Ferizaj

Me staf të reduktuar administrata komunale ofron shërbime për qytetarë

Published

6 years ago

16 March, 2020

administrator

Qytetarët e Ferizajt mund të marrin shërbimet e nevojshme në administratën komunale të Ferizajt.

Edhe pse në numër më të vogël, punonjësit sot po kryenin punën e tyre sikur ditëve të tjera të zakonshme.

Zyrtari për marrëdhënie me publikun në këtë komunë, Albion Sherifi, tha se puna në administratën komunale është duke vazhduar normalisht, vetëm se me numër të reduktuar të zyrtarëve administrativ, ashtu siç ka kërkuar Qeveria e Kosovës.

“Vendimi i Qeverisë së Kosovës nuk paralizon gjithë administratën shtetërore por kufizon në nivelin esencial, kështu ka vepruar edhe komuna e Ferizajt, me gjithë kufizmet që janë bërë në ofrimin e shërbimeve megjithatë shërbimet komunale ofrohen, meqenëse mungojnë një pjesë e punëtorëve, janë të lejuar në pushim, shërbimi komunal vazhdon të ofrohet, janë shërbimet e ofiqarisë, tatimit në pronë dhe zyra pritëse, por edhe nëpër drejtoritë komunale ekzistojnë stafe të caktuara, edhe pse të reduktuara, që ofrojnë shërbimet”, tha Sherifi.

Sherifi theksoi se komuna e Ferizajt është duke zbatuar të gjitha masat e vendosura nga Qeveria e Kosovës.

“Në kuadër të masave mbrojtëse për parandalimin e virusit COVID-19 komuna e Ferizajt ka zbatuar në mënyrë strikte të gjitha masat e deleguara nga ana e Qeverisë së Kosovës. Përveç kësaj ka ndërmarrë edhe masa vetanake, në këtë rast ka bërë dezinfektimin e të gjitha hapësirave publike, po ashtu vazhdimisht është duke u bërë dezinfektimi i objekteve shëndetësore, ku ekspozimi ndaj këtij virusi mund të jetë më i lartë”, tha Sherifi.

Qeveria e Kosovës ka ndërmarrë disa masa për të parandaluar përhapjen e virusit COVID-19. Ndër to është mbyllja e kafeneve, bareve, restoranteve, qendrave tregtare (përjashtuar barnatoret dhe marketet brenda tyre), mbylljen e tregjeve të kafshëve dhe automjeteve.

Përveç këtyre operatorëve, operatorët e tjerë ekonomikë mund të punojnë, por duke respektuar vendimin e qeverisë që bizneset të marrin masa, si mbajtja higjienike, të dezinfektohet hapësira, punonjësit të pajisen me pajisje personale mbrojtëse, të sigurohet që në secilin moment brenda lokalit të ketë maksimalisht aq njerëz sa të mund të mbahet distanca minimale prej një metër në mes të njerëzve.

Ferizaj

Ngritët aktakuza e parë për zgjedhjet e 28 dhjetorit

Published

1 week ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

2 weeks ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.

Ferizaj

Për manovra të rrezikshme ndëshkohen 7 shoferë në Ferizaj

Published

3 weeks ago

12 January, 2026

Redaksia

Policia në Ferizaj ka njoftuar se gjatë kontrolleve të realizuara në pika të ndryshme të qytetit, kanë identifikuar dhe ndëshkuar tetë shoferë për shkelje të rënda në komunikacion.

Sipas njoftimit, 7 shoferë janë ndëshkuar, sepse kanë kryer manovra të rrezikshme, përfshirë rrëshqitjen e gomave me frenë dore, ndërsa një shofer është ndëshkuar për qarkullim me automjet me afat të skaduar të regjistrimit.

Për këto kundërvajtje, shtatë shoferëve u është shqiptuar gjobë nga 150 euro dhe nga një (1) pikë negative secilit.

Të ndëshkuarit janë:

V.H. (31 vjeç), me veturë Mercedes-Benz, ngjyrë hiri, me targa vendore

B.R. (30 vjeç), me veturë BMW XM, ngjyrë e kaltër, me targa vendore

D.B. (21 vjeç), me veturë Audi, ngjyrë e bardhë, me targa vendore

B.B. (22 vjeç), me veturë VW Golf, ngjyrë e bardhë, me targa vendore

B.I. (20 vjeç), me veturë Opel, ngjyrë hiri, me targa vendore

L.S. (31 vjeç), me veturë Audi, ngjyrë e bardhë, me targa vendore

L.A. (32 vjeç), me veturë BMW, ngjyrë e bardhë, me targa vendore

Ndërsa shoferi A.G. (29 vjeç), me veturë Ford, ngjyrë e gjelbër, me targa vendore, është ndëshkuar pasi automjeti kishte afat të skaduar të regjistrimit që nga data 02.12.2025.

Atij i është shqiptuar gjobë prej 200 euro dhe automjeti i është konfiskuar përkohësisht.