Ferizaj

Bëhen homazhe në 22 vjetorin e rënies së Hajriz Muhadinit dhe Elhami Hasanit

Published

5 years ago

10 May, 2021

Në Varrezat e Dëshmorëve në Ferizaj në 22 vjetorin e rënies u bënë homazhe për dëshmorët Hajriz Muhadini dhe Elhami Hasani.

Bashkëluftëtarët i kujtuan Hajrizin dhe Elhamiun si dy luftëtarë që e deshën shumë lirinë për çka edhe e sakrifikuan jetën.

“Sot përkujtojmë dy dëshmorët e kombit Hajriz Muhadinin dhe Elhami Hasanin të cilët ranë në altarin e lirisë për të mos vdekur kurrë, për të shijuar lirinë që e gëzojmë sot. Këta dy dëshmorë ranë që ne sot me fëmijët tanë të gëzojmë lirinë, të jemi të lirë, të shijojmë këtë dritë dielli. Në emër të OVL së UÇK-së në Ferizaj ftoj familjarët të qëndrojnë, të kenë dinjitetin sepse fëmijët e tyre ranë dëshmorë, por ata ranë për të mos vdekur kurrë, që ne t’i kujtojmë në liri. Unë me shumë shokë me Hajrizin nuk ka pasur pesë minuta që jemi nda. Elhamia ka qenë pak më larg, ndërsa Hajrizi ka qenë më afër, çdo luftëtar i rënë na ka marrë një pjesë të trupit, të gjithë bashkëluftëtarëve. Ne sot jemi falë tyre këtu, por dhimbja nuk do të harrohet kurrë”, thotë Luhan Jahiri, nënkryetar i Organizatës së Veteranëve të Luftës në Ferizaj.

Bashkëluftëtari i Hajriz Muhadinit, Nexhat Shahini, tregoi se Hajrizi ra gjatë granatimeve të forcave serbe dhe se ai do të kujtohet si punëtor i zellshëm në shërbim të lirisë së Kosovës.

“Sa i përket momenteve të fundit si sot e mbajë në mend. 22 vjet më parë kishte filluar ofenzivë e ashpër e forcave serbe në drejtim të pozicioneve të UÇK-së. Atë ditë Hajrizi ishte në rradhët e UÇK-së dhe fati e deshi që të binte në altarin e lirisë për ta kujtuar me mall e dashuri. Nuk është bërë aq sa duhet për idealet dhe për ëndrrat që kishin dëshmorët, mbetet edhe shumë punë për t’u bërë pasi që shumë pak është bërë në këtë drejtim. Dëshmorët kishin ëndrra të mëdha, invalidët kishin ëndrra të mëdha, çlirimtarët kishin ëndrra të mëdha, sot nuk i kanë të realizuara ashtu siç i kishin ëndrrat e tyre. Pres nga institucionet të bëhet më shumë në drejtim të dëshmorëve dhe familjarëve të tyre, sepse janë në një gjendje mëshire dhe pa përkujdesje të mirëfilltë institucionale”, thotë Shahini për Tv Tema.

Dëshmorët Elhami Hasani dhe Hajriz Muhadini ranë më 10 maj 1999 gjatë ofenzivës së forcave serbe në Mollopolc të Komunës së Shtimes.

Ferizaj

Gjatë qershorit në Ferizaj janë konfiskuar 74 motoçikleta

Published

13 hours ago

02 July, 2026

Redaksia

Policia Rajonale e Ferizajt ka bërë të ditur se gjatë muajit qershor ka intensifikuar kontrollet në trafik ndaj drejtuesve të motoçikletave dhe skuterëve.

Si rezultat i këtyre kontrolleve, gjatë kësaj periudhe janë konfiskuar 74 motoçikleta, kryesisht për mungesë të dokumentacionit të rregullt derisa janë shqiptuar edhe 106 gjoba ndaj drejtuesve të motoçikletave, të cilët janë kapur duke qarkulluar në kundërshtim me rregullat dhe ligjet e komunikacionit rrugor.

