa më herët kishte qenë i mundur vetëm votimi përmes postës.

Zgjedhjet e parakohshme parlamentare në Kosovë po mbahen pasi Kuvendi i Kosovës nuk arriti ta zgjedhë presidentin e ri brenda afateve kushtetuese.

Partitë politike nuk arritën konsensus rreth zgjedhjes së presidentit pasi Vjosa Osmanit i përfundoi mandati pesëvjeçar në fillim të prillit.

Këto do të jenë zgjedhjet e treta parlamentare në 18 muajt e fundit në Kosovë, pas zgjedhjeve të mbajtura në shkurt dhe dhjetor të vitit 2025.

| Radio Evropa e Lirë