Arbëri

Shoqata ”Feniks” nis ndërtimin e 6 shtëpive në Kukës

Published

7 years ago

03 March, 2020

Shoqata humanitare ferizajase “Feniks” vazhdon humanizmin e saj në Shqipëri. Pas përzgjedhjes se gjashtë familjeve në rrethinën e Kukësit ka nisur ndërtimi i shtëpisë së parë për njërën nga këto familje në fshatin Mamë, me ndihmën e donatorëve nga Ferizaj dhe jashtë tij. Kryetari i kësaj shoqate, Milaim Jashari, tha se këto familje jetojnë në kushte te mjerueshme.

“Ne si shoqatë “Feniks” jemi të kënaqur që i kemi donatorët shumë të fortë, është ”Eli-Abi” i cili na përshëndet çdo herë, çdo vit na ndihmon, ësht ”Maksiti”, është ”Lala” dhe kemi ”Dino” e Lipjanit kështu që e kemi edhe një familje në Zvicër, disa shokë që janë, Jakup Morina me shokët e tij, kjo është e dyta shtëpi që na ndihmojnë ata shokë e vëllezër tonë që janë nga Zvicra dhe ata kanë shprehur dëshirë të ndërtojnë një shtëpi këtu në Kukës dhe besoj që edhe ata do të jenë të kënaqur sepse nuk është pak të rehatohet një familje e tillë që janë në gjendje shumë të vështirë”, tha Milaim Jashari.

Ndërkaq, kryetari i Bashkisë së Kukësit, Safet Gjici, u shpreh falënderues tejmase ndaj ”Feniks”-it dhe donatorëve të tyre që u kanë dalë në ndihmë familjeve të përzgjedhura nga kjo komunë.

“Për këtë pa diskutim që shqiptarët e kanë dhembjen, e kanë humanizmin brenda shpirtit dhe unë besoj që edhe ata shqiptarë shumë të nderuar që kanë ndihmuar me fondet e veta familjare për të investuar në këto shtëpi, për të bërë këto kryefamiljare me fëmijë jetim, këta fëmijë jetonin në shtëpi të dikujt tjetër, pa shtëpi fare. Pa diskutim që meritojnë të vlerësohen maksimalisht dhe Bashkia e Kukësit dhe unë si kryetar Bashkie i vlerësoj maksimalisht. Do të kenë gjithmonë mikëpritjen tonë, sepse realisht është një gjë shumë humane që po bëjnë për të sistemuar këto gjashtë familje që janë të gjithë në nevojë, pa asnjë lloj mundësie financiare për të bërë vet shtëpitë e tyre”, tha Safet Gjici.

Njëra nga kryefamiljaret e përzgjedhura për t’ia ndërtuar shtëpinë, tha se ky gjest human do të thotë shumë për ta.

“Jam nënë me katër fëmijë jetima, pa shtëpi, me një përkrahje sociale, ju falënderoj në radhë të parë kryetarin e Bashkisë, shoqatën “Feniks” që kanë ardhur për të ndërtuar një shtëpi, për fëmijët e mi. Më e gëzuar nuk kam ku të shkoj, çfarë të them me bukë, pa bukë, kështu për t’i rritur sa mundem. Burrin e kam pasur të sëmurë gjithmonë deri sa ka vdekur edhe ai dhe më ka lënë këta katër fëmijë. Kunati më ka marrë përsipër sepse shtëpinë e kam pasur të shembur”, tha Besarie Sylëmataj.

Shoqata “Feniks” do t’i dalë në ndihmë edhe një familje të shtatë nga Kukësi, por nga mungesa e truallit akoma nuk kanë filluar ndërtimin e shtëpisë. Kjo familje tregoi për vështirësitë që ka.

“Jam me qira, 110 mijë paguaj në muaj, kam tre invalidë, gruan dhe dy djem me ilaçe, nuk mund të ecin, duhet t’iu ndihmoj unë në krah për t’u ngritur, në banjo apo kudo. Kjo dhomë është me lagështi, me bodrum poshtë, lagështi shumë, e vogël”, tha Kujtim Tusha.

“Banesa shumë e vogël, vet jam e sëmurë, dy fëmijë i kam të sëmurë. Pasuri nuk kemi hiç, ky i sëmurë, djali tjetër i shtrirë, pasi janë të sëmurë, as lekë për ilaçe nuk kam për t’i marrë. Nuk e di a të marrë ilaçe për vete apo për fëmijë, të tretë kemi nevojë, të sëmurë. Faleminderit kush vendos të na ndihmojë nga zemra, Zoti e Allahu i shpërbleftë”, tha Naile Tusha.