Numri më i madh i gjobave janë shqiptuar për drejtim të motoçikletës pa patentë shofer, gjithsej 52 gjoba, 46 gjoba për drejtim të motoçikletës pa regjistrim dhe 8 gjoba për kundërvajtje të tjera.

Ferizaj

Prokuroria kërkon paraburgim ndaj të dyshuarës për vrasjen në Ferizaj

Published

3 days ago

29 June, 2026

Redaksia

Prokuroria Themelore në Ferizaj ka kërkuar nga Gjykata Themelore në Ferizaj, caktimin e masës së paraburgimit ndaj të pandehurës A.R., për shkak të dyshimit të veprës penale “Vrasja” sipas Kodit Penal të Republikës së Kosovës.

Sipas kërkesës së Prokurorisë, ekziston dyshimi i bazuar se me datë 28 Qershor 2026, rreth orës 22:40 në Ferizaj, rruga, “Sejdi Sejdiu”, e pandehura ka privuar nga jeta tani të ndjerin F.H., pas një mosmarrëveshje dhe përleshje fizike në mes tyre, me të cilën ka kryer veprën penale “Vrasja”, nga neni 172 të KPRK-së.

Ndërkaq, i dyshuari me iniciale M.B., që ishte ndaluar deri në sqarimin e plotë të rrethanave dhe përfshirjes së tij në rast, me aktvendim të Prokurorit të Shtetit është liruar.

Po ashtu, në këtë rast, lëndime trupore ka pësuar edhe e dyshuara A.R., të cilat dyshohet se i janë shkaktuar nga viktima- tani i ndjeri (F.H.,) për të cilat ka marr trajtim mjekësor në Qendrën Klinike Universitare të Kosovës (QKUK).

Ferizaj

Ndalohen dy persona për vrasjen e 32 vjeçarit në Ferizaj

Published

4 days ago

29 June, 2026

Redaksia

Policia e Kosovës ka dhënë detaje lidhur me vrasjen që ka ndodhur mbrëmë rreth orës 22:50, në një banesë në rrugën “Sejdi Sejdiu”në Ferizaj, ku një person ka humbur jetën dhe dy të tjerë janë ndaluar për 48 orë.

Viktima është identifikuar me inicialet F.H., 32 vjeç, ndërsa vdekja e tij është konstatuar në vendin e ngjarjes nga ekipi mjekësor.

“Gjatë ekzaminimit të vendit të ngjarjes është konstatuar një plagë që dyshohet se është shkaktuar nga arma e zjarrit. Në vendngjarje janë gjetur dhe sekuestruar një pistoletë dhe një gëzhojë.

Nga hetimet fillestare rezulton se ngjarja ka ndodhur në banesën e M.B. (48 vjeç), ku në momentin e incidentit ndodheshin aty bashkëshortja, si dhe vajza e tij A.R. (24 vjeçe). Kjo e fundit ka pësuar lëndime trupore dhe është dërguar për trajtim mjekësor në Qendrën Klinike Universitare të Kosovës (QKUK).

Pas ekzaminimit të vendit të ngjarjes, ekziston dyshimi i bazuar se rasti ndërlidhet me veprën penale “Vrasje e rëndë”.

Me vendim të prokurorit të rastit, i dyshuari M.B. është ndaluar për 48 orë. Po ashtu, edhe ndaj A.R. është lëshuar vendim për ndalim prej 48 orësh, mirëpo ajo vazhdon të mbetet nën trajtim mjekësor në QKUK.

Trupi i pajetë i viktimës është dërguar në Institutin e Mjekësisë Ligjore në Prishtinë për obduksion.

Sektori i Hetimeve Rajonale, në koordinim dhe autorizim të prokurorit të shtetit, është duke ndërmarrë veprime intensive hetimore për zbardhjen e plotë të rrethanave të këtij rasti”, thuhet mes tjerash në njoftimin e Policisë.