Organizata e Veteranëve të Luftës së UÇK-së, ka protestuar para zyrave të EULEX-it në Fushë-Kosovë.
Kjo protestë është thirrur për të kundërshtuar veprimet e fundit të Zyrës së Prokurorit të Specializuar në Hagë.
Protestuesit kanë hedhur telefonat e tyre brenda oborrit te EULEX, në shenjë proteste për bastisjet e fundit që kanë kryer njësitet e EULEX-it ditët e fundit.
Ushtruesi i detyrës së OVL-së së UÇK-së, Faton Klinaku, tha se Specialja dhe EULEX-i po i shqetësojnë familjet e bashkëluftëtarëve dhe dëshmoreve.
“Që nga përfundimi i luftës së UÇK populli është përballur me shumë sfida e padrejtësi. UNMIK-u kishte mandat që të gjykonte krimet e kryera në Kosovë, por akuzojë e gjykojë vetëm shqiptarë. EULEX-i kishte mandat gjykimin e krimeve të kryetare Kosovë, por akuzojë e gjykojnë vetëm shqiptarët”, u shpreh Klinaku.
Ai më tej tha se “Dhomat e Specializuar të Kosovës gjykojnë vetëm shqiptarët, po jo krimet e kryera në Kosova, por jo krimet dhe maskat që i ka shkaktuar pushtuesi serb ndaj civilëve. Ato gjykojnë luftën tonë çlirimtare, gjykojnë vetëm UÇK sikur organizata duke e quajtur edhe ndërmarrje e përbashkët kriminale. Do të ishte edhe më mirë që sa më shumë dëshmitar të dalin në seanca publike që ta marrim veshe edhe ne kur dëshmitë e tyre të përmbysen nga mbrojtja e krerëve të UÇK-së”.
Ditëve të fundit, hetuesit e Zyrës së Prokurorit të Specializuar, të asistuar nga EULEX-i, kanë kryer bastisje në banesën e dëshmorëve Bahri e Fahri Fazliu si dhe në shtëpinë e Behar Berishës, ish-pjesëtarit të UÇK-së i cili ishte bashkëluftëtar i Salih Mustafës..
Gjithashtu, me urdhër të Gjykatës Speciale në Hagë, EULEX-i ua ka konfiskuar telefonat ish-komandantit në Zonën Operative të Llapit, Rrustem Mustafës – Remit, ish të burgosurit politik, Nait Hasanit dhe, Arben Mustafës, vëllait të ish-komandat Salih Mustafës – Calit i cili është i dënuar në shkallë të parë nga Gjykata Speciale me 26 vjet burgim.