Shoqata “Feniks” bëri të ditur se sapo të gjendet parcela për këtë familje, së bashku me ndihmën e donatorëve vullnetmirë, do të fillojë ndërtimi i menjëhershëm i shtëpisë së tyre.

Arbëri

“Arrest shtëpiak” për drejtoreshën e Shërbimit Informativ Shqiptar, Vlora Hyseni

Published

8 hours ago

22 September, 2026

Redaksia

Prokuroria e posaçme në Shqipëri (SPAK), ka ngritur kallëzim penal ndaj drejtoreshës së Shërbimit Informativ të Shtetit Vlora Hysenin, nëN dyshimin për përkrahje të autorit të krimit dhe nxjerrje të sekretit shtetëror. Me kërkesë të prokurorisë, Gjykata Posaçme për Korrupsionin dhe Krimin e Organizuar (GJKKO) i ka caktuar Hysenit masën e sigurisë “arrest shtëpie” edhe pse ajo aktualisht nuk ndodhet në Shqipëri.

Ndaj saj është vendosur edhe masa e pezullimit nga detyra.

Përndryshe, Vlora Hyseni ka shërbyer për vite me radhë në Agjencinë e Kosovës për Inteligjencë (AKI), si Drejtoreshë për Marrëdhëniet me Jashtë dhe më pas si Zëvendësdrejtoreshë e Përgjithshme, përpara se të shkarkohej nga Presidentja Vjosa Osmani dhe Kryeministri Albin Kurti në qershor të vitit 2021.

Pas largimit nga Kosova, ajo u zhvendos në Tiranë ku shërbeu si Këshilltare për Sigurinë Kombëtare e Kryeministrit të Shqipërisë, Edi Rama, kurse në mars të vitit 2023 ajo u dekretua nga presidenti Bajram Begaj në pozitën e drejtoreshës së Shërbimit Informativ të Shtetit.

Ndërkohë, në hetimet në lidhje me dyshimet për vepra të ndryshme penale në Agjencinë Kombëtare të Shoqërisë së Informacionit (AKSHI), janë duke u zhvilluar edhe ndaj ish-drejtorit të policisë së Shtetit, Ilir Proda, kurse tashmë janë arrestuar edhe një ekspert kriminalistik në Tiranë dhe një pronar biznesi në Durrës.

Ilir Proda ishte Drejtor i Përgjithshëm i Policisë së Shtetit në Shqipëri, derisa u shkarkua nga detyra në mars të vitit 2026.

Sipas mediave shqiptare, mëngjesin e sotëm zyrtarë të Byrosë Kombëtare të Hetimit kanë bastisur disa banesa në Tiranë, përfshirë banesën e Ilir Prodës dhe disa ish-zyrtarëve të tjerë. Lidhur me këtë rast, më herët janë arrestuar edhe Ergys Agasi dhe Ermal Beqiraj ndërsa në masën e sigurisë “Arrest në shtëpi” ndodhet edhe drejtuesja e AKSHI-it, Mirlinda Karçanaj.

Arbëri

Shqipëria arreston tre shtetas të Kosovës në një operacion kundër trafikimit të drogës

Published

1 month ago

22 August, 2026

Redaksia

Në Durrës të Shqipërisë, autoritetet thanë se kanë arrestuar tre shtetas të Kosovës, dhe kanë sekuestruar rreth 80 kilogramë kanabis të llojit “Gelato”, që dyshohet se u trafikua nga Kanadaja për t’u shpërndarë më pas në Shqipëri dhe Kosovë.

Tre shtetasit e Kosovës janë identifikuar si T. D., 32 vjeç, L. G., 26 vjeç, dhe B. J., 40 vjeç, të cilët dyshohen për veprën penale të trafikimit të narkotikëve.

Sipas Kodit Penal të Shqipërisë, për veprën penale që dyshohen të arrestuarit parashihet dënim nga shtatë deri në 20 vjet burgim.

Dy persona të tjerë, H.C, i lindur dhe banues në Kukës dhe G.O, i lindur në Kosovë dhe banues në Ontario të Kanadasë janë në kërkim dhe dyshohen për po të njëjtën vepër penale.

“Si rezultat i veprimeve hetimore intensive dhe të koordinuara, u bë i mundur dokumentimi i një skeme të dyshuar të trafikimit ndërkombëtar të lëndëve narkotike, të kryer në bashkëpunim, ku u sekuestruan, në Portin e Durrësit, 127 pako me lëndë të dyshuar narkotike kanabis, e njohur në treg me emërtimin ‘Gelato’, me peshë totale rreth 80 kilogramë”, u tha në njoftim.

Vlera në treg e drogës së sekuestruar, sipas Policisë së Shqipërisë, është rreth 1 milion euro.

Dyshohet se lënda narkotike sigurohej në Ontario të Kanadasë dhe transportohej drejt Shqipërisë, “e fshehur në një vend të posaçëm të modifikuar në një automjet të porositur për blerje në Kanada”.

Policia tha se në bazë të hetimeve të deritanishme, dyshohet se personat e përfshirë në këtë rast kishin role të përcaktuara në sigurimin, fshehjen, transportimin dhe shpërndarjen e lëndës narkotike, nga Kanadaja drejt Shqipërisë dhe më tej drejt Kosovës.

Gjatë operacionit, të emëruar “Anchor”, autoritetet shqiptare thanë se përveç pakove me lëndë narkotike, sekuestruan edhe tre automjete, pesë telefona celularë dhe rreth 11.000 euro para të gatshme.

| Radio Evropa e Lirë

Arbëri

Arrestohet Artan Grubi pas më shumë se një viti në arrati

Published

7 months ago

23 February, 2026

Redaksia

Ish-zëvendëskryeministri maqedonas Artan Grubi është arrestuar më 23 shkurt në pikën kufitare Bllacë, pas më shumë se një viti prej kur ishte në arrati, ka konfirmuar Ministria e Brendshme e Maqedonisë së Veriut.

Grubi dyshohet për abuzim të detyrës zyrtare në rastin e njohur si “Lotaria Shtetërore”, rast për të cilin ka raportuar më herët edhe Radio Evropa e Lirë.

Në këtë rast përfshihet edhe Përparim Bajrami, i cili po ashtu përmendet në aktakuzë si i dyshuar.

Prokurorët dyshojnë se ata kanë përvetësuar rreth 8 milionë euro përmes prokurimit të pajisjeve të terminaleve të lotarisë elektronike (VLT).

Autoritetet nuk kanë bërë të ditur ende nëse Grubi do t’i nënshtrohet masës së paraburgimit apo do t’iu dorëzohet autoriteteve gjyqësore më vonë gjatë ditës.

Prokuroria pati kërkuar ndalimin e Grubit dhe Bajramit, me arsyetim se ekziston dyshim i bazuar se veprimet e të dyve kanë pasur qëllim përfitimin e paligjshëm material.

Më 17 dhjetor të vitit të kaluar, Prokuroria Penale pati kërkuar paraburgim prej 30 ditësh për Grubin dhe Bajramin dhe po atë ditë autoritetet maqedonase patën lëshuar urdhërarrestim ndërkombëtar për të dyja figurat.

Artan Grubi pati thënë përmes një postimi në Facebook se nuk po arratiset mirëpo që ishte në një vizitë private në Kosovë dhe që do të kthehej në shtëpi. Ditën pas asaj deklarate, policia ka kërkuar në dy lokacione mirëpo nuk e ka gjetur atë.

Kryeministri maqedonas, Hristjan Mickoski pati thënë atëbotë se Grubi “bashkë me një person tjetër, biznesmen, është larguar nga Maqedonia [e Veriut] me makinë me targa diplomatike dhe është nisur drejt vendit fqinj Kosovës” dhe që Bajrami, sipas tij, nuk ka qenë brenda territorit maqedonas për kohë të gjatë.

Mes tjerash, Grubi është futur në listën e zezë të Departamentit amerikan të Shtetit më 9 dhjetor, për shkak të, siç është thënë, përfshirjes në korrupsion, për ndërhyrje politike dhe përpjekje për të mashtruar gjyqësorin.

Arsyetimi për përfshirje në këtë listë ishte sepse ata kanë marrë ryshfet për të ndikuar në procedurat gjyqësore që lidhen me dënimin penal të ish-drejtorit të Administratës së Sigurisë dhe Kundërzbulimit (DSK), Sasho Mijalkov, në rastin “Target” të hapur nga Prokuroria Speciale Publike (PSP), i cili kishte të bënte me përgjimet masive.

Grubi ishte anëtar i Bashkimit Demokratik për Integrim (BDI) të opozitës, dikur deputet dhe zëvendëskryeministër në Qeverinë e mëparshme të LSDM-së dhe BDI-së.

| Radio Evropa e Lirë